ନୂଆଦିଲ୍ଲୀ: ଅନେକ ଦିନର ହଙ୍ଗାମା ପରେ ଲୋକସଭାରେ ବୁଧବାର ରେଳ (ସଂଶୋଧନ) ବିଧେୟକ ୨୦୨୪ ପାରିତ ହୋଇଛି । ରେଳ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଛନ୍ତି ଯେ ଅନେକ ସାଂସଦ ରେଲୱେର ଘରୋଇକରଣ ହେଉଥିବା ଭ୍ରାନ୍ତି ସୃଷ୍ଟି କରିବା ପାଇଁ ଉଦ୍ୟମ କରିଛନ୍ତି । କିନ୍ତୁ ଏହି ବିଧେୟକ ଦ୍ୱାରା ରେଲୱେର ଘରୋଇକରଣ ଏବଂ କେନ୍ଦ୍ରୀକରଣ ହେବାର କୌଣସି ପ୍ରଶ୍ନ ଉଠୁ ନାହିଁ ବୋଲି ରେଳମନ୍ତ୍ରୀ ଗୃହକୁ ଭରସା ଦେଇଛନ୍ତି ।
ରେଳ ମନ୍ତ୍ରୀ ବିରୋଧୀଙ୍କୁ ଟାର୍ଗେଟ୍ କରି କହିଛନ୍ତି ଯେ ଆପଣମାନଙ୍କ ସମ୍ୱିଧାନକୁ ନେଇ ମିଛ ପ୍ରଚାର ଫେଲ୍ ହୋଇଛି । ଏବେ ରେଲୱେର ଘରୋଇକରଣ ନେଇ ମିଛ ପ୍ରଚାର ପାଇଁ ଦୟାକରି ଉଦ୍ୟମ କରିବେ ନାହିଁ । ଏହା ଉପରେ ବିରୋଧୀ କିଛି ସମୟ ହଙ୍ଗାମା କରିଥିଲେ । ଏସବୁ ଭିତରେ ରେଳ ମନ୍ତ୍ରୀ ନୂଆ ବିଧେୟକ ଏବଂ ସାଂସଦଙ୍କ ଦ୍ୱାରା କରାଯାଇଥିବା ପ୍ରଶ୍ନର ଜବାବ ଦେଇ ଚାଲିଥିଲେ । କେନ୍ଦ୍ରମନ୍ତ୍ରୀ କହିଛନ୍ତି ଯେ ଦେଶରେ ପ୍ରତିରକ୍ଷା ଏବଂ ରେଲୱେକୁ ରାଜନୀତିଠାରୁ ଦୂରରେ ରଖି ଆଗକୁ ବଢିବାର ଆବଶ୍ୟକତା ରହିଛି । ନୂଆ ବିଧେୟକ ପ୍ରକ୍ରିୟା ସରଳୀକରଣର କାମ କରିବ ବୋଲି ମନ୍ତ୍ରୀ କହିଛନ୍ତି ।
ରେଲୱେ ବୋର୍ଡ ଆଇନ ୧୯୦୫ ମସିହାରେ ଆସିଥିଲା ଏବଂ ୧୯୮୯ରେ ରେଲୱେ ଅଧିନିୟମ ଆସିଥିଲା । ଦୁଇ ଅଲଗା-ଅଲଗା ଆଇନ ପରିବର୍ତ୍ତେ ଗୋଟିଏ ଆଇନ ହେବା ଭଲ ହୋଇଥାଏ । ଆଇନଗତ ପ୍ରକ୍ରିୟାକୁ ସରଳ କରିବା ଉଦ୍ଦେଶ୍ୟରେ ଏହି ନୂଆ ରେଳ (ସଂଶୋଧନ) ବିଧେୟକ ୨୦୨୪ ଅଣାଯାଇଛି । ଅଶ୍ୱିନୀ ବୈଷ୍ଣବ କହିଛନ୍ତି ଯେ ପ୍ରଧାନମନ୍ତ୍ରୀ ମୋଦୀଙ୍କ କାର୍ଯ୍ୟକାଳରେ ରେଲୱେର ବ୍ୟାପକ ସ୍ତରରେ ବିକେନ୍ଦ୍ରୀକରଣ ହୋଇଛି ।
ଆଗ ଜିଏମ୍ ପାଖରେ ଅତି କମ ଅଧିକାର ରହୁଥିଲା, ଆଜି କିନ୍ତୁ କୌଣସି ବି ପ୍ରୋଜେକ୍ଟ ପାଇଁ ଟେଣ୍ଡର ପ୍ରୋସେସ୍ କରିବାର ଅଧିକାର ଜିଏମଙ୍କ ପାଖରେ ରହିଛି । ଡିଆରଏମ୍ ଏବଂ ଅନ୍ୟ ଅଧିକାରୀଙ୍କ କ୍ଷମତା ମଧ୍ୟ ବଢାଯାଇଛି । କେନ୍ଦ୍ରମନ୍ତ୍ରୀ କହିଛନ୍ତି ଯେ ଏହି ବିଲ୍ ଦ୍ୱାରା ପାର୍ଲାମେଣ୍ଟର ଭୂମିକା ହ୍ରାସ ହେବ ନାହିଁ । ସଂସଦର ଅଧିକାର ପୂର୍ବ ପରି ଅପରିବର୍ତ୍ତିତ ରହିବ । ବିଲ୍ ଉପରେ ଚର୍ଚ୍ଚା ବେଳେ ୭୨ ଜଣ ସାଂସଦ ଭାଗ ନେଇଥିଲେ । ବିଧେୟକ ଉପରେ ଡିସେମ୍ୱର ୪ରେ ଗୃହରେ ହୋଇଥିବା ଚର୍ଚ୍ଚାରେ ଭାଗ ନେଇ ସରକାର ରେଲୱେର ଘରୋଇକରଣ କରୁଥିବା ଅନେକ ବିରୋଧୀ ସାଂସଦ ଅଭିଯୋଗ କରିଥିଲେ ।
