ସୁବର୍ଣ୍ଣପୁର: ମହଙ୍ଗା ପଡ଼ିଲା ସାପ ସହ ଖେଳ । ଥାନା ଆଗରେ ନାଗ ସାପ କାମୁଡ଼ାରେ ସାପ ଧରାଳୀଙ୍କ ମୃତ୍ୟ। ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ସୁବର୍ଣ୍ଣପୁର ଜିଲ୍ଲା ବିରମହାରାଜପୁର ଥାନା ପରିସରରେ ।
ସୁଚନା ଅନୁଯାୟୀ, ଚମ୍ପାମାଳ ଗାଁର ଜଣେ ବ୍ୟକ୍ତିଙ୍କ ଘରୁ ଏକ ନାଗ ସାପ ବାହାରିଥିଲା। ଆଉ ଉକ୍ତ ବ୍ୟକ୍ତି ସାପଟିକୁ ଧରିବା ପାଇଁ ମେଣ୍ଡାମାଳ ଗାଁର ଗୌର କୁମ୍ଭାରକୁ ଖବର ଦେଇଥିଲେ । ଗୌର ସେଠାକୁ ଯାଇ ସାପକୁ ଉଦ୍ଧାର କରି ଏକ ପ୍ଲାଷ୍ଟିକ ଡବାରେ ଧରି କୌଣସି କାମରେ ଥାନାକୁ ଆସିଥିଲେ ।
ତେବେ ଥାନାରେ ପୋଲିସ ଅଧିକାରୀ ଓ କର୍ମଚାରୀଙ୍କ ସାମ୍ନାରେ ସାପକୁ ଡବାରୁ ବାହାର କରି ଦେଖାଇଥିଲେ । ଦେଖି ସାରି ପୁଣି ଡବା ଭିତରେ ଭରିବା ସମୟରେ ଗୌରଙ୍କ ହାତକୁ ଚୋଟ ମାରିଥିଲା ବିଷଧର ନାଗସାପ । ଅବଶ୍ୟ ତାଙ୍କୁ ତୁରନ୍ତ ପୋଲିସ ଭ୍ୟାନରେ ସୁବର୍ଣ୍ଣପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନିଆଯାଇଥିଲା। ମାତ୍ର ସେଠାରେ ଚିକିତ୍ସାଧୀନ ଅବସ୍ଥାରେ ଗୌରଙ୍କର ମୃତ୍ୟୁ ହୋଇଛି।