ସମ୍ବଲପୁର ୦୭।୦୧ : ସମ୍ବଲପୁରରେ ବିଜେପି ନେତାଙ୍କୁ ଗାଡି ଚଢାଇ ହତ୍ୟା ଘଟଣା । ଗିରଫ ଅଭିଯୁକ୍ତଙ୍କୁ ରିମାଣ୍ଡରେ ଆଣିବ ପୋଲିସ । ୭ ଦିନିଆ ରିମାଣ୍ଡ ପାଇଁ ଆବେଦନ କରିଥିବା ବେଳେ ପୋଲିସକୁ ତିନି ଦିନିଆ ରିମାଣ୍ଡ ମିଳିଛି । ମଙ୍ଗଳବାରଠୁ ଅଭିଯୁକ୍ତଙ୍କୁ ୩ ଦିନିଆ ରିମାଣ୍ଡରେ ନେଇ ଘାଣ୍ଟିବ ପୋଲିସ । ତେବେ କେମିତି ହତ୍ୟା ହୋଇଛି । ଏହାପଛରେ କାରଣ କଣ ? ଆଉ କିଏ କିଏ ସାମିଲ ଅଛନ୍ତି । ସେନେଇ ଅଧିକ ତଥ୍ୟ ବାହାର କରିବ ପୋଲିସ ।
ଖବର ଅନୁଯାୟୀ, ଶନିବାର ବିଳମ୍ବିତ ରାତିରେ ସମ୍ବଲପୁର-ବରଗଡ ଜାତୀୟ ରାଜପଥ କଣ୍ଟାପାଲି ଓଭରବ୍ରିଜ ନିକଟରେ ଏକ କାରକୁ ଧକ୍କା ଦେଇଥିଲା ହାଇୱା । ୨ ବିଜେପି କର୍ମୀ ଗୋଶାଳା ମଣ୍ଡଳ ସଭାପତି ଦେବେନ୍ଦ୍ର ନାୟକ ଓ ପୂର୍ବତନ ସରପଞ୍ଚ ମୁରଲୀଧର ଛୁରିଆଙ୍କ ମୃତ୍ୟୁ ହୋଇଥିଲା । ଏହାପରେ ପୋଲିସ ତଦନ୍ତ କରି ହାଇଓ୍ୱା ଡ୍ରାଇଭରକୁ ଗିରଫ କରିଥିଲା । ହେଲେ ଗିରଫ ବେଳେ ଡ୍ରାଇଭର ଜଣଙ୍କ ପ୍ରଥମେ କହିଥିଲେ, ନିଦରେ ଗାଡ଼ି ଚଢ଼ିଯାଇଥିଲା । ପୁଣି ଥରେ ପ୍ରଶ୍ନ କରିବାରୁ କହିଥିଲେ କି, ଅନ୍ୟ କେହି ଡରାଇ ଧମକାଇବାରୁ ସେ ଏଭଳି କାଣ୍ଡ କରିଥିଲା । କ୍ଷଣିକ ଭିତରେ ପୁଣି ମତ ବଦଳାଇଥିଲେ । ଅନ୍ୟ କେତେ ଜଣ ଝଗଡ଼ା କରିଥିଲେ, କିନ୍ତୁ ଏମାନଙ୍କ କାର୍କୁ ଭୁଲରେ ତା’ ଗାଡ଼ି ଧକ୍କା ଦେଇଥିଲା । ପୁଣି କହିଥିଲା, ପ୍ରଥମ ଥର ଭୁଲରେ କାର୍ରେ ହାଇୱାଟି ବାଜିଥିଲା । ପରେ ଆଖି ଲାଗିବାରୁ ଦ୍ୱିତୀୟ ଥର କାର୍ରେ ପିଟି ହୋଇଥିଲା । ଶେଷରେ ସର୍ଭିସ୍ ରୋଡ୍କୁ ଭୁଲରେ ଯାଇ ଗାଡ଼ିରେ ଧକ୍କା ହୋଇଯାଇଥିଲା । ଅଭିଯୁକ୍ତ ଦୀର୍ଘ ସମୟ ଧରି ଗଣମାଧ୍ୟମ ଆଗରେ ସେ ପ୍ରତିକ୍ରିୟା ରଖି ଏଭଳି ଭିନ୍ନ ଭିନ୍ନ କଥା କହିଥିଲେ। ସାଧାରଣତଃ କୌଣସି ଅଭିଯୁକ୍ତଙ୍କୁ ଗଣମାଧ୍ୟମରେ ପ୍ରତିକ୍ରିୟା ଦେବାକୁ ସୁଯୋଗ ଦେଉନଥିବା ପୁଲିସ୍ ଏଭଳି ସମ୍ବେଦନଶୀଳ ଘଟଣାରେ କିପରି ହାଲୁକା ହୋଇଗଲା ତାକୁ ନେଇ ଚର୍ଚ୍ଚା ଜୋର୍ ଧରିଛି ।
