ନୂଆଦିଲ୍ଲୀ 04/04 : ବିଶ୍ୱ ଉପରେ ବଢ଼ୁଛି ସଙ୍କଟ। ୨୦୩୦ ସୁଦ୍ଧା ୩୦ ଲକ୍ଷରୁ ଅଧିକ ଲୋକ ମୃତ୍ୟୁର ସାମ୍ନା କରିପାରନ୍ତି। ଏକ ଅଧ୍ୟୟନ ଅନୁଯାୟୀ, ସତର୍କ ସୂଚନା ଜାରି କରିଛନ୍ତି ବୈଜ୍ଞାନିକମାନେ । ଏଚ୍ଆଇଭି ନିବାରଣ ଏବଂ ଚିକିତ୍ସା କାର୍ଯ୍ୟକ୍ରମ ପାଇଁ ଅନ୍ତର୍ଜାତୀୟ ପାଣ୍ଠିରେ ହ୍ରାସ ଏକ ଗମ୍ଭୀର ସଙ୍କଟ ସୃଷ୍ଟି କରିପାରେ। ଏଚ୍ଆଇଭି ନିବାରଣ ଏବଂ ଚିକିତ୍ସା କାର୍ଯ୍ୟକ୍ରମ ପାଇଁ ଅନ୍ତର୍ଜାତୀୟ ପାଣ୍ଠିରେ ହ୍ରାସ ଘଟିଲେ ୨୦୩୦ ସୁଦ୍ଧା ୧ କୋଟିରୁ ଅଧିକ ସଂକ୍ରମଣ ଏବଂ ପ୍ରାୟ ୩୦ଲକ୍ଷ ଲୋକଙ୍କର ମୃତ୍ୟୁ ଘଟିପାରେ। ଲାନସେଟ ଏଚ୍ଆଇଭି ଜର୍ଣ୍ଣାଲରେ ପ୍ରକାଶିତ ଏକ ଅଧ୍ୟୟନରେ ଏମିତି କିଛି ତଥ୍ୟ ଆସିଛି ସାମ୍ନାକୁ।
ଅଷ୍ଟ୍ରେଲିଆର ମେଲବର୍ଣ୍ଣର ବର୍ନେଟ ଇନ୍ଷ୍ଟିଚ୍ୟୁଟ୍ର ଗବେଷକମାନଙ୍କ ଦ୍ୱାରା ଏହି ଅଧ୍ୟୟନ କରାଯାଇଛି। ଯେଉଁଥିରେ ୨୦୨୬ ସୁଦ୍ଧା ବିଶ୍ୱବ୍ୟାପୀ HIV ପାଣ୍ଠିରେ ପ୍ରାୟ ୨୪ ପ୍ରତିଶତ ହ୍ରାସର ପ୍ରଭାବ ବିଶ୍ଳେଷଣ କରାଯାଇଛି। ତେବେ ଆମେରିକା, ବ୍ରିଟେନ, ଫ୍ରାନ୍ସ, ଜର୍ମାନୀ ଏବଂ ନେଦରଲାଣ୍ଡ ସମେତ ପ୍ରମୁଖ ଦାତାମାନେ ୮ରୁ ୭୦ପ୍ରତିଶତ ପର୍ଯ୍ୟନ୍ତ ସହାୟତା କାଟ୍ ଘୋଷଣା କରିବା ପରେ ଏହି ଅଧ୍ୟୟନ କରାଯାଇଛି। କାହିଁକିନା ଏହି ପାଞ୍ଚଟି ଦେଶ ବିଶ୍ୱର ୯୦ପ୍ରତିଶତରୁ ଅଧିକ ଏଚ୍ଆଇଭି ସହାୟତା ପାଇଁ ପାଣ୍ଠି ଯୋଗାଇଥାନ୍ତି। ଗବେଷକଙ୍କ ମତରେ, ଯଦି ଆମେରିକା ଏବଂ ବ୍ରିଟେନ ସମେତ ପାଞ୍ଚଟି ପ୍ରମୁଖ ଦାତା ଦେଶ ଦ୍ୱାରା ପ୍ରସ୍ତାବିତ ପାଣ୍ଠି ହ୍ରାସକୁ କମ୍ କରା ନ ଯାଏ, ତେବେ ୨୦୨୫ରୁ ୨୦୩୦ ମଧ୍ୟରେ ଅତିରିକ୍ତ ୪.୪ରୁ ୧୦.୮ ନିୟୁତ ନୂତନ ଏଚ୍ଆଇଭି ସଂକ୍ରମଣ ଏବଂ ୭୭୦,୦୦୦ରୁ ୨.୯ ନିୟୁତ ମୃତ୍ୟୁ ହୋଇପାରେ।
HIV ପାଣ୍ଠିରେ ବିଶ୍ୱର ସବୁଠାରୁ ବଡ଼ ଯୋଗଦାନକାରୀ ଆମେରିକା। ହେଲେ ଆମେରିକାର ନୂଆ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଶପଥ ଗ୍ରହଣ ପରେ ଜାନୁଆରୀ ୨୦ରେ ସମସ୍ତ ସହାୟତା ବନ୍ଦ କରିଦେଇଥିଲା। ଅଧ୍ୟୟନ ଅନୁଯାୟୀ, ରାଷ୍ଟ୍ରପତିଙ୍କ ଏଡ୍ସ ରିଲିଫ ପାଇଁ ଜରୁରୀକାଳୀନ ଯୋଜନା (PEPFAR) ଗାଏବ ଏବଂ ଅନ୍ୟାନ୍ୟ ପାଣ୍ଠି ହ୍ରାସ ୨୦୩୦ ସୁଦ୍ଧା HIV/AIDS ଦୂର କରିବା ଦିଗରେ ଅଗ୍ରଗତିକୁ ବାଧା ଦେଇପାରେ।
ଏଚଆଇଭି ଚିକିତ୍ସା ଏବଂ ନିବାରଣକୁ ଉନ୍ନତ କରିବା ପାଇଁ ବିଶ୍ୱସ୍ତରୀୟ ପ୍ରୟାସରେ ଆମେରିକା ସର୍ବାଧିକ ଅବଦାନ ଦେଇଛି। କିନ୍ତୁ ବର୍ତ୍ତମାନର କଟକଣା ଆଣ୍ଟିରେଟ୍ରୋଭାଇରାଲ ଥେରାପି, ଏଚ୍ଆଇଭି ପରୀକ୍ଷା ଏବଂ ନିବାରଣ ଭଳି ଅତ୍ୟାବଶ୍ୟକୀୟ ସେବାଗୁଡ଼ିକର ଉପଲବ୍ଧତାକୁ ବାଧା ଦେଉଛି। ଏମିତି କିଛି କହିଛନ୍ତି ବର୍ନେଟ ଇନଷ୍ଟିଚ୍ୟୁଟର ଲେଖକ ଡକ୍ଟର ଡେବ୍ରା ଟେନ ବ୍ରିଙ୍କ। ଅଧ୍ୟୟନ ଫଳାଫଳରୁ ଜଣାପଡିଛି ଯେ, ଉପ-ସାହାରା ଆଫ୍ରିକା ଏବଂ ନିଶା ଇଞ୍ଜେକ୍ସନ ନେଉଥିବା ଲୋକ, ଯୌନ କର୍ମୀ ଏବଂ ପୁରୁଷମାନଙ୍କ ସହିତ ଯୌନ ସମ୍ପର୍କ ରଖୁଥିବା ପୁରୁଷ ଏବଂ ପିଲାମାନଙ୍କ ଭଳି ଉପେକ୍ଷିତ ଗୋଷ୍ଠୀ ସବୁଠାରୁ ଅଧିକ ପ୍ରଭାବିତ ହେବେ।ପ୍ରତିଷ୍ଠାନର ସହ-ଲେଖକ ଡକ୍ଟର ରୋଓ୍ବାନ ମାର୍ଟିନ-ହ୍ୟୁଜ୍ କହିଛନ୍ତି ଯେ, ଉପ-ସାହାରା ଆଫ୍ରିକାରେ କଣ୍ଡୋମ ବଣ୍ଟନ ଏବଂ ପ୍ରି-ଏକ୍ସପୋଜର ପ୍ରୋଫାଇଲାକ୍ସିସ ଭଳି ଔଷଧ ପ୍ରଦାନ ସମେତ ବ୍ୟାପକ ପ୍ରତିରୋଧ ପ୍ରୟାସରେ ମଧ୍ୟ ହ୍ରାସ ଘଟିବ। ଡକ୍ଟର ବ୍ରିଙ୍କ ଆହୁରି ମଧ୍ୟ କହିଛନ୍ତି ଯେ, ସ୍ଥାୟୀ ଆର୍ଥିକ ସହାୟତା ସୁନିଶ୍ଚିତ କରିବା ଏବଂ ଏଚ୍ଆଇଭି ମହାମାରୀ ପୁନରୁତ୍ଥାନକୁ ରୋକିବା ଅତ୍ୟନ୍ତ ଗୁରୁତ୍ୱପୂର୍ଣ୍ଣ, ନଚେତ ଏହାର ବିନାଶକାରୀ ପରିଣାମ ସାରା ବିଶ୍ୱରେ ଦେଖାଯାଇପାରେ।
