ଭୁବନେଶ୍ବର ୨୧/୧: ରାଜ୍ୟରେ ସୁରୁଖୁରୁରେ ଚାଲିଛି ଧାନ କିଣା । କଟ୍ନିଛଟ୍ନି ହେଉନି । କାଁ ଭାଁ ଯଦି କେଉଁଠି କିଛି ସମସ୍ୟା ହେଉଛି ତାକୁ ସମାଧାନ କରାଯାଉଥିବା କହିଛନ୍ତି ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର । ବର୍ତ୍ତମାନ ସୁଦ୍ଧା ଆମର ୭୨୦୮ କୋଟି ଟଙ୍କା ଚାଷୀଙ୍କୁ ଦିଆଯାଇଛି । ୩୪ ଲକ୍ଷ ୨୯ ହଜାର ମେଟ୍ରିକ ଟନ ଧାନ ବର୍ତ୍ତମାନ ସୁଦ୍ଧା ସରକାର କିଣି ସାରିଛନ୍ତି । ଯେଉଁଠି କଟ୍ନି ଛଟ୍ନି ଅଭିଯୋଗ ଆସୁଛି ସେଠି ତୁରନ୍ତ ଆକ୍ସନ ନିଆଯାଉଛି । ଯେଉଁମାନେ କରୁଛନ୍ତି ତାଙ୍କୁ ସସପେଣ୍ଡ କରିବାକୁ ମୁଁ କଡ଼ା ନିର୍ଦ୍ଦେଶ ଦେଇଛି ।
ବର୍ଷା କାରଣରୁ କିଛି ସ୍ଥାନରେ ଧାନ ଡିସକଲର ହୋଇଯାଇଛି । କ୍ଷତିପୂରଣ ପାଇଥିବା ଚାଷୀ ସେହି ଧାନକୁ ମଣ୍ଡିକୁ ନେଇ ଆସୁଥିବାରୁ ସମସ୍ୟା ହେଉଛି । ଖରାପ ଧାନ ମଣ୍ଡିକୁ ନଆଣିବାକୁ ଚାଷୀଙ୍କୁ ନିବେଦନ କରିଛନ୍ତି ଯୋଗାଣ ମନ୍ତ୍ରୀ ।
କିଛି ଦିନ ହେଲାଣି ରାଜ୍ୟର ବିଭିନ୍ନ ସ୍ଥାନରୁ ମଣ୍ଡି ଅବ୍ୟବସ୍ଥାର ଚିତ୍ର ସାମ୍ନାକୁ ଆସୁଛି । କେଉଁଠି ଖରାପ ଧାନ କହି ମିଲର ନେଉନାହାନ୍ତି ତ ଆଉ କେଉଁଠି କଟ୍ନି ଛଟ୍ନିର ଅଭିଯୋଗ ଆଣୁଛନ୍ତି ଚାଷୀ । ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଚଢାଉ ହେଉଥିଲେ ମଧ୍ୟ କିଛି ଦଲାଲ ଗଳାବାଟରେ କାରବାର ଚଳାଇଛନ୍ତି ।
