ସାଲେପୁର: ବିଳମ୍ବିତ ରାତିରେ ଘର ସମ୍ମୁଖ ଆଢ଼ୁଆଳରେ ରହି ନାଁ ଧରି ଡ଼ାକିଲେ । କବାଟ ଖୋଲି ଯୁବକ ଜଣକ ପଦାକୁ ଆସିବା ପରେ ତିନି  ଦୁର୍ବୃତ୍ତ ବନ୍ଧୁକ ଦେଖାଇ ଅତର୍କିତ ଭାବେ ବାଡ଼ିରେ ପିଟି ଚାଲିଲେ । ଯୁବକଙ୍କ ଚିତ୍କାର ଶୁଣି ତାଙ୍କୁ ବଞ୍ଚାଇବା ପାଇଁ ଆସିଥିବା ବୁଢା ବାପା ଓ ଭଉଣୀ ଙ୍କୁ ବି ଛାଡ଼ି ନଥିଲେ । ସମସ୍ତଙ୍କୁ ଗୋରୁ ଗାଈ ଭଳି ପିଟି ଗୋଡ ହାତ ଭାଙ୍ଗି ଦେଇଥିଲେ । ଏଭଳି ଘଟଣା ଘଟିଛି କଟକ ଜିଲ୍ଲା ସାଲେପୁର ଥାନା କୋଲଣପୁର ଗାଁ ରେ । 

ଅଭିଯୋଗ ମୁତାବକ ଗତକାଲି ରାତି ୧୦ ରୁ ୧୧ରାତି ମଧ୍ୟରେ କୋଲଣପୁର ଗାଁର ଦିଲ୍ଲୀପ କୁମାର ବେହେରା ଘରେ ଶୋଇଥିବା ବେଳେ ତାଙ୍କ ଦାଣ୍ଡ ଦୁଆର ମୁହଁରେ ତାଙ୍କ ନାଁ ଧରି ଅଜଣା ଦୁବୃର୍ତ୍ତ ମାନେ ଡାକିଥିଲେ । ଦିଲ୍ଲୀପ ଡାକ ଶୁଣି ଘର କବାଟ ଫିଟାଇବା ବେଳକୁ ତିନିଜଣ ଅଜଣା ଦୁର୍ବୃତ୍ତ ମୁହଁ ମାସ୍ ପିନ୍ଧି ତାଙ୍କୁ ପାଖକୁ ଆସିବାକୁ କହିଥିଲେ । ଦିଲ୍ଲୀପ ପାଖକୁ ଯିବାକୁ ଅରାଜି ହେବାରୁ ସେମାନେ ଅଚାନକ ସାଙ୍ଗରେ ପୂର୍ବ ପ୍ରସ୍ତୁତି କ୍ରମେ ଆଣିଥିବା ବାଡ଼ିରେ ମରଣାତ୍ମକ ଆକ୍ରମଣ କରିଥିଲେ । 

Also read: ପୋଲିସକୁ ସଫଳତା, ବନ୍ଧାହେଲା ହାର୍ଡକୋର ମାଓବାଦୀ

ଚିତ୍କାର ଶୁଣି ବାପା ଓ ଭଉଣୀ ବଞ୍ଚାଇବା କୁ ଆସିବାରୁ ସେମାନଙ୍କୁ ଦୁବୃର୍ତ୍ତ ମାନେ ବନ୍ଧୁକ ଦେଖାଇ ଭୟଭୀତ କରାଇବା ସହ  ଦିଲ୍ଲୀପ ଙ୍କ ସହ ତାଙ୍କ ବାପା ଭଉଣୀଙ୍କୁ ଗୋରୁ ଗାଈ ଭଳି ବାଡେଇ ପକାଇଥିଲେ । ଆଉ ସେମାନଙ୍କ ପରିବାରକୁ ଜୀବନରୁ ମାରିଦେବା କୁ ଧମକ ଦେଇ ଚାଲି ଯାଇଥିଲେ।  

ଏନେଇ ଦିଲ୍ଲୀପ ଙ୍କ ପୁରା ପରିବାର  ସାଲେପୁର ଥାନାର ଦ୍ବାରସ୍ଥ ହୋଇଛନ୍ତି। ତେବେ ତାଙ୍କ ଜୀବନ ପ୍ରତି ବିପଦ ରହିଛି ଏବଂ ଏହି ଆକ୍ରମଣ ପଛରେ ପୂର୍ବ ଶତ୍ରୁତା ଓ ପଡ଼ୋଶୀଙ୍କ ହାତ ରହିଥିବା ସନ୍ଦେହ କରି ଥାନାରେ ଏତଲା ଦେଇଛନ୍ତି ବୋଲି ଦିଲ୍ଲୀପ ଓ ତାଙ୍କ ବାପା ଭଉଣୀ କହିଛନ୍ତି । ଅନ୍ୟପଟେ ସାଲେପୁର ପୋଲିସ ଏତଲାକୁ ଗ୍ରହଣ କରି ଏକ କେସ ରୁଜୁ କରି ତଦନ୍ତ ଆରମ୍ଭ କରିଛି ।