ନୂଆଦିଲ୍ଲୀ ୦୩/୦୧: ବିମାନ ଯାତ୍ରା । ଦେଶ ହେଉ କି ବିଦେଶ । କିଛି କ୍ଷଣରେ ପହଞ୍ଚି ହୁଏ ଗନ୍ତବ୍ୟସ୍ଥଳରେ । ଖାସ୍ କରି ଏବେ ଏବେ ଗୋଟିଏ ଦିନରେ ପହଞ୍ଚି ହେଉଛି ବିଦେଶରେ । ବିମାନ ନିର୍ଦ୍ଧାରିତ ସମୟରେ ଉଡ଼ାଣ ଭରିବା ସହିତ ଠିକ୍ ସମୟରେ ଲ୍ୟାଣ୍ଡିଂ ବି କରେ । ସେଇଥିଲାଗି ଅନେକ ଯାତ୍ରୀ ଯାତ୍ରା କରିବାକୁ ବିମାନକୁ ହିଁ ପସନ୍ଦ କରନ୍ତି । ହେଲେ ଏବେ ବିମାନକୁ ନେଇ ଏବେ ଏମିତି ଖବର ଆସିଛି ଯାହକୁ ନେଇ ଆରମ୍ଭ ହୋଇଛି ଚର୍ଚ୍ଚା । କାରଣ ଗୋଟିଏ ପ୍ଲେନ୍ ୨୦୨୫ରେ ଉଡ଼ାଣ ଭରିବା ପରେ ୨୦୨୪ରେ ଲ୍ୟାଣ୍ଡିଂ କରିଛି । ତେବେ ଏମିତି କେମିତି ସମ୍ଭବ ହେଲା ତାହାକୁ ନେଇ ଚର୍ଚ୍ଚା ଜୋର ଧରିଛି । କ୍ୟାଥେ ପାସିଫିକ୍ ଫ୍ଲାଇଟ୍କୁ ନେଇ ଚର୍ଚ୍ଚା ବଢିଛି ।
ଲ୍ୟାଣ୍ଡିଂ ବେଳେ ସମୟ ବଦଳିଲା:
କହିବାକୁ ଗଲେ କ୍ୟାଥେ ପାସିଫିକ୍ ଫ୍ଲାଇଟ୍ ୧ ଜାନୁଆରୀରେ ଚୀନର ହଂକଂ ସହରରୁ ଉଡ଼ାଣ ଭରିଥିଲା । ଗସ୍ତସୂଚୀ ଅନୁସାରେ ଲସ୍ ଆଞ୍ଜେଲସ୍ ସହରରେ ଲ୍ୟାଣ୍ଡିଂ କରିବାର ଥିଲା । ହେଲେ ଲ୍ୟାଣ୍ଡିଂ ସମୟ ଥିଲା ୩୧ ଡିସେମ୍ୱର ୨୦୨୪ । ହଠାତ୍ ଯେବେ ଯାତ୍ରୀମାନେ ଏହା ଦେଖିଥିଲେ ସେମାନେ ବି ଆଶ୍ଚର୍ଯ୍ୟ ହୋଇଯାଇଥିଲେ । ଆଉ ଭାବିଥିଲେ ଏମିତି କେମିତି ସମ୍ଭବ ହୋଇଥିଲା । କୁହାଯାଉଛି କି, ଇଣ୍ଟରନାସନାଲ ଡେଟ୍ ଟାଇମ୍ ପାଇଁ ଏମିତି ଘଟିଛି ।
ଇଣ୍ଟରନାସନାଲ ଡେଟ୍ ଲାଇନ୍ କଣ ?
ଅନେକ ଜାଣନ୍ତି ନାହିଁ ଇଣ୍ଟରନାସନାଲ ଡେଟ୍ ଲାଇନ୍ର ଅର୍ଥ କଣ ? ଜାତୀୟ ଗଣମାଧ୍ୟମରୁ ମିଳିଥିବା ସୂଚନା ଅନୁସାରେ, ଅନ୍ତର୍ଜାତୀୟ ତାରିଖ ରେଖା ପ୍ରଶାନ୍ତ ମହାସାଗରରେ ଅବସ୍ଥିତ ଏକ ରେଖା । ଏହି ରେଖା ଦେଇ ଯେଉଁ ବିମାନ ଯାତ୍ରା କରେ ସେଥିରେ ସମୟରେ ପରିବର୍ତ୍ତନ ଦେଖାଯାଏ । ଏହାଏକ ସାଧାରଣ ପ୍ରକ୍ରିୟା ।
ରେଖାରୁ ଯଦି ବିମାନ ପଶ୍ଚିମ ଦିଗକୁ ଗତିକରେ ତେବେ ତାରିଖ ଗୋଟିଏ ଦିନ ବଢିଯାଉଥିବା ବେଳେ ପୂର୍ବ ଦିଗକୁ ଗଲେ ଗୋଟିଏ ଦିନ କମିଯାଏ । ଧରିନିଅନ୍ତୁ, ଗୋଟିଏ ବିମାନ ହଙ୍ଗକଙ୍ଗରୁ ଉଡ଼ାଣ ଭରିଲା । ଆଉ ସେହି ବିମାନଟି ଇଣ୍ଟରନାସନାଲ ଡେଟ୍ ଲାଇନ୍କୁ ଅତିକ୍ରମ କରି ଲସ ଆଞ୍ଜେଲସରେ ପହଞ୍ଚିଗଲା । ଏମିତି ସ୍ଥିତିରେ ସମୟ ଗୋଟିଏ ଦିନ ପୂର୍ବକୁ ପଳାଇଯିବ । ଯାହା ଏହି ବିମାନ ସହ ହୋଇଛି ।
୨ ଥର ନୂଆବର୍ଷ ସେଲିବ୍ରେସନ:
ପ୍ରଥମେ ଯେଉଁମାନେ ହଂକଂରୁ ଯାତ୍ରା ଆରମ୍ଭ କରିଥିଲେ ସେମାନେ ନୂଆବର୍ଷ ପାଳନ କରି ଯାଇଥିଲେ । ଯେହେତୁ ଇଣ୍ଟରନାସନାଲ ଡେଟ୍ ଲାଇନ୍ ଦେଇ ପ୍ଲେନ ଉଡ଼ାଣ ଭରିଥିଲା ତେଣୁ ସମୟ ବଦଳି ଯାଇଥିଲା ଏବଂ ଯାତ୍ରୀମାନେ ଦୁଇଥର ନୂଆବର୍ଷ ସେଲିବ୍ରେସନ କରିବାର ସୁଯୋଗ ପାଇଥିଲେ ।
ଅନେକ ସମୟରେ ଆମେ ମୋବାଇଲ୍ରେ ଯଦି ଇଣ୍ଟରନାସନାଲ ଟାଇମ୍ ଦେଖନ୍ତି ତାହାଲେ ଦେଶର ଅନୁସାରେ ସମୟ ବି ବଦଳିଯାଉଥିବା ନଜର ଆସେ । ଏମିତିକି ଭାରତରେ ଯେବେ ଦିନ ହୋଇଥାଏ ଠିକ୍ ସେହି ସମୟରେ ଆମେରିକାରେ ରାତି ହୋଇଥାଏ । ଏମିତିକି ଭାରତ ଓ ପାକିସ୍ତାନ ସମୟରେ ବି ସାମାନ୍ୟ ପରିବର୍ତ୍ତନ ଦେଖାଯାଏ । ହେଲେ ଇଣ୍ଟରନାସନାଲ ଡେଟ୍ ଲାଇନ୍ରେ ଦିନ ପଛୁଆ ପଳାଇ ଯାଇଥିବାରୁ ଏବେ ଚର୍ଚ୍ଚା ଜୋର ଧରିଛି ।
