ନୂଆଦିଲ୍ଲୀ: ମୁମ୍ୱାଇର ପ୍ରସିଦ୍ଧ ସିଦ୍ଧିବିନାୟକ ଗଣପତି ମନ୍ଦିର ପୁଣି ଥରେ ରେକର୍ଡ ଆୟ କରିଛି । ଆର୍ଥିକ ବର୍ଷ ୨୦୨୪-୨୫ରେ ମନ୍ଦିରର ମୋଟ ଆୟ ୧୩୩ କୋଟି ଟଙ୍କା ହୋଇଛି । ମନ୍ଦିର ଟ୍ରଷ୍ଟି ଏହି ସୂଚନା ଦେଇଛନ୍ତି । ଏହି ଆୟ ପୂର୍ବ ଆର୍ଥିକ ବର୍ଷ ତୁଳନାରେ ୧୬ ପ୍ରତିଶତ ଅଧିକ ।
ମନ୍ଦିରର ଆୟରେ ସବୁଠୁ ବଡ଼ ଯୋଗଦାନ ଶ୍ରଦ୍ଧାଳୁଙ୍କ ଦ୍ୱାରା ଦିଆଯାଇଥିବା ଦାନ । ଏହା ବ୍ୟତୀତ ପୂଜା ଓ ଅନ୍ୟ ଧାର୍ମିକ ଅନୁଷ୍ଠାନରୁ ୨୦ କୋଟି ଟଙ୍କା ଆୟ ହୋଇଛି । ମନ୍ଦିରକୁ ବିଭିନ୍ନ ସ୍ରୋତରୁ ଆୟ ମିଳିଛି । ଏଥିରେ ଦାନ ପାତ୍ର, ଅନଲାଇନ୍ ପୈଠ, ଧାର୍ମିକ ଅନୁଷ୍ଠାନ, ପ୍ରସାଦ ବିକ୍ରି ଓ ସୁନା-ରୁପା ନିଲାମୀ ସାମିଲ ରହିଛି । ଟ୍ରଷ୍ଟର ଜଣେ ଅଧିକାରୀଙ୍କ ଅନୁସାରେ ଗତ ବର୍ଷ ତୁଳନାରେ ପ୍ରସାଦରେ ବ୍ୟବହୃତ ଲଡ଼ୁ ଓ ନଡିଆ ବିକ୍ରିରେ ୩୨ ପ୍ରତିଶତ ବୃଦ୍ଧି ହୋଇଛି । ମନ୍ଦିର ପ୍ରଶାସନ ପ୍ରତିଦିନ ପ୍ରାୟ ୧୦ ହଜାର ଲଡୁ ଭକ୍ତଙ୍କୁ ବିତରଣ କରିଛି ।
ଟ୍ରଷ୍ଟ ଅନୁସାରେ, ଚଳିତ ବର୍ଷ ଗୁଡ଼ି ପରବ ଅବସରରେ ସୁନା-ରୁପା ନିଲାମୀରୁ ରେକର୍ଡ ୧.୩୦ କୋଟି ଟଙ୍କା ଆୟ ହୋଇଛି । ଗତ ବର୍ଷ ୭୫ ଲକ୍ଷ ଟଙ୍କାର ନିଲାମୀ ହୋଇଥିଲା । ଶ୍ରୀ ସିଦ୍ଧିବିନାୟକ ଗଣପତି ମନ୍ଦିର ଟ୍ରଷ୍ଟର ମୁଖ୍ୟ କାର୍ଯ୍ୟକାରୀ ଅଧିକାରୀ ବୀଣା ପାଟିଲ କହିଛନ୍ତି ଯେ ଚଳିତ ଆର୍ଥିକ ବର୍ଷ (୨୦୨୫-୨୬)ରେ ମନ୍ଦିରର ମୋଟ ଆୟ ୧୫୪ କୋଟି ଟଙ୍କା ଯାଏ ପହଞ୍ଚିପାରେ ।
ମନ୍ଦିର ଟ୍ରଷ୍ଟ ନିଜ ଆୟର ୨୦ ପ୍ରତିଶତ ସାମାଜିକ କଲ୍ୟାଣ କାର୍ଯ୍ୟରେ ଖର୍ଚ୍ଚ କରୁଛି । ଏଥିରେ ମେଡିକାଲ୍ ସହାୟତା, ଡାୟଲିସିସ୍ ସେଣ୍ଟର ପରିଚାଳନା ସାମିଲ ରହିଛି । ଏହା ବ୍ୟତୀତ ଗୁରୁତର ରୋଗରେ ପୀଡ଼ିତ ରୋଗୀଙ୍କୁ ଆର୍ଥିକ ସହାୟତା ପରି ସୁବିଧା ପ୍ରଦାନ ରହିଛି । ଏହା ବ୍ୟତୀତ ଟ୍ରଷ୍ଟ କଲେଜର ଛାତ୍ରଙ୍କ ପାଇଁ ବୁକ୍ ବ୍ୟାଙ୍କ ସୁବିଧା ପ୍ରଦାନ କରୁଛି । ଏହାସହ ଆତ୍ମହତ୍ୟା କରିଥିବା ଚାଷୀଙ୍କ ପିଲାଙ୍କ ଶିକ୍ଷା ଖର୍ଚ୍ଚ ମଧ୍ୟ ଟ୍ରଷ୍ଟ ବହନ କରୁଛି । ବୀଣା ପାଟିଲ କହିଛନ୍ତି, ଭକ୍ତଙ୍କ ଦ୍ୱାରା କରାଯାଇଥିବା ଦାନ ସମାଜ କଲ୍ୟାଣରେ ଉପଯୋଗୀ ହେବ, ତାହା ସୁନିଶ୍ଚିତ କରାଯାଉଛି ।
