ଜଗତସିଂହପୁର ୦୪।୦୧: ଜଗତସିଂହପୁର ବଡ଼ବାଗ ଗାଁରେ ବାଣ ବିସ୍ଫୋରଣ ଘଟଣା। ଶୁକ୍ରବାର ଜଣଙ୍କର ମୃତ୍ୟୁ ହୋଇଥିବା ବେଳେ ଏବେ ଏହି ଘଟଣାରେ ଯାଇଛି ଆଉ ଜଣଙ୍କର ଜୀବନ । ମୃତକ ଦୁଇ ଜଣ ହେଲେ ବଡ଼ବାଗ ଗାଁର ରାଜେଶ ଦାସ ଏବଂ ତାଙ୍କ ସ୍ତ୍ରୀ ରାନୀ ଦାସ । ବାକି ଅନ୍ୟ ଦୁଇ ଜଣ ଗୁରୁତର ଥିବା ଜଣାପଡିଛି । ସେମାନଙ୍କୁ ଚିକିତ୍ସା ନିମନ୍ତେ କଟକ ସ୍ଥାନାନ୍ତରିତ କରାଯାଇଛି ।
ଖବର ଅନୁଯାୟୀ, ଶୁକ୍ରବାର ରାତିରେ ଜଗତସିଂହପୁର ବଡବାଗ ଗାଁରେ ବାଣ ବିସ୍ଫୋରଣ ଘଟିଥିଲା । ଯେଉଁଥିରେ ପୂରା ଗାଁ ଥରି ଉଠିଥିଲା । ବିସ୍ଫୋରଣ ଏତେ ଭୟଙ୍କର ଥିଲା ଯେ, ଏକ କୋଠା ଘର ଭଶୁଡ଼ି ପଡ଼ିଥିଲା । ଦୁର୍ଘଟଣା ବେଳେ ଘର ଭିତରେ ଦୁଇ ଭାଇ ଏବଂ ସେମାନଙ୍କ ସ୍ତ୍ରୀଙ୍କୁ ମିଶାଇ ୪ ଜଣ ଥିଲେ । ସମସ୍ତେ ଶୋଇଥିବା ବେଳେ କୋଠା ଘରଟି ଭୁଶୁଡି ପଡିଥିଲା ।ତେବେ ଏହି ଅଘଟଣ ପରେ ଅଗ୍ନିଶମ ବାହିନୀ, ଓଡ୍ରାଫ ଓ ସଦର ପୋଲିସ ମିଳିତ ଭାବେ ଉଦ୍ଧାର କାର୍ଯ୍ୟ ଆରମ୍ଭ କରିଥିଲା । ଦୁଇ ଘଣ୍ଟାରୁ ଅଧିକ ସମୟର ଅକ୍ଲାନ୍ତ ପରିଶ୍ରମ ପରେ ସମସ୍ତଙ୍କୁ ଉଦ୍ଧାର କରାଯାଇଥିଲା ।
ସେପଟେ ଏହି ଅଘଟଣରେ ଶୁକ୍ରବାର ରାତିରେ ଜଣଙ୍କର ମୃତ୍ୟୁ ହୋଇଯାଇଥିଲା । ଏବେ ଆଉ ଜଣଙ୍କର ମୃତ୍ୟୁ ହୋଇଛି। ମୃତକ ଦୁଇ ଜଣ ରାଜେଶ ଦାସ ଓ ତାଙ୍କ ସ୍ତ୍ରୀ ରାନୀ ଦାସ । ସେହିପରି ଗୁରୁତର ଥିବା ଦୁଇ ଜଣ ହେଲେ ରାଜେଶଙ୍କ ମଝିଆଁ ଭାଇ ପରେଶ ଦାସ ଓ ତାଙ୍କ ପତ୍ନୀ ଲକ୍ଷ୍ମୀପ୍ରିୟା ଦାସ । ଗାଁ ଭିତରେ ଏତେ ପରିମାଣର ବିସ୍ପୋରକ ସାମଗ୍ରୀ କିପରି ଆଣି ରଖିଥିଲେ । ତାକୁ ନେଇ ସନ୍ଦେହ ସୃଷ୍ଟି ହୋଇଛି ।
