ନୂଆଦିଲ୍ଲୀ: ଟ୍ରମ୍ପଙ୍କ ଟ୍ରେଡ୍ ଓ୍ବାର ସାମ୍ନାରେ ଫିକା ପଡ଼ିଲା ଭାରତର ଟ୍ୟାକ୍ସ ଫ୍ରି’ । ବଜେଟରେ ୧୨ ଲକ୍ଷ ପର୍ଯ୍ୟନ୍ତ ଟିକସ ଛାଡ଼ ଘୋଷଣା ପରେ ବି ସେୟାର ବଜାରରେ ଝଡ଼ । ସୋମବାର ପୁଞ୍ଜି ବଜାର ଖୋଲିବା ମାତ୍ରେ ତଳମୁହାଁ ହୋଇଥିଲା ସେନସେକ୍ସ । ବିଏସଇ ସେନସେକ୍ସ ୭୦୦ ପଏଣ୍ଟ ପର୍ଯ୍ୟନ୍ତ ହ୍ରାସ ପାଇଛି । ସେହିପରି ନିଫ୍ଟି ୨୦୦ ଅଙ୍କରୁ ଅଧିକ ଖସିଛି । ଆମେରିକାର ଓ କାନାଡା ମଧ୍ୟରେ ଟାରିଫ୍ ଯୁଦ୍ଧ ପରେ ଭାରତୀୟ ସେୟାର ବଜାର ନିମ୍ନଗାମୀ ହୋଇଛି ।
୩୦ ସେୟାର ବିଶିଷ୍ଟ ବମ୍ବେ ଷ୍ଟକ୍ ଏକ୍ସଚେଞ୍ଜ, ୟୁନିୟନ ବଜେଟ୍ ଘୋଷଣା ଦିନ ସେନସେକ୍ସ ୭୭,୫୦୫.୯୬ରେ ବନ୍ଦ ହୋଇଥିଲା । ସୋମବାର ସକାଳୁ ପୁଞ୍ଜି ବଜାର ଖୋଲିବା ମାତ୍ରେ ତୁରନ୍ତ ହ୍ରାସ ପାଇ ୭୭,୦୬୩.୯୪ ଅଙ୍କକୁ ଖସି ଆସିଥିଲା । ଏହା କିଛି ମିନିଟ୍ ଭିତରେ ସେନସେକ୍ସ ୭୦୦ ପଏଣ୍ଟ ପର୍ଯ୍ୟନ୍ତ ହ୍ରାସ ପାଇ ୭୬,୭୭୪.୦୫ ସ୍ତରରେ ପହଞ୍ଚିଥିଲା । ସେହିପରି ସେନସେକ୍ସ ତୁଳନାରେ ନିଫ୍ଟି ଅଧିକ ହ୍ରାସ ପାଇଛି । ଏନଏସଇ ନିଫ୍ଟି ଶନିବାର ୨୩, ୪୮୨ରେ ବନ୍ଦ ହୋଇଥିଲା । ସୋମବାର ବଜାର ଖୋଲିବା ମାତ୍ରେ ୨୩, ୩୧୯ ଅଙ୍କକୁ ଖସିଥିଲା । ଚାହୁଁ ଚାହୁଁ ନିଫ୍ଟି ୨୨୦ ପଏଣ୍ଟ ହ୍ରାସ ପାଇଥିଲା ।
ଆମେରିକାର ଟ୍ରେଡ୍ ଓ୍ବାର ଭାରତୀୟ ପୁଞ୍ଜି ବଜାର ହ୍ରାସ ପାଇବାର ମୁଖ୍ୟ କାରଣ ବୋଲି କୁହାଯାଉଛି । ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ନିଜ ନିର୍ବାଚନୀ ପ୍ରତିଶ୍ରୁତି ପୂରଣ ପାଇଁ ଗୋଟିଏ ପରେ ଗୋଟିଏ ମାଷ୍ଟରଷ୍ଟ୍ରୋକ୍ ଦେଇଚାଲିଛନ୍ତି । ପ୍ରଥମେ ଅବୈଧ ପ୍ରବାସୀଙ୍କୁ ଆମେରିକାରୁ ବାହାର କରିବା ପାଇଁ ବ୍ୟବସ୍ଥା କରିଥିଲା । ଏବେ ଟ୍ରମ୍ପଙ୍କ ଟାରିଫ୍ ଯୁଦ୍ଧ ଆରମ୍ଭ କରିଛନ୍ତି । କାନାଡ଼ା, ମେକ୍ସିକୋ ଓ ଚୀନ୍କୁ ଟାର୍ଗେଟ୍ କରିଛନ୍ତି ଆମେରିକା ରାଷ୍ଟ୍ରପତି । ଏଥିରୁ ଭାରତ ବର୍ତ୍ତିଯାଇଥିଲେ ମଧ୍ୟ ଟ୍ରମ୍ପଙ୍କ ଟାରିଫ୍ ଯୁଦ୍ଧର ପ୍ରଭାବ ଭାରତୀୟ ସେୟାର ବଜାର ଉପରେ ପଡ଼ିଛି ।...
