ନୂଆଦିଲ୍ଲୀ ୨୨/୦୫: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ସର୍ବଦା ନିଜ କ୍ରେଡିଟ୍ ନେବା ନିଶା ଘାରିଛି । ବୁଧବାର ସେ ତାଙ୍କର ଦାବିକୁ ଦୋହରାଇଛନ୍ତି ଯେ ସେ ଭାରତ ଏବଂ ପାକିସ୍ତାନ ମଧ୍ୟରେ ସମ୍ପ୍ରତି ବିବାଦର ସମାଧାନ ବାଣିଜ୍ୟ ମାଧ୍ୟମରେ କରିଛନ୍ତି । ସେ ଦାବି କରିଛନ୍ତି ଯେ ବାଣିଜ୍ୟ ଆଲୋଚନା ମାଧ୍ୟମରେ ଦୁଇ ଦେଶ ମଧ୍ୟରେ ଉତ୍ତେଜନା ହ୍ରାସ କରିବାରେ ସେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ପୂର୍ବରୁ ବି ସେ ଏହି ଦାବି ଦୋହରାଇଥିଲେ । ହେଲେ ଭାରତ ପୂର୍ବରୁ ଟ୍ରମ୍ପଙ୍କ ଏହି ଦାବିକୁ ପ୍ରତ୍ୟାଖ୍ୟାନ କରିସାରିଛି । କହିଛି ଯେ ଜମ୍ମୁ ଏବଂ କାଶ୍ମୀର ସହିତ ଜଡିତ ଯେକୌଣସି ସମସ୍ୟା ଭାରତ ଓ ପାକିସ୍ତାନ ମଧ୍ୟରେ ଦ୍ୱିପାକ୍ଷିକ ଭାବରେ ସମାଧାନ କରାଯିବ।
ହ୍ୱାଇଟ୍ ହାଉସରେ ଦକ୍ଷିଣ ଆଫ୍ରିକାର ରାଷ୍ଟ୍ରପତି ସିରିଲ୍ ରାମାଫୋସାଙ୍କ ସହ ଏକ ସାକ୍ଷାତ ସମୟରେ ଟ୍ରମ୍ପ କହିଥିଲେ । ଯଦି ଆପଣ ପାକିସ୍ତାନ ଓ ଭାରତ ସହିତ ଆମେ କ'ଣ କରିଛୁ ତାହା ଜାଣିବାକୁ ଚାହଁଛ କି? । ତେବେ ମୁଁ ଏଠାରେ କହିରଖୁଛି, ଆମେ ସେହି ସମ୍ପୂର୍ଣ୍ଣ ସମସ୍ୟାର ସମାଧାନ କରିଛୁ । ମୁଁ ଭାବୁଛି ମୁଁ ଏହାକୁ ବାଣିଜ୍ୟ ମାଧ୍ୟମରେ ସମାଧାନ କରିଛି। ଆମେ ଭାରତ-ପାକିସ୍ତାନ ସହିତ ଏକ ବଡ଼ ଚୁକ୍ତି କରୁଛୁ । କହିବାକୁ ଗଲେ ଦୁଇ ଦେଶ ମଧ୍ୟରେ ପ୍ରବଳ ଗୁଳିବିନିମୟ ହୋଇଥିଲା। ଆମେ ଉଭୟ ଦେଶର ନେତାଙ୍କ ସହ କଥା ହୋଇ ସମଗ୍ର ସମସ୍ୟାର ସମାଧାନ କରିଛୁ।'
ସେ ଆହୁରି କହିଛନ୍ତି ଯେ ଦୁଇ ଦିନ ପରେ କିଛି ଘଟିଲା । ସେମାନେ କହିଲେ ଯେ ଏହା ଟ୍ରମ୍ପଙ୍କ ଭୁଲ ଥିଲା। ମୁଁ ଏହା କହିବାକୁ ଘୃଣା କରେ ଯେ ଆମେ ଏହାକୁ ସମାଧାନ କରିଛୁ। ଆମେ କିଛି ଭଲ କରିଛୁ। କିନ୍ତୁ ପାକିସ୍ତାନରେ କିଛି ମହାନ ଓ କିଛି ପ୍ରକୃତରେ ଭଲ ନେତା ଅଛନ୍ତି। କିନ୍ତୁ ଭାରତର ପ୍ରଧାନମନ୍ତ୍ରୀ ମୋଦି ମୋର ବନ୍ଧୁ । ସେ ଜଣେ ମହାନ ବ୍ୟକ୍ତି।' ଟ୍ରମ୍ପ ଦାବି କରିଛନ୍ତି ଯେ ତାଙ୍କ ମଧ୍ୟସ୍ଥତା ଯୋଗୁଁ ଉଭୟ ଦେଶ ଯୁଦ୍ଧବିରତିକୁ ଗ୍ରହଣ କରିଛନ୍ତି।
