ପାଟନା: ଜିଲ୍ଲା ଶିକ୍ଷାଧିକାରୀଙ୍କ ଘରେ ପୁଳା ପୁଳା ଟଙ୍କା । ନୋଟ୍ ଦେଖି ଭିଜିଲାନ୍ସ ଅଧିକାରୀଙ୍କ ଉଡ଼ିଗଲା ହୋସ୍ । ଟଙ୍କା ହାତରେ ଗଣି ପାରିଲେନାହିଁ, ଶେଷରେ ମେସିନ୍ ମଗାଇବାକୁ ପଡ଼ିଲା । ବିହାରରୁ ସାମ୍ନାକୁ ଆସିଛି ଏଭଳି ଦୃଶ୍ୟ । ବେତିହା ଜିଲ୍ଲାର ଶିକ୍ଷା ଅଧିକାରୀ ରଜନୀକାନ୍ତ ପ୍ରବୀଣଙ୍କ ଘରେ ଗୁରୁବାର ଭିଜିଲାନ୍ସ ରେଡ୍ ମାରିଥିଲା । ଏହି ଚଢ଼ାଉ ଆୟବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ହୋଇଥିଲା । ମାତ୍ର ରେଡ୍ ବେଳେ ଡିଇଓଙ୍କ ଘରୁ ପୁଳା ପୁଳ ନଗଦ ଟଙ୍କା ମିଳିଛି । ତାଙ୍କ ଶୋଇବା ବେଡ୍ ତଳେ ବିଡ଼ା ବିଡ଼ା ଟଙ୍କା ଲୁଚାଇ ରଖିଥିଲେ ଶିକ୍ଷା ଅଧିକାରୀ ।
ରଜନୀକାନ୍ତ ପ୍ରବୀଣ ଗତ ତିନି ବର୍ଷ ହେଲା ବେତିହା ଜିଲ୍ଲାରେ ଶିକ୍ଷାଧିକାରୀ ଭାବେ କାର୍ଯ୍ୟରତ ରହିଛନ୍ତି । ବସନ୍ତ ବିହାରରେ ଥିବା ବାସଭବନରେ ପୋଲିସ ସହିତ ଭିଜିଲାନ୍ସ ଟିମ୍ ରେଡ୍ ମାରିଥିଲା । ଏବେବି ଡିଇଓ ଘରେ ଛାନଭୀନ ଜାରି ରହିଛି । ବର୍ତ୍ତମାନ ସୁଦ୍ଧ କେତେ ଟଙ୍କା ଜବତ ହୋଇଛି ଏନେଇ ଭିଜିଲାନ୍ସ ପକ୍ଷରୁ କୌଣସି ସୂଚନା ମିଳିନାହିଁ । ମାତ୍ର କୋଟିଏରୁ ଉର୍ଦ୍ଧ୍ବ ନଗଦ ଟଙ୍କା ଜବତ ହୋଇଥିବା ସୂଚନା ମିଳିଛି । ଏନେଇ ଭିଜିଲାନ୍ସ ପକ୍ଷରୁ ଟଙ୍କା ଗଣିବା ମେସିନ୍ ମଧ୍ୟ ମଗାଯାଇଛି ।
କିଛି ଦିନ ପୂର୍ବରୁ ବିହାରର ଶିକ୍ଷା ବିଭାଗରେ ଅନିୟମିତତା ନେଇ ଖବର ଆସିଥିଲା । କିଛି ଡିଇଓ ଏବଂ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ହୋଇଥିଲା । ଶିକ୍ଷା ବିଭାଗର ମୁଖ୍ୟ ସଚିତ ଏମ୍ ସିଦ୍ଧାର୍ଥ କିଶାନଗଞ୍ଜ ଜିଲ୍ଲା ଏବଂ ପୂର୍ବ ଚମ୍ପାରଣ ଜିଲ୍ଲାରେ ମଧ୍ୟ ଡିଇଓ ଏବଂ ଅନ୍ୟ ଅଧିକାରୀଙ୍କ ବିରୋଧରେ ସ୍କୁଲର ଟେବୁଲ୍ ଏବଂ ବେଞ୍ଚ କିଣାରେ ଅନିୟମିତତା ନେଇ କଡ଼ା କାର୍ଯ୍ୟାନୁଷ୍ଠାନ ନେଇଥିଲେ । ବେତିହା ଜିଲ୍ଲା ଶିକ୍ଷା ଅଧିକାରୀ ରଜନୀକାନ୍ତ ପ୍ରବୀଣ ୨୦୦୫ରୁ ଏବେ ସୁଦ୍ଧା ୧, ୮୭,୨୩, ୬୨୫ ଟଙ୍କାର ଆୟବର୍ହିଭୂତ ସମ୍ପତ୍ତି ଠୁଳ କରିଥିବା ସୂଚନା ରହିଛି ।...
