ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଚୀନ ରାଷ୍ଟ୍ରପତି ସି ଜିନ୍ପିଙ୍ଗ ବୁଧବାର ବ୍ରିକ୍ସ ଶିଖର ସମ୍ମିଳନୀ ବାହାରେ ଦ୍ୱିପାକ୍ଷିକ ବୈଠକ କରିବେ । ବୈଦେଶିକ ବ୍ୟାପାର ସଚିବ ବିକ୍ରମ ମିସ୍ରୀ ମଙ୍ଗଳବାର ଏହି ସୂଚନା ଦେଇଛନ୍ତି । ଦୁଇ ନେତାଙ୍କ ମଧ୍ୟରେ ସୀମା ବିବାଦ ପରେ ଏହା ପ୍ରଥମ ବୈଠକ ହେବ । ସାମ୍ୱାଦିକ ସମ୍ମିଳନୀରେ ମିସ୍ରୀ କହିଛନ୍ତି, 'ବ୍ରିକ୍ସ ସମ୍ମିଳନୀ ବାହାରେ ପ୍ରଧାନମନ୍ତ୍ରୀ ମୋଦୀ ଏବଂ ଚୀନ ରାଷ୍ଟ୍ରପତି ସି ଜିନ୍ପିଙ୍ଗ ମଧ୍ୟରେ ଦ୍ୱିପାକ୍ଷିକ ବୈଠକ ହେବ ବୋଲି ମୁଁ ସ୍ପଷ୍ଟ କରିପାରିବ । ତେବେ ଦ୍ୱିପାକ୍ଷିକ ବୈଠକର ସମୟ ବୁଧବାର ହିଁ ସ୍ଥିର ହେବ ।'
#WATCH | Kazan, Russia: "I can confirm that there will be a bilateral meeting held between Prime Minister Modi and Chinese President Xi Jinping tomorrow on the sidelines of the BRICS Summit." says Foreign Secretary Vikram Misri pic.twitter.com/588eOWgQJ4
— ANI (@ANI) October 22, 2024
ଭାରତ ଏବଂ ଚୀନ ମଧ୍ୟରେ ପୂର୍ବ ଲଦାଖରେ ଏଲ୍ଏସିରେ ସଂଘର୍ଷ ଆରମ୍ଭ ହେବା ପରଠୁ ଏହା ଦୁଇ ନେତାଙ୍କ ପ୍ରଥମ ବୈଠକ ହେବ । ତେବେ ଗୋଟିଏ ଦିନ ପୂର୍ବରୁ ଏଲ୍ଏସିରେ ପାଟ୍ରୋଲିଂକୁ ନେଇ ଦୁଇ ମଧ୍ୟରେ ସହମତି ପ୍ରକାଶ ପାଇଥିଲା । ଦୁଇ ଦେଶ ମଧ୍ୟରେ ଚାରି ବର୍ଷ ଧରି ଚାଲିଥିବା ସୈନ୍ୟ ଗତିରୋଧକୁ ଶେଷ କରିବା ଦିଗରେ ଏହା ଏକ ବଡ଼ ସଫଳତା ବୋଲି କୁହାଯାଉଛି ।
ବୈଦେଶିକ ବ୍ୟାପାର ସଚିବ ମଙ୍ଗଳବାର କହିଥିଲେ ଯେ ଭାରତ ଏବଂ ଚୀନ ଡେମଚୋକ୍ ଏବଂ ଡେପସାଙ୍ଗରେ ନିଜ ସେନାକୁ ଅପସାରଣ ଏବଂ ଅଞ୍ଚଳରେ ପୂର୍ବପରି ପାଟ୍ରୋଲିଂ ଆରମ୍ଭ କରିବା ଉପରେ ସହମତି ହୋଇଛି । ଏହାପରେ ଚୀନ ମଙ୍ଗଳବାର କହିଥିଲା ଯେ ଭାରତ ସହ ସୈନ୍ୟ ବୁଝାମଣା ହୋଇଛି । ଚୀନ ବିଦେଶ ମନ୍ତ୍ରଣାଳୟ ମୁଖପାତ୍ର କହିଥିଲେ,'ମାମଲା ଏକ ପ୍ରସ୍ତାବରେ ପହଞ୍ଚିଛି ଏବଂ ଏହି ପ୍ରସ୍ତାବକୁ କାର୍ଯ୍ୟକାରୀ କରିବା ପାଇଁ ଆମେ ନୂଆଦିଲ୍ଲୀ ସହ ମିଶି କାମ କରିବୁ ।'