ପୁରୀ ୧୧/୦୧: ମକରସଂକ୍ରାନ୍ତି ସହ ଅନ୍ୟ ଗୁରୁତ୍ୱପୂର୍ଣ୍ଣ ନୀତିକାନ୍ତିକୁ ଦୃଷ୍ଟିରେ ରଖି ଆସନ୍ତା ୧୨ ତାରିଖରୁ ୧୫ ତାରିଖ ପର୍ଯ୍ୟନ୍ତ ୪ଦିନ ଧରି ରତ୍ନଭଣ୍ଡାର ମରାମତି କାମ ସ୍ଥଗିତ ରଖାଯାଇଛି । ଏନେଇ ଶୁକ୍ରବାର ସୂଚନା ଦେଇଛି ଶ୍ରୀମନ୍ଦିର କାର୍ଯ୍ୟାଳୟ । ଆସନ୍ତା ୧୬ ତାରିଖରୁ ପୁଣିଥରେ ରାଜ୍ୟ ସରକାରଙ୍କ ଅନୁମୋଦିତ ମାର୍ଗଦର୍ଶିକା ଏବଂ ଶ୍ରୀମନ୍ଦିର ପ୍ରଶାସନ ବ୍ୟବସ୍ଥା ଅନୁସାରେ ରତ୍ନଭଣ୍ଡାର ମରାମତି ଆରମ୍ଭ ହେବ ।
ଏଥିପାଇଁ ସମସ୍ତଙ୍କ ସହଯୋଗ କାମନା କରିଛନ୍ତି ଶ୍ରୀମନ୍ଦିର ମୁଖ୍ୟ ପ୍ରଶାସକ । ଗତ ମାସ ୧୭ ତାରିଖରୁ ରତ୍ନଭଣ୍ଡାର ମରାମତି କାମ ଆରମ୍ଭ ହୋଇଛି । ପହଲି ଭୋଗ ନୀତି ଚାଲିଥିବାରୁ ପ୍ରତିଦିନ ରାତି ୨ଟାରୁ ଶ୍ରୀମନ୍ଦିର ଦ୍ୱାର ଖୋଲି ଦ୍ୱିତୀୟ ଭୋଗମଣ୍ଡପ ଦିନ ସାଢ଼େ ୧୨ଟା ସୁଦ୍ଧା ସାରିବାକୁ ଶ୍ରୀମନ୍ଦିର କାର୍ଯ୍ୟାଳୟ ପ୍ରସ୍ତୁତି କରିଥିଲା । ହେଲେ ନିର୍ଦ୍ଧାରିତ ସମୟରେ ନା ନୀତିକ୍ରାନ୍ତି ଆରମ୍ଭ ହୋଇପାରୁଛି ନା ସରିପାରୁଛି ।
ତେଣୁ ଦୈନିକ ଦିନ ସାଢ଼େ ୧୨ଟାଠାରୁ ସନ୍ଧ୍ୟା ପ୍ରାୟ ସାଢ଼େ ୫ଟା ପର୍ଯ୍ୟନ୍ତ ଏଏସ୍ଆଇକୁ ରତ୍ନଭଣ୍ଡାର ମରାମତି ନିମନ୍ତେ ସମୟ ଦେବାକୁ ହୋଇଥିବା ନିଷ୍ପତ୍ତି ଠିକ୍ ଭାବେ କାର୍ଯ୍ୟକାରୀ ହୋଇପାରୁନି । ପ୍ରତ୍ୟେକ ଦିନ ପ୍ରାୟ ଘଣ୍ଟାଏରୁ ୨ ଘଣ୍ଟା ସମୟ ମିଳୁଥିବାରୁ ଏଏସ୍ଆଇର ଶ୍ରମିକମାନେ ପର୍ଯ୍ୟାପ୍ତ ସମୟ ମରାମତି ଓ ସଂରକ୍ଷଣ ନିମନ୍ତେ ପାଉନାହାନ୍ତି । ନୂଆବର୍ଷ ପୂର୍ବରୁ ମଧ୍ୟ ଶ୍ରଦ୍ଧାଳୁଙ୍କ ଭିଡ଼କୁ ଦୃଷ୍ଟିରେ ରଖି ରତ୍ନଭଣ୍ଡାର କାମକୁ ୮ ଦିନ ନିମନ୍ତେ ବନ୍ଦ କରାଯାଇଥିଲା ।
ଏଏସ୍ଆଇର ଜଣେ ଅଧିକାରୀଙ୍କ ସୂଚନା ମୁତାବକ, ଭିତର ଓ ବାହାର ରତ୍ନଭଣ୍ଡାର (ଉଭୟର ଭିତର ପାଶ୍ୱର୍) ପୂର୍ବ, ପଶ୍ଚିମ, ଉତ୍ତର, ଦକ୍ଷିଣ ଓ ଉପର ଆଡୁ ଚୁନ ଛଡ଼ା କାମ ସରିଛି । ଏବେ ଭିତର ରତ୍ନଭଣ୍ଡାର ଭିତର ପାଶ୍ୱର୍ରେ ଖରାପ ହୋଇଯାଇଥିବା ପଥରଗୁଡ଼ିକ କାଢ଼ି ନୂଆ ପଥର ଲଗାଯାଉଛି । ପଥର-ପଥର ଭିତରେ ଥିବା ଜଏଣ୍ଟ ସିଲିଂ (ଯୋଡ଼େଇ ପ୍ଲାଷ୍ଟର)କୁ ପରିଷ୍କାର କରାଯାଇ ନୂଆ ଜଏଣ୍ଟ ସିଲିଂ କରାଯାଉଛି ।
ଏହି ଦୁଇ କାମ ସରିବା ପରେ କେମିକାଲ ଟିମ୍ କେମିକାଲ ପ୍ରଲେପ ଦେବା କାମ କରିବ । ପରେ ଚଟାଣରେ ରହିଥିବା ପ୍ଲାଷ୍ଟରକୁ ଛଡ଼ାଇ ଗ୍ରାନାଇଟ୍ ପଥର ପକାଯିବ । ଭିତର ଭଣ୍ଡାର ଦକ୍ଷିଣ ପାଶ୍ୱର୍ର ଗ୍ରିଲ ଉପରେ ରହିଥିବା ବିମ୍କୁ ବଦାଇ ଦିଆଯିବ । ଏହି ବିମ୍ ପୁରୁଣା ପିଟା ଲୁହାରେ ପ୍ରସ୍ତୁତ ହୋଇଥିବାରୁ ପାଣି ଲିକ୍ ଯୋଗୁଁ କଳଙ୍କି ଖାଇ ଫୁଲିଯାଇଛି ଓ ପଥରକୁ ମଧ୍ୟ ଫଟାଇ ଦେଇଛି । ତେଣୁ ବିମ୍କୁ ବଦାଇବା ସହ ଠଣା(ପକେଟ)କୁ ମରାମତି କରାଯିବ ।
ମରାମତି ସମୟରେ ଅନୁସଙ୍ଗିକ ସହଯୋଗ ଶ୍ରୀମନ୍ଦିର ପ୍ରଶାସନ ଯୋଗାଇ ଦେଇଛି । ରତ୍ନଭଣ୍ଡାର ଭିତରେ ବିଦ୍ୟୁତ୍ ଆଲୋକ ବ୍ୟବସ୍ଥା କରାଯାଇଛି । କାମରେ ନିୟୋଜିତ ଶ୍ରମିକମାନଙ୍କୁ ସ୍ୱତନ୍ତ୍ର ପରିଚୟପତ୍ର ଯୋଗାଇ ଦିଆଯାଇଛି । ପ୍ରତିଦିନ ଦିଆଯାଉଥିବା ସମୟ ଓ ସୁବିଧା ଅନୁଯାୟୀ ରତ୍ନଭଣ୍ଡାର ଭିତରେ ମରାମତି କାମ ହେଉଛି ।
ରତ୍ନଭଣ୍ଡାର ଭିତର ପାଶ୍ୱର୍ ମରାମତି ଓ ସଂରକ୍ଷଣ ସରିବା ପରେ ଏହାର ବାହାର ପାଶ୍ୱର୍ ଚୂଡ଼ା ଛଡ଼ା ଯାଇ ମରାମତି ଓ ସଂରକ୍ଷଣ କାମ କରାଯିବ । ଜିପିଆର ସର୍ଭେ ଓ ଲେଜର ସ୍କାନିଂ ରିପୋର୍ଟକୁ ଆଧାର କରି ଏହି ମରାମତି ହେଉଛି ବୋଲି ସୂଚନାରୁ ଜଣାପଡ଼ିଛି ।
