ନୟାଗଡ ୮/୨: ସ୍ବାମୀର ଅଜବ କାଣ୍ଡ । ସ୍ତ୍ରୀର ଚରିତ୍ରକୁ ସନ୍ଦେହ କରି ସ୍ତ୍ରୀ କାମ କରୁଥିବା ଦୋକାନ ମାଲିକଙ୍କ ଉପରେ ବୋମା ଫିଙ୍ଗିଲା । ଦୋକାନ ମାଲିକ ଆହତ ଅବସ୍ଥାରେ ମେଡିକାଲରେ ଭର୍ତ୍ତି । ନୟାଗଡ ଜିଲ୍ଲା ରାଜସୁନାଖଳି ଫାଣ୍ଡି କୁମ୍ଭାରୀ ଛକରେ ଘଟଣାକୁ ନେଇ ଚର୍ଚ୍ଚା, ଆଲୋଚନା ଜୋର୍ ।
ଦୋକାନ ମାଲିକ ସନ୍ତୋଷଙ୍କ ବର୍ଷା ଆଇସ ପାର୍ଲରେ ବୋଲଗଡ ଥାନା ଅ଼ଞ୍ଚଳର ବିକାଶଙ୍କ ସ୍ତ୍ରୀ କାମ କରନ୍ତି । ତେବେ ବିକାଶ ଓ ତାଙ୍କ ସ୍ତ୍ରୀଙ୍କ ମଧ୍ୟରେ ସଂପର୍କ ଭଲ ନଥିଲା । ଛାଡପତ୍ର ପାଇଁ ଆବେଦନ ହୋଇଥିବା ଜଣାପଡିଛି । ସ୍ତ୍ରୀଙ୍କ ସହ ଦୋକାନ ମାଲିକ ସନ୍ତୋଷଙ୍କ ଅନୈତିକ ସଂପର୍କ ଥିବା ନେଇ ସବୁବେଳେ ସନ୍ଦେହ କରୁଥିଲେ ବିକାଶ ।
ଶୁକ୍ରବାର ରାତି ପ୍ରାୟ ୧୧ଟା ୩୦ ସମୟରେ ସନ୍ତୋଷ ଦୋକାନ ବନ୍ଦ କରି ଯାଉଥିବାବେଳେ ବିକାଶ ହଠାତ ତାଙ୍କ ଉପରକୁ ବୋମା ଫୋପାଡି ପଳାଇଯାଇଥିଲେ । ବୋମା ଯାଇ ସନ୍ତୋଷଙ୍କ ୨ ଗୋଡରେ ବାଜିଥିଲା । ସ୍ଥାନୀୟ ଲୋକେ ତାଙ୍କୁ ସଙ୍ଗେ ସଙ୍ଗେ ମେଡିକାଲରେ ଭର୍ତ୍ତି କରିଥିଲେ । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଥିଲା । ତେବେ ବୋମା ଫିଙ୍ଗିଥିବା ବିକାଶ ଫେରାର ହୋଇଯାଇଛି । ପୋଲିସ ତାକୁ ଧରିବାକୁ ବିଭିନ୍ନ ସ୍ଥାନରେ ଛାନ୍ଭିନ୍ କରୁଛି ।
