ନୂଆଦିଲ୍ଲୀ ୨୦।୩: ସମାଜବାଦୀ ପାର୍ଟିର ରାଜ୍ୟସଭା ସାଂସଦ ତଥା ଅଭିନେତ୍ରୀ ଜୟା ବଚ୍ଚନ । ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପ୍ରଶଂସା କରିଛନ୍ତି । ଦେଶରେ ଫିଲ୍ମଷ୍ଟାରଙ୍କ ଠାରୁ ମଧ୍ୟ ମୋଦି ଅଧିକ ଲୋକପ୍ରିୟ । ମୋଦିଙ୍କ ନାଁରେ ହିଁ ବିଜେପି ନେତା ନିର୍ବାଚନ ଜିତୁଛନ୍ତି ବୋଲି ଜୟା କହିଛନ୍ତି ।
ଏକ ଟିଭି କାର୍ଯ୍ୟକ୍ରମରେ ଜୟା କହିଥିଲେ, ସେ ବିରୋଧୀ ଦଳରେ ଥିଲେ ବି ଏହା ସତ ଯେ ଶାସକ ଦଳର ନେତା ଫିଲ୍ମଷ୍ଟାର ହୁଅନ୍ତୁ ବା ଅନ୍ୟ କେହି, ସେମାନେ ନିଜ ଦମ୍ରେ ନିର୍ବାଚନ ଜିତିନାହାନ୍ତି । କେବଳ ମୋଦିଙ୍କ ନାଁ କାରଣରୁ ସେମାନେ ବିଜୟୀ ହୋଇଛନ୍ତି । ଯଦି ଆପଣ ଅଭିନେତା ତେବେ ଦର୍ଶକ ଆପଣଙ୍କୁ ଦେଖିବାକୁ ଆସିବେ । ସେମାନେ ଆପଣଙ୍କୁ ଭୋଟ ଦିଅନ୍ତୁ କି ନା, କିନ୍ତୁ ଭେଟିବାକୁ ନିଶ୍ଚୟ ଆସିବେ । ରାଜନୀତିରେ ଲୋକେ ଚାହାନ୍ତି ଭିଡ଼ ହେଉ ଏବଂ ସେମାନଙ୍କ କଥା ଶୁଣନ୍ତୁ ।
କିନ୍ତୁ ପ୍ରଥମେ ଆପଣଙ୍କୁ ଲୋକଙ୍କୁ ଭେଟିବାକୁ ହେବ । ପରେ ଯାଇ ଲୋକେ ଆପଣଙ୍କ କଥା ଶୁଣିବେ । ଜୟା ବଚ୍ଚନ ଆହୁରି କହିଥିଲେ ଯେ, ତାଙ୍କୁ ସଂସଦରେ ସବୁଦିନ ଦେଖିବା ପରେ ଅନେକ ପ୍ରଶ୍ନ କରନ୍ତି ଯେ, ଆପଣ ଆଜି ବି ଆସିଛନ୍ତି? ଆପଣ ସବୁଦିନ ଆସୁଛନ୍ତି? ଏହି ପ୍ରଶ୍ନ ବେଶ୍ କଷ୍ଟ ଦିଏ । କାରଣ ସଂସଦକୁ ସେ ଜଣେ ଅଭିନେତ୍ରୀ ଭାବେ ନୁହେଁ ବରଂ ସାମାଜିକ ଭାବେ କିଛି କରିବାକୁ ଚାହୁଁଥିବାରୁ ଆସିଥାନ୍ତି ।
