ନୂଆଦିଲ୍ଲୀ ୧୧/୦୧: ବିଜେପିରେ ମିଶିବା ପରେ ପୂର୍ବତନ ରାଜ୍ୟପାଳ ରଘୁବର ଦାସ ଙ୍କ ବଡ ବୟାନ । ରାଜ୍ୟପାଳ ପଦବୀକୁ ଲାଟ୍ ସାହାବ ପଦ ବୋଲି ସମସ୍ତେ ଭାବିଥାନ୍ତି। କିନ୍ତୁ ପ୍ରଭୁ ଶ୍ରୀ ଜଗନ୍ନାଥଙ୍କ ଭୂମି ଓଡ଼ିଶାରେ ମୁଁ ଏହି ଚିନ୍ତାଧାରାକୁ ଭାଙ୍ଗିଲି। ୩ ମାସରେ ୩୦ ଜିଲ୍ଲା ବୁଲି ଲୋକଙ୍କ ସମସ୍ୟା ବୁଝିଲି। ରାଜ୍ୟପାଳ ଲାଟ ସାହାବ ନୁହଁନ୍ତି, ରାଜ୍ୟପାଳ ହେଉଛନ୍ତି ଲୋକଙ୍କ ରାଜ୍ୟପାଳ।
ସୂଚନା ଥାଉକି, ଓଡ଼ିଶା ରାଜ୍ୟପାଳ ପଦରୁ ଅବ୍ୟାହତି ପରେ ଶୁକ୍ରବାର ବିଧିବଦ୍ଧ ଭାବେ ପୁଣି ବିଜେପିରେ ସାମିଲ ହୋଇଥିଲେ ରଘୁବର ଦାସ । ଆଉ ବିଜେପିରେ ମିଶିବା ପରେ ରଘୁବର କହିଛନ୍ତି ୧୪ ମାସ ପାଇଁ ମହାପ୍ରଭୁ ଜଗନ୍ନାଥଙ୍କ ପବିତ୍ର ଭୂମିରେ ସେବା କରିବା ପାଇଁ ସୁଯୋଗ ମିଳିଥିଲା । ରାଜ୍ୟପାଳ ପଦବୀକୁ ଯେଉଁ ଲାଟ୍ ସାହେବ ପଦବୀ ବୋଲି କୁହାଯାଏ ତାକୁ ମୁଁ ପରିବର୍ତ୍ତନ କରିଛି। ରାଜ୍ୟପାଳ ଲାଟ୍ ସାହେବ ନୁହଁନ୍ତି, ସେ ହେଉଛନ୍ତି ଲୋକଙ୍କ ରାଜ୍ୟପାଳ।
ରାଜ୍ୟରେ ୩ ମାସରେ ୩୦ ଜିଲ୍ଲା ବୁଲି ଲୋକଙ୍କ ସମସ୍ୟା ବୁଝିଲି ବୋଲି କହିଛନ୍ତି ରଘୁବର ଦାସ। ଏହାଛଡ଼ା କେନ୍ଦ୍ର ସରକାରଙ୍କ ଯୋଜନା କେମିତି ଲୋକଙ୍କ ପାଖରେ ପହଞ୍ଚିବ ସେନେଇ ଉଦ୍ୟମ କରିଛି। ଏହାଛଡ଼ା ଯେଉଁଠି ଯୋଜନା ପହଞ୍ଚି ପାରୁନି ସେଠାରେ ଜିଲ୍ଲାପାଳ ମାନଙ୍କୁ କହି ସମାଧାନ ପାଇଁ ଉଦ୍ୟମ କରିଛି। ସେହିପରି ସମ୍ବିଧାନର ପରିଧି ଭିତରେ ରହି କେନ୍ଦ୍ର ଓ ରାଜ୍ୟ ମଧ୍ୟରେ ସମନ୍ୱୟ ରଖିଛି। ସମସ୍ୟାକୁ ଉଭୟଙ୍କୁ ଅବଗତ କରାଇଥିବା କହିଛନ୍ତି ରଘୁବର।
