ଭୁବନେଶ୍ଵର: ଆଜି ଓଡିଶା ପାଇଁ ଏକ ଭଲ ଦିନ । ରାଜ୍ୟରେ ପ୍ରାୟ ୪୧୩୭ କୋଟି ଟଙ୍କାର ୧୯ଟି ପ୍ରକଳ୍ପର ଶିଳାନ୍ୟାସ ଏବଂ ଲୋକାର୍ପଣ କରିଛନ୍ତି କେନ୍ଦ୍ର ମନ୍ତ୍ରୀ ନୀତିନ ଗଡକରୀ ଏବଂ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପୂର୍ବଦ୍ୟୋୟ ମିଶନରେ ଶୁଭାରମ୍ଭ ହୋଇଥିବା ଏହି ପ୍ରକଳ୍ପ ଗୁଡ଼ିକ ଓଡ଼ିଶାରେ ସଡ଼କ ଭିତ୍ତିଭୂମିକୁ ମଜବୁତ୍ କରିବ । ଲୋକଙ୍କ ଯାତାୟାତ ସହଜ ହେବ, ପ୍ରତ୍ୟକ୍ଷ ଏବଂ ପରୋକ୍ଷରେ ନିଯୁକ୍ତି ସୃଷ୍ଟି ହେବ ବୋଲି କହିଛନ୍ତି କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। 

କାର୍ଯ୍ୟକ୍ରମକୁ ସମ୍ବୋଧିତ କରି କହିଛନ୍ତି,  ଏହି ୧୯ଟି ପ୍ରକଳ୍ପରେ ସ୍ଥାନୀୟ ଏବଂ ରାଜ୍ୟ ଅର୍ଥନୀତି ଅଧିକ ମଜବୁତ ହେବ । ଏହି ସବୁ ପ୍ରକଳ୍ପ ଗୁଡ଼ିକ ଦ୍ଵାରା ଓଡ଼ିଶାରେ ଶିଳ୍ପ, ପର୍ଯ୍ୟଟନ ଓ ସାଧାରଣ ନାଗରିକ ସେବା, ସାମାଜିକ ଅର୍ଥନୈତିକ ବିକାଶରେ ଅନେକ ସହାୟକ ହେବ । ମହାପ୍ରଭୁ ଶ୍ରୀ ଜଗନ୍ନାଥଙ୍କ ଆଶୀର୍ବାଦ ଓ ସାଢ଼େ ୪ କୋଟି ଓଡ଼ିଆ ଲୋକଙ୍କ ଇଚ୍ଛା ଶକ୍ତି କାରଣରୁ ରାଜ୍ୟରେ ଡବଲ ଇଞ୍ଜିନ ସରକାର ହୋଇଛି । ବିଜେପି ସରକାରରେ ଜାତୀୟ ରାଜପଥ, ରେଳ, ବିମାନ ସେବା ଓ ଯୋଗାଯୋଗ ଭିତ୍ତିଭୂମି ସୁଦୃଢ କରିବା ଉପରେ ଅଧିକ ପ୍ରାଥମିକତା ଦିଆଯାଉଛି । ଜନ ଜାତୀୟ ଗୌରବ କରିଡ଼ର, ଶକ୍ତି କରିଡ଼ର, ବନ୍ଦର କରିଡ଼ର ଓ ଶିଳ୍ପ କରିଡ଼ର ବିକଶିତ ହେଉଛି ।

Also read: ୪ ହଜାର କୋଟିର ପ୍ରକଳ୍ପ ଦ୍ୱାରା ଯାତାୟାତ ସୁବିଧା ହେବ ଏବଂ ଅର୍ଥନୈତିକ ବିକାଶ ହେବ : ମୁଖ୍ୟମନ୍ତ୍ରୀ

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ଓଡ଼ିଶାରେ ୪ ହଜାର କିମିରୁ ଅଧିକ ଜାତୀୟ ରାଜପଥ ନିର୍ମାଣ ହୋଇଛି । କୋଷ୍ଟାଲ ହାଇୱେ, କ୍ୟାପିଟାଲ ରିଜିୟନ ରିଙ୍ଗ ରୋଡ଼, ସମ୍ବଲପୁର ରିଙ୍ଗ ରୋଡ଼ ପ୍ରକଳ୍ପ ଓଡ଼ିଶାର ଅର୍ଥନୀତିକୁ ତ୍ୱରାନ୍ୱିତ କରିବ । ମୋଦୀ ଭାରତର ସାମଗ୍ରିକ ବିକାଶକୁ ଆଖି ଆଗରେ ରଖି ପୂର୍ବୋଦୟ ବିକାଶର ପରିକଳ୍ପନା କରିଛନ୍ତି । ଯାହାର କେନ୍ଦ୍ର ବିନ୍ଦୁ ହେଉଛି ଓଡ଼ିଶା । ଆଜି ଶିଳାନ୍ୟାସ ଓ ଲୋକାର୍ପିତ ହୋଇଥିବା ୧୯ଟି ଜାତୀୟ ରାଜପଥ ପ୍ରକଳ୍ପ ପୂର୍ବୋଦୟ ଯୋଜନାରେ ଓଡ଼ିଶାରେ ଯୋଗାଯୋଗ କ୍ଷେତ୍ରରେ ମାଇଲ ଖୁଣ୍ଟ ହେବ । ୨୦୩୬ରେ ଓଡ଼ିଶା ସ୍ଵତନ୍ତ୍ର ପ୍ରଦେଶ ଗଠନ ଏବଂ ୨୦୪୭ରେ ଭାରତ ସ୍ବାଧୀନତାର ୧୦୦ ବର୍ଷ ପୂରଣ କରିବ । ୨୦୪୭ ସୁଦ୍ଧା ଭାରତ ୩୦ ଟ୍ରିଲିଅନ ଅର୍ଥନୀତିରେ ପରିଣତ ହେବାର ଲକ୍ଷ୍ୟ ରହିଛି । ୨୦୩୬ ସୁଦ୍ଧା ଓଡ଼ିଶା ୫୦୦ ବିଲିଅନ ଡଲାର ଏବଂ ୨୦୪୭ ସୁଦ୍ଧା ୧.୫ ଟ୍ରିଲିୟନ ଡଲାର ଅର୍ଥନୀତି ହାସଲ କରିବାର ଲକ୍ଷ୍ୟ ରଖିଛି । 

ଧର୍ମେନ୍ଦ୍ର  କହିଛନ୍ତି,  ବର୍ତ୍ତମାନ ସମୟରେ ରାଜପଥ, ଯୋଗାଯୋଗ ଏବଂ ଆନୁସଙ୍ଗିକ ଭିତ୍ତିଭୂମିକୁ ତ୍ୱରାନ୍ୱିତ କରିପାରିଲେ ହିଁ ବିକଶିତ ଓଡ଼ିଶା ଏବଂ ବିକଶିତ ଭାରତର ସ୍ବପ୍ନ ସାକାର ହୋଇପାରିବ । ବର୍ତ୍ତମାନ ବିଶ୍ୱରେ ରୋଡ଼ ସେଫ୍ଟି ଜରୁରୀ ହୋଇପଡିଛି । ଏଭଳି ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ମାର୍ଗ ଦର୍ଶନ ଏବଂ କେନ୍ଦ୍ର ମନ୍ତ୍ରୀ ନୀତିନ ଗଡକରୀଙ୍କ ନେତୃତ୍ୱରେ କେନ୍ଦ୍ର ଶିକ୍ଷା ବିଭାଗ ସବୁ ସ୍କୁଲରେ ସଚେତନତା ସୃଷ୍ଟି କରିବା ପାଇଁ ସଡକ ସୁରକ୍ଷା ଅଭିଯାନରେ ସାମିଲ ହୋଇଛି । ସ୍କୁଲ ଶିକ୍ଷା କ୍ଷେତ୍ରରେ ସଡ଼କ ସୁରକ୍ଷା ଅଭିଯାନର ସଚେତନତାକୁ ଜନ ଆନ୍ଦୋଳନରେ ପରିଣତ କରିବା ପାଇଁ ଆହ୍ଵାନ କରିଛନ୍ତି  କେନ୍ଦ୍ର ଶିକ୍ଷା ମନ୍ତ୍ରୀ।