ନୂଆଦିଲ୍ଲୀ ୧୧।୦୧: ଏଣିକି ଲଦାଖବାସୀ ହେବେ ଉପକୃତ । ଆଉ ଯାତାୟତରେ ହେବନି ଅସୁବିଧା । ଲଦାଖକୁ ସବୁ ରୁତୁରେ ଯିବା ଆସିବା କରିବେ ଲୋକେ । ଖାସ୍‌ କରି ଉପକୃତ ହେବେ ଭାରତୀୟ ସେନା । ଜମ୍ମୁ-କାଶ୍ମୀରରେ ଜେଡ-ମୋଡ ସୁଡଙ୍ଗର ହେବ ଉଦଘାଟନ । ଏହାକୁ ଉଦଘାଟନ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ସୁଡଙ୍ଗ ସୋନମାର୍ଗ ଘାଟିକୁ ସବୁ ରୁତୁରେ ଯୋଡିବ । 

ବର୍ତ୍ତମାନ ଗଗନଗିରି-ସୋନମାର୍ଗ ରାସ୍ତାରେ ତୁଷାରପାତ ଏବଂ ହିମସ୍ଖଳନ ଯୋଗୁଁ ଅନେକ ମାସ ଧରି ରାସ୍ତା ବନ୍ଦ ରହୁଛି । ଏହାର ବିକଳ୍ପ ସାଜିବ Z-ମୋଡ ସୁଡ଼ଙ୍ଗ । ସୁଡଙ୍ଗଟି ଜୋଜିଲା ସୁଡଙ୍ଗ ପରିଯୋଜନାର ଅଂଶ । ଏହାର ମୁଖ୍ୟ ଉଦ୍ଦେଶ୍ୟ ଲଦାଖକୁ ସବୁ ରୁତୁରେ ଯୋଡିବା । ସୁଡ଼ଙ୍ଗଟି ଜମ୍ମୁ-କାଶ୍ମୀରର ଗାନ୍ଦରବଲ ଜିଲ୍ଲାରେ ଅବସ୍ଥିତ । ଏହା ଶ୍ରୀନଗର-ଲେହ ରାଜପଥରେ ଅବସ୍ଥିତ । ଯାହା ଭୂ-ରଣନୈତିକ ଦୃଷ୍ଟିକୋଣରୁ ମଧ୍ୟ ବହୁତ ଗୁରୁତ୍ୱପୂର୍ଣ୍ଣ।

୧୩ ଜାନୁଆରୀରେ ଶ୍ରୀନଗର-ସୋନମର୍ଗ ରାସ୍ତାରେ ଏହି ସୁଡଙ୍ଗର ଉଦଘାଟନ କରିବେ ପ୍ରଧାମମନ୍ତ୍ରୀ । ଜେଡ୍-ମୋର୍ଡ ସୁଡ଼ଙ୍ଗ ଗଗନଗିରିରୁ ସୋନମାର୍ଗ ପର୍ଯ୍ୟନ୍ତ ରହିଛି । ଏହା ୬.୫ କିଲୋମିଟର ଲମ୍ବା । ସୁଡଙ୍ଗଟି ଦୁଇ ଲେନ୍ ବିଶିଷ୍ଠ । ସୁଡ଼ଙ୍ଗଟି ରାସ୍ତାର Z-ଆକୃତିର ଅଂଶ ଅନୁସାରେ ନାମିତ ହୋଇଛି । ଯାହାକୁ ସୁଡ଼ଙ୍ଗ ବାଇପାସ୍ କରିଥାଏ। ଏହି ସୁଡ଼ଙ୍ଗ ଖୋଲିବା ଦ୍ୱାରା ସୋନମାର୍ଗ ଅଞ୍ଚଳକୁ ଆସୁଥିବା ପର୍ଯ୍ୟଟକ ଏବଂ ସ୍ଥାନୀୟ ଲୋକଙ୍କୁ ବର୍ଷସାରା ହିଲ ଷ୍ଟେସନ ଅଞ୍ଚଳ ପରିଦର୍ଶନ କରିବାର ସୁଯୋଗ ମିଳିବ । 

ସୁଡ଼ଙ୍ଗ ଖୋଲିବା ଦ୍ୱାରା ଯାତ୍ରାର ଗତି ମଧ୍ୟ ବୃଦ୍ଧି ପାଇବ । ପୂର୍ବରୁ ଲଦାଖକୁ ଯିବାକୁ ହେଲେ ପାହାଡିଆ ଅଞ୍ଚଳ ଦେଇ ବୁଲି ବୁଲି ଯିବା ପାଇଁ ଘଣ୍ଟା ଘଣ୍ଟା ସମୟ ଲାଗୁଥିଲା । କିନ୍ତୁ ଏବେ ୬.୫ କିଲୋମିଟର ସୁଡ଼ଙ୍ଗ ପାର ହେବାକୁ ଲାଗିବ ମାତ୍ର ୧୫ ମିନିଟ୍ର ସମୟ । ଏହି ସୁଡ଼ଙ୍ଗ ଖୋଲିବା ଦ୍ୱାରା ସୋନମାର୍ଗର ସଂଯୋଗୀକରଣ କେବଳ ସୁଦୃଢ଼ ହେବ ତା ନୁହେଁ ବରଂ ଏହି ପ୍ରକଳ୍ପ ରଣନୈତିକ ଦୃଷ୍ଟିକୋଣରୁ ମଧ୍ୟ ଗୁରୁତ୍ୱପୂର୍ଣ୍ଣ ପ୍ରମାଣିତ ହେବ । 

ଏହି ସୁଡ଼ଙ୍ଗ, ଜୋଜିଲା ସୁଡ଼ଙ୍ଗ ସହିତ ମିଶି ଅମରନାଥ ଗୁମ୍ଫା, କାର୍ଗିଲ ଏବଂ ଲଦାଖ ଅଞ୍ଚଳକୁ ବର୍ଷସାରା ଯାତାୟତ ଯୋଗାଇବ । ଏହାବ୍ୟତୀତ ସାମରିକ ଯୋଗାଣକୁ ମଧ୍ୟ ସହଜ କରିବ ସୁଡଙ୍ଗ । ଏହି ସୁଡ଼ଙ୍ଗ ପର୍ଯ୍ୟଟନକୁ ପ୍ରୋତ୍ସାହିତ କରିବା ସହ ସ୍ଥାନୀୟ ଯୁବକମାନଙ୍କୁ ନିଯୁକ୍ତି ସୁଯୋଗ ପ୍ରଦାନ କରିବ। ଜେଡ୍-ମୋଡ ସୁଡ଼ଙ୍ଗର ନିର୍ମାଣ କାର୍ଯ୍ୟ ୨୦୧୮ ମସିହାରେ ଆରମ୍ଭ ହୋଇଥିଲା । ଏହା ୩୧ଟି ସୁଡ଼ଙ୍ଗ ରାସ୍ତା ମଧ୍ୟରୁ ଗୋଟିଏ । 

ନିର୍ମାଣ ସମୟରେ ଅନେକ ଚ୍ୟାଲେଞ୍ଜ ଆସିଥିଲା, ଯେଉଁଥିରେ ୨୦ ଅକ୍ଟୋବର ୨୦୨୪ରେ ହୋଇଥିବା ଏକ ଆତଙ୍କବାଦୀ ଆକ୍ରମଣ ମଧ୍ୟ ସାମିଲ ରହିଥିଲେ । ଏହି ଆକ୍ରମଣରେ ୬ ଜଣ ଶ୍ରମିକଙ୍କ ସମେତ ୭ ଜଣ ସାଧାରଣ ନାଗରିକଙ୍କ ମୃତ୍ୟୁ ହୋଇଥିଲା । ଏହାବ୍ୟତୀତ ଆକ୍ରମଣରେ ଜଣେ ସ୍ଥାନୀୟ ଡାକ୍ତରଙ୍କ ମଧ୍ୟ ମୃତ୍ୟୁ ହୋଇଥିଲା । ଏତେସବୁ ଚ୍ୟାଲେଞ୍ଜ ସତ୍ତ୍ୱେ, ସୁଡ଼ଙ୍ଗର ନିର୍ମାଣ କାର୍ଯ୍ୟ ଜାରି ରହିଥିଲା ଏବଂ ଏହାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଉଦଘାଟନ କରିବେ।