ନୂଆଦିଲ୍ଲୀ: ସିକନ୍ଦରଙ୍କ ମହାନ ଦେଶ ଗ୍ରୀସ। ଚାରିଆଡେ ବିସ୍ତୀର୍ଣ୍ଣ ଜଳରାଶି ସାଙ୍ଗକୁ ମନଲୋଭା ପରିବେଶ। ଏଠାରେ ଥିବା ସାଣ୍ଟୋରିନ୍ ଦ୍ୱୀପ ଯେତିକି ସୌନ୍ଦର୍ଯ୍ୟପୂର୍ଣ୍ଣ ସେତିକି ମନ୍ତ୍ରମୁଗ୍ଧକର। ନିଜର ସମୟକୁ ବିତାଇବା ପାଇଁ ସୁନ୍ଦର ପର୍ଯ୍ୟଟନସ୍ଥଳ। ଭାରତୀୟ ଫିଲ୍ମର ଅନେକ ଗୀତ ଓ ସିନ୍ ଏଠାରେ ସୁଟିଂ କରାଯାଇଛି। ଫିଲ୍ମ 'ବାଙ୍ଗ-ବାଙ୍ଗ'ର' ମେହେରବାନ୍ 'ଗୀତ ଏହି ଦ୍ୱୀପରେ ସୁଟିଂ କରାଯାଇଛି। କିନ୍ତୁ ବିଶ୍ୱର ଅନ୍ୟତମ ଏହି ସୁନ୍ଦର ଦ୍ୱୀପ ଅନେକ ବିପର୍ଯ୍ୟୟର ସମ୍ମୁଖୀନ ହେବାକୁ ଯାଉଛି। ୩ ଦିନ ଧରି ଭୂକମ୍ପ। ୨୦୦ ଥର ଥରିଲାଣି ମାଟି। ଶୁକ୍ରବାର ଠାରୁ ରବିବାର ପର୍ଯ୍ୟନ୍ତ ଗ୍ରୀସର ସାଣ୍ଟୋରିନ୍ ଦ୍ୱୀପରେ ୨୦୦ରୁ ଅଧିକ ଭୂକମ୍ପ ଅନୁଭୂତ ହୋଇଛି।
ଏହି ଭୂକମ୍ପରେ ସର୍ବାଧିକ ତୀବ୍ରତା 4.6 ପର୍ଯ୍ୟନ୍ତ ମାପ କରାଯାଇଛି। ଏହାକୁ ନେଇ ଚେତାଇ ଦେଇଛନ୍ତି ଗବେଷକ। ଗ୍ରୀସର ଏହି ଦ୍ୱୀପରେ ଲଗାତାର ଭୂକମ୍ପ ଯୋଗୁଁ ଲୋକମାନେ ଅନେକ ଆହ୍ୱାନର ସମ୍ମୁଖୀନ ହେଉଛନ୍ତି। ପ୍ରାକୃତିକ ବିପର୍ଯ୍ୟୟ ହେତୁ ଆତଙ୍କିତ ଅବସ୍ଥାରେ ଅଛନ୍ତି। ସତର୍କତା ପଦକ୍ଷେପ ମୂଳକ ଆଣ୍ଟାଲିଆ ଓ ଏହାର ନିକଟସ୍ଥ ଆମୋରଗୋସ୍ ଏବଂ ଆନାଫି ଦ୍ୱୀପପୁଞ୍ଜରେ ସ୍କୁଲ ବନ୍ଦ ରହିଛି। ବିଶେଷଜ୍ଞଙ୍କ ଚେତାବନୀ ଲଗାତାର ତିନି ଦିନ ଧରି ଆସୁଥିବା ଭୂକମ୍ପ କିଛି ବଡ ବିପର୍ଯ୍ୟୟକୁ ସୂଚାଉଛି।
ଭୂକମ୍ପକୁ ଦୃଷ୍ଟିରେ ରଖି ଜଳବାୟୁ ସଙ୍କଟ ଏବଂ ନାଗରିକ ସୁରକ୍ଷା ମନ୍ତ୍ରଣାଳୟର ବିଶେଷଜ୍ଞ ଦେଶର ସମସ୍ତ ପ୍ରଭାବିତ ଅଞ୍ଚଳର ଲୋକଙ୍କୁ ଆଲର୍ଟ କରାଇଛନ୍ତି। ବଡ଼ ଇନଡୋର ସମାବେଶରୁ ଦୂରେଇ ରହିବାକୁ କୁହାଯାଇଛି। ରାଜଧାନୀର ତଳିଆ ଅଞ୍ଚଳରେ ଥିବା ଫିରା ବନ୍ଦର ସମେତ ଅନେକ ବନ୍ଦରଠାରୁ ଦୂରରେ ରହିବାକୁ ପରାମର୍ଶ ଦେଇଛନ୍ତି। ହୋଟେଲ ମାଲିକମାନଙ୍କୁ ସେମାନଙ୍କ ସୁଇମିଂ ପୁଲକୁ ସ୍ଥାନାନ୍ତର କରିବାକୁ ପରାମର୍ଶ ଦେଇଛନ୍ତି, କାରଣ ଭୂକମ୍ପ ସମୟରେ ବହୁ ପରିମାଣର ଜଳ କୋଠାକୁ ପ୍ରଭାବିତ କରିପାରେ।
ସର୍ଦ୍ଦାର ଦ୍ୱୀପରେ ଏକାଧିକ କମ୍ପନ ଏହା ପ୍ରଥମ ଘଟଣା ନୁହେଁ। ଏହାପୂର୍ବରୁ ସାଣ୍ଟୋରିନ ଦ୍ୱୀପରେ ଭୂକମ୍ପ ଅନୁଭୂତ ହୋଇଥିଲା। ଏତେ ଭିତରେ ବି ଏହି ଦ୍ୱୀପରେ ପର୍ଯ୍ୟଟକଙ୍କ ସଂଖ୍ୟା ପ୍ରଭାବିତ ହୁଏ ନାହିଁ। ଏହି ଦ୍ୱୀପରେ ୨୦ ହଜାରରୁ ଅଧିକ ଲୋକ ବାସ କରନ୍ତି। ପ୍ରତିବର୍ଷ ୩୪ ଲକ୍ଷରୁ ଅଧିକ ପର୍ଯ୍ୟଟକ ଦ୍ୱୀପରେ ପହଞ୍ଚନ୍ତି। ଏହି ଦ୍ୱୀପରେ ଛୁଟିଦିନ ବିତାଇବା ଓ ମନୋରଞ୍ଜନ ପାଇଁ ସର୍ବୋତ୍ତମ ସ୍ଥାନ ଭାବରେ ବିବେଚନା କରାଯାଏ।
ଏହି ପରିସ୍ଥିତି ଯୋଗୁଁ ଦେଶର ଜରୁରୀକାଳୀନ କମିଟି ପକ୍ଷରୁ ଉଚ୍ଚସ୍ତରୀୟ ବୈଠକ ହୋଇଥିଲା। ଆଣ୍ଟାଲିଆ ହେଲେନିକ୍ ଆଗ୍ନେୟଗିରି ଆର୍କର ଏକ ଅଂଶ, ୟୁରୋପର ଅନ୍ୟତମ ସକ୍ରିୟ ଆଗ୍ନେୟଗିରି ଅଞ୍ଚଳ। ଅଧିକାରୀ କହିଛନ୍ତି ଯେ ଟେକ୍ଟୋନିକ୍ କାର୍ଯ୍ୟକଳାପ ଯୋଗୁଁ ୨୦୦ରୁ ଅଧିକ ଭୂକମ୍ପ ଅନୁଭୂତ ହୋଇଛି। ସାଣ୍ଟୋରିନ୍ ଦ୍ୱୀପରେ ସବୁଠାରୁ ଶକ୍ତିଶାଳୀ ଭୂକମ୍ପ 1956 ମସିହାରେ ଅନୁଭୂତ ହୋଇଥିଲା। ଯାହାର ରିକ୍ଟର ସ୍କେଲରେ ତ୍ରୀବ୍ରତା ଥିଲା ୭.୫। ଏହି ଭୂକମ୍ପରେ ୫୩ ଜଣଙ୍କର ମୃତ୍ୟୁ ଘଟିଥିବା ବେଳେ ୧୦୦ରୁ ଅଧିକ ଲୋକ ଆହତ ହୋଇଥିଲେ। ସବୁଠୁ ବଡ଼ କଥା ହେଲା- ଏହି ବିପର୍ଯ୍ୟୟରେ ଏକ ତୃତୀୟାଂଶ ଘର ଭୁଶୁଡି ପଡିଥିଲା। ତେବେ ବର୍ତ୍ତମାନର ଭୂକମ୍ପ ଉପରେ ନଜର ରଖାଯାଇଛି, ଲୋକଙ୍କ ସୁରକ୍ଷା ସବୁଠୁ ଗୁରୁତ୍ୱପୂର୍ଣ୍ଣ ବୋଲି କହିଛନ୍ତି ଗ୍ରୀସ ସରକାର।
