ମସ୍କୋ ୨।୪: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଋଷିଆ କଡ଼ା ଚେତାବନୀ ଦେଇଛି। ଋଷିଆ କହିଛି ଯଦି ଟ୍ରମ୍ପ ଇରାନର ପରମାଣୁ ଆଡ୍ଡା ଉପରେ ବୋମାବର୍ଷା କରିବା ଲାଗି ତାଙ୍କ ଧମକକୁ କାର୍ଯ୍ୟକାରୀ କରନ୍ତି ତେବେ ଏହାର ପରିଣାମ ‘ବିନାଶକାରୀ’ ହେବ। ଏହି ବୟାନ ମଙ୍ଗଳବାର ବିଳମ୍ବିତ ରାତ୍ରିରେ ଋଷିଆ ରାଷ୍ଟ୍ରପତିଙ୍କ ମୁଖପାତ୍ର ଦେଇଛନ୍ତି। ଉଲ୍ଲେଖଯୋଗ୍ୟ ଯେ ଟ୍ରମ୍ପ ଏକ ସାର୍ବଜନିକ କାର୍ଯ୍ୟକ୍ରମରେ ଇରାନ ବିରୋଧରେ ସାମରିକ କାର୍ଯ୍ୟାନୁଷ୍ଠାନ ସମ୍ପର୍କରେ କହିଥିଲେ।
ଋଷିଆ ଉପ ବିଦେଶ ମନ୍ତ୍ରୀ ସର୍ଗେଇ ରୟାବକୋଭ ଏକ ଅନ୍ତର୍ଜାତୀୟ ବ୍ୟାପାର ପତ୍ରିକାକୁ ଦେଇଥିବା ସାକ୍ଷାତକାରରେ କହିଛନ୍ତି ଯେ ‘ଆମେ ଏପରି ଧମକ ଓ ଅଲ୍ଟିମେଟମକୁ ଅନୁଚିତ ଭାବୁ। ଆମେ ଏହାକୁ ନିନ୍ଦା କରୁଛୁ ଓ ଏହାକୁ ଇରାନ ଉପରେ ଆମେରିକାର ଇଛା ଥୋପିବାର ଉଦ୍ୟମ ବୋଲି ମନେ କରୁଛୁ’ । ଉଲ୍ଲେଖଯୋଗ୍ୟ ଯେ ଋଷିଆ ଏହି ପ୍ରସଙ୍ଗରେ ଇରାନ ଓ ଆମେରିକା ମଧ୍ୟରେ ମଧ୍ୟସ୍ଥତା କରିବାକୁ ମଧ୍ୟ ପ୍ରସ୍ତାବ ଦେଇଛି।
ମସ୍କୋ ଜାନୁୟାରୀରେ ତେହେରାନ ସହିତ ଏକ ରଣନୈତିକ ଭାଗିଦାରୀ ସନ୍ଧିରେ ସ୍ୱାକ୍ଷର କରିଥିଲା ଓ ଏବେ ସେ ଦୁଇ ଦେଶଙ୍କ ମଧ୍ୟରେ ଉତ୍ତେଜନା ହ୍ରାସ ପାଇଁ ଉଦ୍ୟମ କରୁଛି। ତେବେ ଟ୍ରମ୍ପ ତାଙ୍କ କଠୋର ନିଷ୍ପତ୍ତିରେ ଏବେବି ଅଟଳ ଅଛନ୍ତି। ସେ ଏନବିସି ନ୍ୟୁଜକୁ ଦେଇଥିବା ସାକ୍ଷାତକାରରେ କହିଛନ୍ତି ଯେ ଯଦି ଇରାନ କୌଣସି ବୁଝାମଣା ନ କରେ ତେବେ ବୋମା ବର୍ଷା ହେବ। ଏହା ଏପରି ବୋମା ବର୍ଷା ହେବ ଯାହା ଇରାନ ପୂର୍ବରୁ କେବେ ଦେଖିନଥିବ।
ଉଲ୍ଲେଖଯୋଗ୍ୟ ଯେ ଟ୍ରମ୍ପ ତାଙ୍କ ପ୍ରଥମ କାର୍ଯ୍ୟକାଳ ୨୦୧୫ରେ ଆମେରିକାକୁ ପରମାଣୁ ବୁଝାମଣାରୁ ବାହାର କରିନେଇଥିଲେ। ଏହି ବୁଝାମଣା ଅନୁସାରେ ଇରାନକୁ କଡ଼ା ପରମାଣୁ କଟକଣା ବଦଳେ ଆର୍ଥିକ ପ୍ରତିବନ୍ଧକରୁ ଆଶ୍ୱସ୍ତ କରିଥିଲା। ଇରାନର କହିବା କଥା ହେଉଛି ତାର ପରମାଣୁ କାର୍ଯ୍ୟକ୍ରମ ଶାନ୍ତିପୂର୍ଣ୍ଣ ଉଦ୍ଦେଶ୍ୟ ନିମନ୍ତେ ଓ ସେ ପରମାଣୁ ଅସ୍ତ୍ରଶସ୍ତ୍ର ତିଆରି କରୁ ନାହିଁ। ରୟାବକୋଭ ସତର୍କ କରିଛନ୍ତି ଯେ ଟ୍ରମ୍ପଙ୍କ ଧମକ ଉତ୍ତେଜନାକୁ ବଢାଇବ।
ସେ କହିଛନ୍ତି ଯେ ଏଭଳି ଆକ୍ରମଣର ପରିଣାମ, ଖାସ କରି ଯଦି ସେ ଇରାନର ପରମାଣୁ ଆଡ୍ଡାକୁ ଟାର୍ଗେଟ କରନ୍ତି ତେବେ ଏହା ସମ୍ପୂର୍ଣ୍ଣ କ୍ଷେତ୍ର ଲାଗି ବିନାଶକାରୀ ସାବ୍ୟସ୍ତ ହୋଇପାରେ। ସେ କହିଛନ୍ତି ଯେ ଏବେବି ସମୟ ଅଛି ସବୁ ପକ୍ଷ ଏକ ବ୍ୟବହାରିକ ଚୁକ୍ତିରେ ପହଞ୍ଚିବା ପାଇଁ ଉଦ୍ୟମ କରନ୍ତୁ। ଏହି ବାର୍ତ୍ତାରେ ଋଷିଆ ସହାୟତା କରିବା ପାଇଁ ପ୍ରସ୍ତୁତ।
