ବିଦର ୧୬।୧: କର୍ଣ୍ଣାଟକ ବିଦର ଜିଲ୍ଲାରୁ ଚାଞ୍ଚଲ୍ୟକର ଖବର ସାମ୍ନାକୁ ଆସୁଛି। ୨ସଶସ୍ତ୍ର ଦୁର୍ବୃତ୍ତ ସ୍ପଷ୍ଟ ଦିବାଲୋକରେ ସୁରକ୍ଷା କର୍ମୀଙ୍କୁ ଗୁଳି କରି ୯୩ଲକ୍ଷ ଟଙ୍କା ଲୁଟି ନେଇଛନ୍ତି। ଘଟଣାର ସୂଚନା ମିଳିବାମାତ୍ରେ ପୋଲିସ ପହଞ୍ଚି ମାମଲାର ତଦନ୍ତ ଚଳାଇଛି। ସୂଚନା ଅନୁସାରେ ବିଦର ଜିଲ୍ଲାର ଶିବାଜୀ ଚୌକସ୍ଥିତ ଏସବିଆଇ ଏଟିଏମରେ ଏହି ଘଟଣା ଘଟିଛି। ତେବେ ସବୁଠୁ ଯାହା ଆଶ୍ଚର୍ଯ୍ୟଜନକ ଘଟଣା ତାହା ହେଉଛି ଘଟଣା ଗୁରୁବାର ପୂର୍ବାହ୍ନ ୧୧ଟା ୩୦ ମିନିଟରେ ହୋଇଛି।
ପୋଲିସ ସୂଚନା ଅନୁସାରେ କର୍ମଚାରୀ ଗିରି ଭେଙ୍କଟେଶ ଓ ଶିବ କାଶୀନାଥ ଏଟିଏମରେ ଟଙ୍କା ଭରିବା ପାଇଁ ସୁରକ୍ଷା କର୍ମୀଙ୍କ ସହିତ କ୍ୟାସ ନେଇ ଭ୍ୟାନରେ ପହଞ୍ଚିଥିଲେ। ତେବେ ଏଟିଏମ ଟଙ୍କା ଲୁଟ ପାଇଁ ଦୁର୍ବୃତ୍ତ ସେଠାରେ ପୂର୍ବରୁ ଛପି ରହିଥିଲେ। କ୍ୟାସ ଭ୍ୟାନରୁ ଟଙ୍କା ବାହାରକୁ ଅଣାଯିବାମାତ୍ରେ ଦୁର୍ବୃତ୍ତ ସୁରକ୍ଷା କର୍ମୀଙ୍କ ଉପରକୁ ଗୁଳି ଚଳାଇ କର୍ମଚାରୀଙ୍କ ହାତରୁ ଟଙ୍କା ଭର୍ତ୍ତି ଟ୍ରଙ୍କ ଲୁଟି ନେଇ ପଳାଇଛନ୍ତି। ପୋଲିସ ସୂଚନା ଅନୁସାରେ ଏହି କାଣ୍ଡ ପଇଁ ଦୁର୍ବୃତ୍ତ ୮ ରାଉଣ୍ଡ ଗୁଳି ଚଳାଇଛନ୍ତି।
ଦୁର୍ବୃତ୍ତଙ୍କ ଗୁଳିମାଡରେ ୨ ସୁରକ୍ଷା କର୍ମୀ ଘଟଣାସ୍ଥଳରେ ପ୍ରାଣ ହରାଇଥିବା ପୋଲିସ କହିଛି। ଡକୈତୀ ସମ୍ପର୍କରେ ସୂଚନା ମିଳିବାମାତ୍ରେ ପୋଲିସ ତୁରନ୍ତ ଘଟଣାସ୍ଥଳକୁ ପହଞ୍ଚିଥିଲା। ମାମଲାର ତଦନ୍ତ ନିମନ୍ତେ ପୋଲିସ ଏକ ଟିମ ଗଠନ କରିଛି। ଏହି ଟିମ୍ ଏବେ ଡକୈତଙ୍କ ସନ୍ଧାନ ପାଇଁ ବିଭିନ୍ନ ସ୍ଥାନରେ ଚଢଉ କରୁଛି। ଡକୈତଙ୍କ ଚିହ୍ନଟ ପାଇଁ ପୋଲିସ ଆଖପାଖର ସିସିଟିଭି ଫୁଟେଜ ମଧ୍ୟ ଯାଞ୍ଚ କରୁଛି। ଖୁବ୍ ଶୀଘ୍ର ଡକୈତ ଧରାପଡିବେ ବୋଲି ବରିଷ୍ଠ ପୋଲିସ ଅଧିକାରୀ ଆଶାବ୍ୟକ୍ତ କରିଛନ୍ତି।
