ନୂଆଦିଲ୍ଲୀ ୩୧।୧: ସଂସଦରେ ୩୧ ଜାନୁୟାରୀ ଶୁକ୍ରବାର ଅର୍ଥନୈତିକ ସର୍ଭେ (ଇକୋନମିକ ସର୍ଭେ) ରିପୋର୍ଟ ଉପସ୍ଥାପନ କରାଯାଇଛି। ଏହା ପରେ ସେୟାର ବଜାରରେ ବୃଦ୍ଧି ଦେଖାଯାଇଛି। ଏମିତିରେ ଗତ ୪ ଦିନ ହେଲା ବଜାରରେ ବୃଦ୍ଧି ଜାରି ରହିଛି। ସର୍ଭେ ରିପୋର୍ଟ ଉପସ୍ଥାପନ ପରେ ସବୁ ସେକ୍ଟରରେ ଭଲ କିଣାକିଣି ହୋଇଛି। ତେବେ ବଜାରରେ ଜାରି ବୃଦ୍ଧି ଆଗକୁ ବି ରହିବ କି ନା ସେ ନେଇ ନିବେଶକ କିନ୍ତୁ ଏବେଠୁ ଚିନ୍ତାରେ ରହିଲେଣି।
କାରଣ ଅର୍ଥନୈତିକ ସର୍ଭେ ୨୦୨୫ରେ ସରକାର କିଛି କଥାକୁ ନେଇ ବିପର୍ଯ୍ୟୟର ଆଶଙ୍କା କରିଛନ୍ତି, ଯାହାର ପ୍ରଭାବ ଭାରତୀୟ ସେୟାର ବଜାରରେ ମଧ୍ୟ ଦେଖାଯାଇ ପାରେ। ମୁଖ୍ୟ ଅର୍ଥନୈତିକ ପରାମର୍ଶଦାତା ଭି.ଅନନ୍ତ ନାଗେଶ୍ୱରଙ୍କ ନେତୃତ୍ୱରେ ସର୍ଭେକ୍ଷଣରେ ମଜଭୁତ ଆର୍ଥିକ ବିକାଶ ସହିତ ଭୂ-ରାଜନୈତିକ ଅଶାନ୍ତି, ମୁଦ୍ରାରେ ଜାରି ହ୍ରାସ ସମେତ ବିଭିନ୍ନ ପ୍ରସଙ୍ଗରେ ଫୋକସ କରାଯାଇଛି। ଆର୍ଥିକ ସର୍ଭେକ୍ଷଣ ଅନୁସାରେ ଭାରତୀୟ ସେୟାର ବଜାର ନିମନ୍ତେ ସବୁଠୁ ବଡ଼ ସଂକଟ ଆମେରିକା ସହିତ ସମ୍ପର୍କିତ। ଏଥିରେ ଆମେରିକୀୟ ବଜାରମାନଙ୍କରେ କରେକ୍ସନକୁ ନେଇ ଆଶଙ୍କା ପ୍ରକଟ କରାଯାଇଛି।
ଭାରତୀୟ ସେୟାର ବଜାର ସନ୍ଦର୍ଭରେ ଯାହାର ବହୁତ ଖରାପ ପ୍ରଭାବ ବି ଦେଖିବାକୁ ମିଳିପାରେ। ଖାସ କରି ନୂଆ ରିଟେଲ ନିବେଶକ ଯେଉଁମାନେ କରୋନା କାଳ ପୂର୍ବରୁ ବା ପରେ ବଜାରକୁ ଓହ୍ଲାଇଛନ୍ତି ସେମାନଙ୍କୁ ଭୟାନକ ପରିସ୍ଥିତିର ସମ୍ମୁଖୀନ ହେବାକୁ ପଡିପାରେ। ସର୍ଭେ ଅନୁସାରେ ଆମେରିକା ୨୦୨୫ରେ ସମ୍ଭାବିତ କରେକ୍ସନ କରିପାରେ, ଯାହାର ପ୍ରଭାବ ଭାରତୀୟ ସେୟାର ବଜାର ଉପରେ ମଧ୍ୟ ପଡିପାରେ। ଖାସ କରି ୟଙ୍ଗ ଇନଭେଷ୍ଟରଙ୍କ ଉପରେ ଏହାର ପ୍ରଭାବ ଦେଖିବାକୁ ମିଳିପାରେ, ଯେଉଁମାନେ କରୋନା ମହାମାରୀ ପରେ ସେୟାର ବଜାରକୁ ଆସିଥିଲେ।
ଉଲ୍ଲେଖଯୋଗ୍ୟ ଯେ ଗତ ୫ ବର୍ଷରେ ରିଟେଲ ନିବେଶକଙ୍କ ଭାଗିଦାରୀ ସଂଖ୍ୟା ଓ ଟ୍ରେଡିଂ ବେଶ୍ ବୃଦ୍ଧି ହୋଇଛି। ନ୍ୟାସନାଲ ଷ୍ଟକ ଏକ୍ସଚେଞ୍ଜରେ ୟୁନିକ୍ ଇନଭେଷ୍ଟର ବେସ୍ ଅଗଷ୍ଟ ୨୦୨୪ରେ ୧୦ କୋଟି ପାର ହୋଇଯାଇଥିଲା। ଏହା ଗତ ୪ ବର୍ଷରେ ୩ ଗୁଣା ହୋଇଛି। ତେବେ ଭାରତ ଓ ଆମେରିକା ମଧ୍ୟରେ ମାର୍କେଟ କରେକ୍ସନର କନେକ୍ସନ ବେଶ୍ ପୁରୁଣା। ମିଣ୍ଟ ରିପୋର୍ଟ ଅନୁସାରେ ଆମେରିକା ସେୟାର ବଜାରରେ ମୁଭମେଣ୍ଟର ପ୍ରଭାବ ଭାରତୀୟ ସେୟାର ବଜାରରେ ସିଧାଶଳଖ ଦେଖାଯାଏ।
ଅର୍ଥମନ୍ତ୍ରୀ ନିର୍ମଳା ସୀତାରମଣ ଶୁକ୍ରବାର ସଂସଦରେ ଆର୍ଥିକ ସର୍ଭେକ୍ଷଣ ରିପୋର୍ଟ ୨୦୨୫ ଉପସ୍ଥାପିତ କରିଛନ୍ତି। ଏଥିରେ ୨୦୨୬ ଆର୍ଥିକ ବର୍ଷରେ ବାସ୍ତବିକ ଜିଡିପି ଅଭିବୃଦ୍ଧି ୬.୩-୬.୮ ଆକଳନ କରାଯାଇଛି। ଅନେକ ଆହ୍ୱାନ ସତ୍ତ୍ୱେ ସରକାର ମଜଭୁତ ଆର୍ଥିକ ଅଭିବୃଦ୍ଧିର ଅନୁମାନ କରିଛନ୍ତି। ଏହି ସବୁ ଆହ୍ୱାନରେ ଗ୍ଲୋବାଲ ଫ୍ୟାକ୍ଟର ମଧ୍ୟ ରହିଛି। ମଜଭୁତ ଗ୍ରୋଥ ଅନୁମାନ କାରଣରୁ କ୍ୟାପେକ୍ସ ବିସ୍ତାର, ମୁଦ୍ରାସ୍ପିତିରେ ହ୍ରାସ ସମେତ ଲିଷ୍ଟେଡ କମ୍ପାନୀଙ୍କ ଭଲ ଫଳାଫଳର ଆକଳନ କରାଯାଉଛି।
