ମୁମ୍ବାଇ ୨୧।୦୧ : ରୋହିତ ଶର୍ମା ଜଣେ କ୍ଲାସ ପ୍ଲେୟାର । ଓ୍ୱାଇଟ୍ ବଲ୍ କ୍ରିକେଟ୍ରେ ଜଣେ ଅଦ୍ଭୂତ ବ୍ୟାଟର । କୌଣସି ବି ସ୍ଥିତିରେ କୌଣସି ବି ବୋଲର ଉପରେ ଭାରି ପଡିପାରନ୍ତି । କିଛି ଦିନ ହେଲା ରୋହିତ ଶର୍ମା ଆଉଟ୍ ଫର୍ମ ଅଛନ୍ତି । ଏକଥା ସତ.. ଖାଲି ଚମ୍ପିଆନ୍ସ ଟ୍ରଫି ଟୁର୍ଣ୍ଣାମେଣ୍ଟ ଆରମ୍ଭ ହେଉ, ଦେଖିବେ ରୋହିତ ଶର୍ମାଙ୍କ କିପରି ବ୍ୟାଟିଂ ଶୈଳୀ ରହିଛି ବୋଲି କହିଛନ୍ତି ଭାରତୀୟ ଟିମ୍ର ପୂର୍ବତନ ଅଧିନାୟକ ସୌରଭ ଗାଙ୍ଗୁଲି ।
ଏକ ସାକ୍ଷାତକାର ଦେବା ଅବସରରେ ବିସିସିଆଇର ପୂର୍ବତନ ବସ୍ ସୌରଭ ଗାଙ୍ଗୁଲି କହିଛନ୍ତି ଯେ, ଓ୍ୱାଇଟ୍ ବଲ୍ କ୍ରିକେଟ୍ରେ ରୋହିତ ଶର୍ମା ଜବରଦସ୍ତ ପ୍ଲେୟାର । ହଁ କିଛି ଦିନ ହେଲା ରୋହିତ ଶର୍ମା ଆଉଟ୍ ଫର୍ମରେ ଅଛନ୍ତି । ନିକଟରେ ଶେଷ ହୋଇଥିବା ବର୍ଡର-ଗାଭାସ୍କର ସିରିଜ୍ରେ ରୋହିତ ଶର୍ମାଙ୍କ ବ୍ୟାଟ୍ରୁ କୌଣସି ରନ୍ ବାହାରିନାହିଁ । ହେଲେ ଦିନିକିଆ କ୍ରିକେଟ୍ରେ ରୋହିତ ଶର୍ମାଙ୍କ ଫର୍ମ ଜବରଦସ୍ତ । କୌଣସି ବି ପରିସ୍ଥିତିରେ କୌଣସି ବି ବୋଲରଙ୍କ ଉପରେ ସେ ଜବରଦସ୍ତ ଆଟାକ୍ କରିପାରନ୍ତି । ଆପଣ ଦେଖିଥିବେ ୨୦୨୩ ଦିନିକିଆ ବିଶ୍ୱକପ୍ ଏବଂ ୨୦୨୪ ଟି-୨୦ ବିଶ୍ୱକପ୍ରେ ରୋହିତ ଶର୍ମା କିପରି ବ୍ୟାଟିଂ କରିଥିଲେ । ଯାହାକି ବିରୋଧୀ ବୋଲରଙ୍କୁ ଚିନ୍ତାରେ ପକାଇ ଦେଇଥିଲା । ତେଣୁ ରୋହିତ ଶର୍ମାଙ୍କ ଫର୍ମକୁ ନେଇ କୌଣସି ଚିନ୍ତା କରିବାରନାହିଁ । ଖାଲି ୨୦୨୫ ଚମ୍ପିଆନ୍ସ ଟ୍ରଫି ଆରମ୍ଭ ହେଇଯାଉ, ଦେଖିବେ ରୋହିତ ଶର୍ମାଙ୍କ ବ୍ୟାଟ୍ରୁ କିପରି ରନ୍ ବର୍ଷା ହେଉଛି ।
ସୂଚନାଯୋଗ୍ୟ ଯେ, ଫେବୃଆରୀ ୧୯ ତାରିଖରୁ ପାକିସ୍ତାନ ଏବଂ ଦୁବାଇରେ ଆରମ୍ଭ ହେବାକୁ ଯାଉଛି ଚମ୍ପିଆନ୍ସ ଟ୍ରଫି ୨୦୨୫। ଭାରତର ଅଭିଯାନ ଫେବୃଆରୀ ୨୦ରୁ ଆରମ୍ଭ ହେବ। ଦୁବାଇରେ ବାଂଲାଦେଶ ସହିତ ଭାରତର ମୁକାବିଲା ରହିଛି। ଏହାପରେ୨୩ରେ ଭାରତ-ପାକିସ୍ତାନ ଟକ୍କର । ମାର୍ଚ୍ଚ ୨ରେ ନ୍ୟୁଜିଲାଣ୍ଡ ଏବଂ ଭାରତ ମଧ୍ୟରେ ମୁକାବିଲା ରହିଛି। ଚଳିତ ଥର ଚମ୍ପିଆନ୍ସ ଟ୍ରଫି ହାଇବ୍ରିଡ୍ ମଡେଲରେ ଖେଳା ହେବାକୁ ଯାଉଛି । ବର୍ତ୍ତମାନ ଯାଏଁ ୮ ଥର ଚମ୍ପିଆନ୍ସ ଟ୍ରଫି ଟୁର୍ଣ୍ଣାମେଣ୍ଟ ଖେଳାଯାଇଛି । ୧୯୯୮ରେ ପ୍ରଥମ ଥର ପାଇଁ ବାଂଲାଦେଶରେ ଆୟୋଜନ ହୋଇଥିଲା ପ୍ରଥମ ଚମ୍ପିଆନ୍ସ ଟ୍ରଫି । ଏଥିରେ ଓ୍ୱେଷ୍ଟଇଣ୍ଡିଜ୍କୁ ହରାଇ ଦକ୍ଷିଣ ଆଫ୍ରିକା ଚମ୍ପିଆନ୍ ହୋଇଥିଲା । ଏହାପରେ ୨୦୦୦ରେ କେନିଆରେ ହୋଇଥିଲା ଚମ୍ପିଆନ୍ସ ଟ୍ରଫି । ଏଥିରେ ଭାରତକୁ ହରାଇ ନ୍ୟୁଜିଲାଣ୍ଡ ହୋଇଥିଲା ଚମ୍ପିଆନ୍ । ତୃତୀୟ ସଂସ୍କରଣରେ ଭାରତ ଏବଂ ଶ୍ରୀଲଙ୍କା ଯୌଥ ଭାବେ ବିଜେତା ଘୋଷିତ ହୋଇଥିଲେ । ୪ର୍ଥ ସଂସ୍କରଣରେ ଇଂଲଣ୍ଡରେ ହୋଇଥିଲା ଆୟୋଜନ । ଏଥିରେ ଇଂଲଣ୍ଡକୁ ହରାଇ ଓ୍ୱେଷ୍ଟଇଣ୍ଡିଜ୍ ଚମ୍ପିଆନ୍ ହୋଇଥିଲା। ୫ମ ସଂସ୍କରଣରେ ଭାରତରେ ଖେଳାଯାଇଥିଲେ । ଏଥିରେ ଓ୍ୱେଷ୍ଟଇଣ୍ଡିଜ୍କୁ ହରାଇ ଟ୍ରଫି ଜିତିଥିଲା ଅଷ୍ଟ୍ରେଲିଆ। ୬ଷ୍ଠ ସଂସ୍କରଣ ଦକ୍ଷିଣ ଆଫ୍ରିକାରେ ଖେଳାଯାଇଥିଲା । ଯେଉଁଥିରେ ନ୍ୟୁଜିଲାଣ୍ଡକୁ ହରାଇ ଚମ୍ପିଆନ୍ ହୋଇଥିଲା ଅଷ୍ଟ୍ରେଲିଆ । ୨୦୧୩ରେ ଖେଳାଯାଇଥିବା ସଂସ୍କରଣରେ ଇଂଲଣ୍ଡକୁ ହରାଇ ଭାରତୀୟ ଟିମ୍ ଚମ୍ପିଆନ୍ ହୋଇଥିଲା । ଶେଷ ଥର ପାଇଁ ୨୦୧୭ରେ ଖେଳାଯାଇଥିବା ଚମ୍ପିଆନ୍ସ ଟ୍ରଫିରେ ଭାରତକୁ ହରାଇ ଟ୍ରଫି ଜିତିଥିଲା ପାକିସ୍ତାନ ।
୧୪୦ କୋଟି ଲୋକ ଆମ ପଛରେ, ଏଥର ବି ଓ୍ୱାଙ୍ଖେଡ ଷ୍ଟାଡିୟମ୍ ଆସିବ ଟ୍ରଫି- ରୋହିତ ଶର୍ମା
