ଛତ୍ରପୁର ୧୩।୬: ମିଳୁନି ପାନୀୟ ଜଳ । ଟୋପାଏ ପାଣି ପାଇଁ ଡହଳବିକଳ । ବହୁ ବାର ଅଭିଯୋଗ ପରେ ବି କେହି ଶୁଣିଲେନି । ଶେଷରେ ହାଣ୍ଡି-ମାଠିଆ ରଖି ରାସ୍ତାରୋକ କଲେ ମହିଳା । ଏଭଳି ଘଟଣା ଗଞ୍ଜାମ ବ୍ଲକ ହୁମ୍ମାରେ ଦେଖିବାକୁ ମିଳିଛି ।
ସୂଚନାଯୋଗ୍ୟ ଯେ, ଗଞ୍ଜାମ ବ୍ଲକ ହୁମ୍ମା ପଞ୍ଚାୟତ ହୁମ୍ମା ଗ୍ରାମରେ ଦୀର୍ଘ ୨ ମାସରୁ ଉର୍ଦ୍ଧ୍ବ ସମୟ ଧରି ପାନୀୟ ଜଳର ସମସ୍ୟା ଲାଗି ରହିଥିଲା । ସମସ୍ୟାର କୌଣସି ସମାଧାନ ନହେବାରୁ ମହିଳାମାନେ ହାଣ୍ଡି, ମାଠିଆ ଧରି ରାସ୍ତାରୋକ କରିଥିଲେ । ପୁରୁଷୋତ୍ତମପୁରରୁ ହୁମ୍ମା ମୁଖ୍ୟରାସ୍ତା ଅବରୋଧ କରିଥିଲେ ମହିଳା l ପ୍ରବଳ ଗ୍ରୀଷ୍ମ ପ୍ରବାହ ଅନୁଭୂତ ହେଉଥିବା ବେଳେ ଗ୍ରାମକୁ ଦୀର୍ଘ ଦିନ ଧରି ପାନୀୟ ଜଳ ଆସୁନଥିବାରୁ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଥିବା ସେମାନେ ଅଭିଯୋଗ କରିଛନ୍ତି l ବିଭାଗୀୟ ଅଧିକାରୀଙ୍କୁ ଅଭିଯୋଗ କଲେ ମଧ୍ୟ କେହି ଶୁଣୁନଥିବାରୁ ଶେଷରେ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିଥିଲେ ବୋଲି ମହିଳା ମାନେ କହିଥିଲେ । ଖବର ପାଇଁ ହୁମ୍ମା ଫାଣ୍ଡି ଥାନା ପୋଲିସ ଓ ଜଳ ବିଭାଗ ଯନ୍ତ୍ରୀ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ କିଛି ଦିନ ମଧ୍ୟରେ ସମସ୍ୟାର ସମାଧାନ କରାଯିବ ବୋଲି ପ୍ରତିଶୃତି ଦେଇଥିଲେ । ପ୍ରତିଶ୍ରୁତି ପରେ ଗ୍ରାମବାସୀ ମାନେ ଆନ୍ଦୋଳନରୁ ଓହରିଥିଲେ । ପ୍ରାୟ ୧ ଘଣ୍ଟା ପର୍ଯ୍ୟନ୍ତ ପାଣି ପାଇଁ ରାସ୍ତାରୋକ ହୋଇଥିଲା । ଯାହାଫଳରେ ବହୁ ଗାଡି ଅଟକ ରହିଥିଲା ।
You Can Read :
