ନୂଆଦିଲ୍ଲୀ: ଦେଶର ୬୦୦ରୁ ଅଧିକ ଘରୋଇ ହସ୍ପିଟାଲ୍ ଆୟୁଷ୍ମାନ ଭାରତ ଯୋଜନାରୁ ଓହରି ଯାଇଛନ୍ତି । ସଂସଦରେ ଖୋଦ୍ କେନ୍ଦ୍ର ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ଏହା କହିଛନ୍ତି । ୨୦୧୮ ମସିହାରେ ଆୟୁଷ୍ମାନ ଭାରତ-ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନା (AB-PMJAY) ଆରମ୍ଭ ହୋଇଥିଲା । ଏହା ପରଠାରୁ ବିଭିନ୍ନ କାରଣ ଯୋଗୁଁ ୬୦୦ରୁ ଅଧିକ ଘରୋଇ ହସ୍ପିଟାଲ୍ ସ୍ୱେଚ୍ଛାକୃତ ଭାବରେ ଏହି ଯୋଜନାରୁ ଓହରିଛନ୍ତି । ଏହି କାରଣଗୁଡ଼ିକ ମଧ୍ୟରେ ବିଳମ୍ବରେ ଦେୟ ପୈଠ ଏବଂ ପରିଶୋଧ ହାର କମ ସାମିଲ ରହିଛି ।

ଗୁଜରାଟରେ ସବୁଠୁ ଅଧିକ ୨୩୩ ହସ୍ପିଟାଲ ଯୋଜନାରୁ ସ୍ୱେଚ୍ଛାକୃତ ଭାବେ ବାହାରି ଯାଇଛନ୍ତି । ଏହାପରେ କେରଳ ୧୪୬ ଏବଂ ମହାରାଷ୍ଟ୍ର ୮୩ଟି ହସ୍ପିଟାଲ୍ ଯୋଜନାରୁ ବାହାରି ଯାଇଛନ୍ତି । ରାଜ୍ୟସଭାରେ କେନ୍ଦ୍ର ସ୍ୱାସ୍ଥ୍ୟ ରାଷ୍ଟ୍ରମନ୍ତ୍ରୀ ପ୍ରତାପରାଓ ଯାଧବଙ୍କ ଦ୍ୱାରା ଦିଆଯାଇଥିବା ତଥ୍ୟ ଅନୁଯାୟୀ, ଯୋଜନା ଆରମ୍ଭ ହେବା ପରଠାରୁ ମୋଟ ୬୦୯ଟି ଘରୋଇ ହସ୍ପିଟାଲ ଏହି ଯୋଜନାରୁ ଓହରି ଯାଇଛନ୍ତି ।

ଆୟୁଷ୍ମାନ ଭାରତ- ପ୍ରଧାନମନ୍ତ୍ରୀ ଜନଆରୋଗ୍ୟ ଯୋଜନା ହେଉଛି ବିଶ୍ୱସ୍ତରରେ ସର୍ବବୃହତ ସରକାରୀ ସମର୍ଥିତ ବୀମା ଯୋଜନା ମଧ୍ୟରୁ ଗୋଟିଏ । ଏଥିରେ ପ୍ରତି ପରିବାରକୁ ୫ ଲକ୍ଷ ଟଙ୍କାର ସ୍ୱାସ୍ଥ୍ୟ ବିମାନ ପ୍ରଦାନ କରାଯାଏ । ବର୍ତ୍ତମାନ ସମୟରେ ଏହି ଯୋଜନା ସହ ୩୧,୮୦୫ ହସ୍ପିଟାଲ ଅନୁବନ୍ଧିତ ଅଛନ୍ତି । ଏଥି ମଧ୍ୟରୁ ୧୪,୩୯୪ଟି ଘରୋଇ ହସ୍ପିଟାଲ୍ ଅଛନ୍ତି ।

୨୦୧୮ ଅକ୍ଟୋବରରେ ଆରମ୍ଭ ହୋଇଥିବା ଏହି ଯୋଜନାରେ ପ୍ରଥମେ ୧୦୭.୪ ନିୟୁତ ଗରିବ ଏବଂ ଅତି ଗରିବ ପରିବାରକୁ କଭର୍ କରିଥିଲା । ଏହାପରେ ୨୦୨୨ ଜାନୁଆରୀରେ ଏହି ଯୋଜନାକୁ ଆହୁରି ବିସ୍ତାର କରାଯାଇଥିଲା । ଯୋଜନାରେ ୧୨୫ ନିୟୁତ ପରିବାର ବା ୫୫୦ ନିୟୁତ ଲୋକଙ୍କୁ ଅନ୍ତର୍ଭୂକ୍ତ କରାଯାଇଥିଲା । ୨୦୨୪ରେ ଏହି ଯୋଜାନାରେ ଆଶା ଓ ଅଙ୍ଗନବାଡ଼ି କର୍ମୀ ଓ ସେମାନଙ୍କ ପରିବାରକୁ ସାମିଲ କରାଯାଇଥିଲା । ଏହି ସଂଖ୍ୟା ପ୍ରାୟ ୩.୭ ନିୟୁତ ଥିଲା ।

ପରେ କେନ୍ଦ୍ର ସରକାର ୭୦ ବର୍ଷରୁ ଉର୍ଦ୍ଧ୍ୱ ବରିଷ୍ଠ ନାଗରିକଙ୍କୁ ଏହି ଯୋଜନା ଅଧିନରେ ମାଗଣା ଚିକିତ୍ସା ମିଳିବ ବୋଲି ଘୋଷଣା କରିଥିଲେ । ଏହି ଘୋଷଣା ଦ୍ୱାରା ୬୦ ନିୟୁତ ବୟସ୍କ ନାଗରିକ ଉପକୃତ ହେବେ ବୋଲି ସରକାର କହିଥିଲେ । ଓଡ଼ିଶା ଓ ଦିଲ୍ଲୀ ଏହି ଯୋଜନାରେ ସାମିଲ ହେବାକୁ ଯାଉଛନ୍ତି, ଯାହାପରେ ହିତାଧିକାରୀଙ୍କ ସଂଖ୍ୟା ଆହୁରି ଅଧିକ ହେବ । ଯୋଜନା କ୍ରିୟାନ୍ୱୟନରେ ଥିବା ବିଭିନ୍ନ ସମସ୍ୟାର ଦୂରୀକରଣ ଓ ଘରୋଇ ହସ୍ପିଟାଲଙ୍କ ଅଧିକ ଅଂଶଗ୍ରହଣ ପାଇଁ ଗତ ବର୍ଷ ମାର୍ଚ୍ଚରେ ନିତି ଆୟୋଗ ସଦସ୍ୟ ଭିକେ ପଲଙ୍କ ନେତୃତ୍ୱରେ ମନ୍ତ୍ରଣାଳୟ ଏକ କମିଟି ଗଠନ କରିଥିଲା ।