ଭୁବନେଶ୍ଵର: ୧୭ ମିନିଟରେ ସରିଗଲା ସମ୍ପୂର୍ଣ ରାମାୟଣ। ସ୍ତବ୍ଧ ହୋଇଗଲେ ହଜାର ହଜାର ଦର୍ଶକ। ରାମାୟଣ ଚରିତ୍ରରେ ମନ୍ତ୍ର ମୁଗ୍ଧ କଲେ ଯାତ୍ରା କଳାକାର। ଶେଷରେ ଜୟ ଶ୍ରୀରାମ ଧ୍ୱନିରେ ପ୍ରକମ୍ପିତ ହେବା ସହ ମୋବାଇଲ ଲାଇଟ୍ ରେ ଝଲସି ଉଠିଲା ଷ୍ଟେଜ ଆଉ ରାମ ମୟ ହୋଇଗଲା ପରିବେଶ।
ନା ଥିଲା ବଡ ସୁଟିଂ ସେଟ୍ , ନା ଥିଲେ ଶହଶହ କଳାକାର ଆଉ ନା ଥିଲା ଦମଦାର ଡ଼ାଇଲଗ୍ ଓ ସିନେରି। ତଥାପି ରାମମୟ ହୋଇଗଲା ସମଗ୍ର ଯାତ୍ରା ମଞ୍ଚ।ଖଣ୍ଡଗିରି ଯାତ୍ରାରେ ସବୁ ଅପେରା ତାଙ୍କ କାହାଣୀକୁ ନେଇ ଦମଦାର ପ୍ରଦର୍ଶନ ଜାରି ରଖିଛନ୍ତି। କିଏ କାହାଣୀକୁ ନେଇ ପ୍ରଶଂସା ସାଉଁଟୁଛି ତ ଆଉ କିଏ ଷ୍ଟାର କାଷ୍ଟ କୁ ନେଇ ସୃଷ୍ଟି କରୁଛି କ୍ରେଜ୍। କିନ୍ତୁ ୟାରି ଭିତରେ ତୁଳସୀ ଗଣନାଟ୍ୟ ନିଆରା କାର୍ଯ୍ୟ କରିଛି। ଯାତ୍ରା ପୂର୍ବରୁ ସବୁ ପେଣ୍ଡାଲରେ ଏକ ଘଣ୍ଟାରୁ ଅଧିକ ସମୟ ରେକର୍ଡ ଡ଼ାନ୍ସ କରାଯାଉଥିବା ବେଳେ ଏଠି କିନ୍ତୁ ହୋଇଥିଲା ରାମଲୀଳା। ରାମାୟଣରେ ଥିବା ସମସ୍ତ ଚରିତ୍ର ଦେଖାଇଥିଲେ ନିଜ ଅଭିନୟର ପରାକାଷ୍ଠା।
ରାମ,ଲକ୍ଷ୍ମଣ, ସୀତା, ହନୁମାନ, ରାବଣ, ସୂପଣଖା, ଜଟାୟୁ ଓ ଶବରୀ ପରି ଚରିତ୍ରକୁ ଜୀବନ୍ତ କରିଥିଲେ କଳାକାର। ପାଟିରେ କଥା ନଥିଲା କଥା କି ସଂଳାପ ନଥିଲା କେବଳ ପରିସ୍ଥିତି ଅନୁସାରେ ବାଜୁଥିଲା ପରଦା ପଛରେ ଗୀତ। ସେହି ଗୀତ ଓ ଅଭିନୟରେ ରାମ ବିବାହ, ବନବାସ, ସୀତା ହରଣ, ହନୁମାନ ମିଳନ, ଲଙ୍କା ଦହନ, ରାମ ସେତୁ, ଲକ୍ଷ୍ମଣ ଶକ୍ତିଭେଦ, ରାମ ରାବଣ ଯୁଦ୍ଧ ସହ ମାତା ସୀତା ଓ ଶ୍ରୀ ରାମଙ୍କ ମିଳନ ପରି ପ୍ରତ୍ୟେକ ଘଟଣାକୁ ନିଖୁଣ ଭାବେ ମଞ୍ଚରେ ପରିବେଷଣ କରିଥିଲେ କଳାକାର।
ଦୀର୍ଘ ବର୍ଷ ଧରି ଯେବେ ବି ଖଣ୍ଡଗିରି ମେଳାରେ ଅଥବା ଓଡ଼ିଶାରେ ଯେଉଁଠି ଅପେରା ପଡୁଛି ସେଠାରେ ଆଇଟମ ଡ଼ାନ୍ସ ଏବଂ ଅଶ୍ଳୀଳ ନୃତ୍ୟ ସହ ଅଙ୍ଗ ପ୍ରଦର୍ଶନ ପାଇଁ ବହୁ ବାଦ ବିବାଦ ଉପୁଜିଛି। ଏମିତିକି ଅଡିଅନ୍ସ ଗ୍ୟାଲେରୀରେ ଘଟିଛି ତୁମୁଳ କାଣ୍ଡ। କିନ୍ତୁ ତୁଳସୀ ଗଣନାଟ୍ୟର କଳାକାର ମାନଙ୍କ ଦ୍ଵାରା ପରିବେଷ୍ଟିତ ଏହି ୧୭ ମିନିଟ୍ର ରାମାୟଣ ହଜାର ହଜାର ଦର୍ଶକଙ୍କ ମନ ଜିତି ନେଇଥିଲା। ଆଉ ଏହି ରାମାୟଣ ସରିବା ପରେ ଲୋକେ ସ୍ୱତପ୍ରତ ଭାବେ ଜୟ ଶ୍ରୀରାମ ନାରା ଦେଇଥିଲେ ତା ସହିତ ଅନ୍ଧାର କରାଯାଇଥିବା ଯାତ୍ରା ମଞ୍ଚକୁ ନିଜ ମୋବାଇଲ ଟର୍ଚ୍ଚ ଲାଇଟ୍ ରେ ଆଲୋକିତ କରି ଅଭିବାଦନ ଜଣାଇ ଥିଲେ।
ସେପଟେ ଯାତ୍ରା ମଞ୍ଚରେ ଏପରି ନିଆରା ଥିମକୁ ନେଇ ବିଭିନ୍ନ ମହଲରେ ବେଶ୍ ପ୍ରଶଂସା କରାଯାଉଛି। ଯାତ୍ରା ମଞ୍ଚରେ ଆଇଟମ ଡ଼ାନ୍ସ ତଥା ଅଶ୍ଳୀଳତା କୁ ନେଇ ଅନେକ ବାଦ ବିବାଦ ସହ ପେଣ୍ଡାଲରେ ତୁମୁଳ କାଣ୍ଡ ହେଉଥିବା ବେଳେ ଏହି ପଦକ୍ଷେପ ନିଶ୍ଚିତ ସ୍ଵାଗତ ଯୋଗ୍ୟ ଓ ଅଶ୍ଳିଳତା ଗାଲରେ ଶକ୍ତ ଚାପୁଡ଼ା ସଦୃଶ।
