କଟକ ୨୪/୪: ଚିନ୍ତା ବଢାଉଛି ପାଣିରେ ବୁଡି ପ୍ରାଣହାନୀ ମାମଲା । ପ୍ରତିବର୍ଷ ନଈସୂଅରେ ଚାଲିଯାଉଛି ଅମୂଲ୍ୟ ଜୀବନ । କେବେ ପୁରୁଷ କେବେ ମହିଳା । କେବେ ଛୋଟ ପିଲା ତ କେତେବେଳେ ଭେଣ୍ଡିଆ । ପ୍ରତିଦିନ ଏମିତି ଅନେକ ଜୀବନ ସଲିଳ ସମାଧି ହେଉଥିବା ଖବର ସାମ୍ନାକୁ ଆସୁଛି । ଗୁରୁବାର କଟକ ଶିଖରପୁର ଠାରେ ମହାନଦୀରେ ବୁଡିଯାଇଛନ୍ତି ୨ ଜଣ ।
ଦିନ ପ୍ରାୟ ୨ଟା ସମୟ । ଯୋବ୍ରା ଅଞ୍ଚଳର ୬ଜଣ ଯୁବକ ନଦୀକୁ ଗାଧୋଇବାକୁ ଆସିଥିଲେ । ତେବେ ଗାଧୋଉ ଗାଧୋଉ ୩ ଜଣ ପାଣି ସୁଅରେ ଭାସିଯାଇଥିଲେ । ଗାଁ ଲୋକଙ୍କ ଠାରୁ ଖବର ପାଇ ଘଟଣାସ୍ଥଳରେ ପହଞ୍ଚିଥିଲା ଅଗ୍ନିଶମ ବାହିନୀ ଓ ପୋଲିସ । ସ୍ଥାନୀୟ ଲୋକେ ଜଣେ ଯୁବକଙ୍କୁ ଜୀବନ୍ତ ଉଦ୍ଧାର କରିଥିବାବେଳେ ଆଉ ୨ ଜଣଙ୍କ ମୃତଦେହ ଉଦ୍ଧାର କରିଥିଲେ ଅଗ୍ନିଶମ ବାହିନୀ । ମୃତକଙ୍କ ମଧ୍ୟରେ ଜଣେ ନାବାଳକ ଥିବାବେଳେ ଜଣେ ସାବାଳକ । ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୁଳ ପରିବେଶ ସୃଷ୍ଟି ହୋଇଛନ୍ତି । ନଦୀରେ ଗାଧୋଇବାକୁ ଯିବାବେଳେ ସତର୍କତା ଅବଲମ୍ବନ କରିବାକୁ ନିର୍ଦ୍ଦେଶ ଦେଇଛନ୍ତି କଟକ ଡିସିପି ଋଷିକେଶ ଖିଲାରୀ ।
