ନୂଆଦିଲ୍ଲୀ: କ୍ରିକେଟ୍ ଜଗତରେ ଗତ ଦେଢ ଦଶନ୍ଧି ଧରି ୪ ବ୍ୟାଟର ନିଜର ଜଲଓ୍ଵା ଦେଖାଇ ଆସିଛନ୍ତି। ଜୋ ରୁଟ୍, କେନ ଓ୍ଵିଲିୟମସନ, ଷ୍ଟିଭ ସ୍ମିଥ ଓ ବିରାଟ କୋହଲି ଗତ ୧୫ ବର୍ଷ ଧରି କ୍ରିକେଟ୍ ଜଗତକୁ ମନୋରଞ୍ଜନ କରି ଆସିଛନ୍ତି। ହେଲେ ଏହି ଚାରି ଖେଳାଳି ଦୀର୍ଘ ସମୟ ହେବ ଶତକ ହାସଲ କରି ନାହାନ୍ତି। ତେବେ ପାକିସ୍ତାନରେ ଖେଳା ଯାଉଥିବା ତ୍ରିରାଷ୍ଟ୍ରୀୟ ସିରିଜ୍ରେ କେନ ଓ୍ଵିଲିୟମସନ ୨୧ ଇନିଂସ ପରେ ଦିନିକିଆରେ ଶତକ ହାସଲ କରିଛନ୍ତି। ସେ ଦକ୍ଷିଣ ଆଫ୍ରିକା ବିପକ୍ଷରେ ଅପରାଜିତ ୧୩୩ ରନର ଇନିଂସ ଖେଳି ଦଳକୁ ଜିତାଇଛନ୍ତି। ମାତ୍ର ଫାବ୍-୪ରେ ସାମିଲ ବିରାଟ କୋହଲି, ଜୋ ରୁଟ୍ ଓ ଷ୍ଟିଭ୍ ସ୍ମିଥ ଦୀର୍ଘ ମାସ ହେବ ଦିନିକିଆରେ ଶତକ ଅର୍ଜନ କରି ପାରି ନାହାନ୍ତି।
ବିରାଟ କୋହଲି
କୋହଲି ଗତ ୪୫୩ ଦିନ ହେବ ଦିନିକିଆରେ କୌଣସି ଶତକ ହାସଲ କରି ପାରି ନାହାନ୍ତି। ଏହାର ମୁଖ୍ୟ କାରଣ ଭାରତୀୟ ଦଳ ୨୦୨୪ରେ ମାତ୍ର ତିନୋଟି ଦିନିକିଆ ଖେଳିଥିଲା। ବିରାଟ ନିଜର ଶେଷ ତଥା ୫୦ତମ ଶତକ ୨୦୨୩ ବିଶ୍ଵକପରେ ନ୍ୟୁଜିଲାଣ୍ଡ ବିପକ୍ଷରେ ହାସଲ କରିଥିଲେ।
ଷ୍ଟିଭ୍ ସ୍ମିଥ
ଟେଷ୍ଟ କ୍ରିକେଟ୍ରେ ଦମଦାର ଫର୍ମ ଦେଇ ଗତି କରୁଥିବା ସ୍ମିଥ ଗତ ୮ଟି ଟେଷ୍ଟ ଇନିଂସରୁ ୪ଟି ଟେଷ୍ଟରେ ଶତକ ଅର୍ଜନ କରିଥିଲେ। ମାତ୍ର ଦିନିକିଆରେ ସେ ୮୮୩ ଦିନ ହୋଇଯିବ ଶତକଟିଏ ହାସଲ କରି ପାରି ନାହାନ୍ତି। ସ୍ମିଥ ନିଜର ଶେଷ ଦିନିକିଆ ଶତକ ୨୦୨୨ ସେପ୍ଟେମ୍ବରରେ ନ୍ୟୁଜିଲାଣ୍ଡ ବିପକ୍ଷରେ କରିଥିଲେ। ସ୍ମିଥଙ୍କ ବ୍ୟାଟରୁ ୧୦୫ ରନର ଶତକୀୟ ପାଳି ଦେଖିବାକୁ ମିଳିଥିଲା। ସ୍ମିଥ ଏ ପର୍ଯ୍ୟନ୍ତ ଦିନିକିଆରେ ୧୨ ଶତକ ହାସଲ କରି ସାରିଛନ୍ତି।
ଜୋ ରୁଟ୍
୨୦୨୪ରେ ଟେଷ୍ଟ କ୍ରିକେଟରେ ସର୍ବାଧିକ ରନ କରିଥିବା ଖେଳାଳି ଜୋ ରୁଟ୍ ଦିନିକିଆ ଫର୍ମାଟ୍ରେ ଶତକ ଅପେକ୍ଷାରେ ରହିଛନ୍ତି। ବର୍ଷେ କି ଦୁଇ ବର୍ଷ ନୁହେଁ ବରଂ ପାଞ୍ଚ ବର୍ଷ ହେବ ସେ ଶତକୀୟ ହାସଲ କରି ପାରି ନାହାନ୍ତି। ରୁଟ ଗତ ୪ ବର୍ଷରେ ଟେଷ୍ଟରେ ୧୯ ଶତକ ହାସଲ କରି ସାରିଛନ୍ତି। ମାତ୍ର ୨ ହଜାର ୬୮ ଦିନ ହେବ ସେ ଦିନିକିଆରେ ଶତକ ମାରି ପାରି ନାହାନ୍ତି। ସେ ନିଜର ଶେଷ ଦିନିକିଆ ଶତକ ୨୦୧୯ ଜୁନରେ ଓ୍ଵେଷ୍ଟଇଣ୍ଡିଜ ବିପକ୍ଷରେ କରିଥିଲେ।
