ନୂଆଦିଲ୍ଲୀ: ଶୀତ ଅଧିବେଶନ ଆରମ୍ଭରୁ ହିଁ ସଂସଦରେ ଅଚଳାବସ୍ଥା ଜାରି ରହିଛି । ତେବେ ସୋମବାର ହୋଇଥିବା ସର୍ବଦଳୀୟ ବୈଠକରେ ଶାସକ ଏବଂ ବିରୋଧୀ ଗୃହ ଚଲାଇବା ଉପରେ ସହମତ ହୋଇଛନ୍ତି । ଏହା ବ୍ୟତୀତ କେନ୍ଦ୍ର ସରକାର ସମ୍ୱିଧାନ ଉପରେ ଚର୍ଚ୍ଚା ପାଇଁ ସହମତ ହୋଇଛନ୍ତି । ମଙ୍ଗଳବାରଠାରୁ ଗୃହ କାର୍ଯ୍ୟ ସ୍ୱଭାବିକ ହେବ ବୋଲି ସଂସଦୀୟ ବ୍ୟାପାର ମନ୍ତ୍ରୀ କିରେଣ ରିଜିଜୁ ଆଶା ବ୍ୟକ୍ତ କରିଛନ୍ତି । ସେ କହିଛନ୍ତି ଯେ ଲୋକସଭାରେ ଡିସେମ୍ୱର ୧୩ ଏବଂ ୧୪ରେ ସମ୍ୱିଧାନ ଉପରେ ଚର୍ଚ୍ଚା କରାଯିବ । ଅନ୍ୟପଟେ ରାଜ୍ୟସଭାରେ ଏହା ଉପରେ ଡିସେମ୍ୱର ୧୬-୧୭ରେ ଚର୍ଚ୍ଚା କରାଯିବ । କଂଗ୍ରେସ ସମେତ ଅନେକ ବିରୋଧୀ ଦଳର ଅଭିଯୋଗ ଯେ ସଂସଦରେ ସମ୍ୱିଧାନ ଉପରେ ଚର୍ଚ୍ଚା ହେବା ଦରକାର, ଫଳରେ ନୂଆ ପିଢି ଏହା ବିଷୟରେ ଜାଣିବାର ସୁଯୋଗ ପାଇପାରିବେ ।
କଂଗ୍ରେସ ସୋମବାର ସକାଳେ କହିଥିଲା ଯେ ବିରୋଧୀ ଦଳ ସଂସଦର ଉଭୟ ଗୃହକାର୍ଯ୍ୟ ସ୍ୱଭାବିକ କରିବା ପାଇଁ ପ୍ରସ୍ତୁତ ଅଛନ୍ତି କିନ୍ତୁ ଏଥିପାଇଁ ସମ୍ୱିଧାନ ଉପରେ ଚର୍ଚ୍ଚା ହେବା ଦରକାର । ସରକାର ନିଜେ ଏହି ପ୍ରତିଶ୍ରୁତି ଦେଇଥିଲେ । ବିରୋଧୀ ଇଣ୍ଡି ମେଣ୍ଟର ସଦସ୍ୟ ଦଳଗୁଡ଼ିକର ବୈଠକ ପରେ କଂଗ୍ରେସ ମହାସଚିବ କେସି ବେଣୁଗୋପାଳ କହିଥିଲେ ଯେ ସରକାର ସମ୍ୱିଧାନ ଉପରେ ଚର୍ଚ୍ଚା ପାଇଁ ପ୍ରତିଶ୍ରୁତି ଦେଇଥିଲେ ଏବଂ ତାହା ପୂରଣ କରିବା ଦରକାର ।
ଭାରତୀୟ ସମ୍ୱିଧାନର ୭୫ ବର୍ଷ ପୂର୍ତ୍ତି ଅବସରରେ ସଂସଦରେ ବିଶେଷ ଚର୍ଚ୍ଚା ଆୟୋଜନ କରାଯିବ । ଏହି ଐତିହାସିକ ଚର୍ଚ୍ଚାରେ ଭାରତୀୟ ସମ୍ୱିଧାନର ମୂଳ ଭାବନା, ଏହାର ବିକାଶ ଏବଂ ଦେଶର ପ୍ରଗତିରେ ଏହାର ଭୂମିକା ଉପରେ ବିଚାର କରାଯିବ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏହି ଚର୍ଚ୍ଚାରେ ସାମିଲ ହୋଇ ନିଜ ବିଚାର ରଖିପାରନ୍ତି । ପ୍ରଧାନମନ୍ତ୍ରୀ ମୋଦୀଙ୍କ ହସ୍ତକ୍ଷେପ ଏହି ଚର୍ଚ୍ଚାକୁ ଅଧିକ ଗୁରୁତ୍ୱପୂର୍ଣ୍ଣ ଏବଂ ଐତିହାସିକ କରିପାରେ ।
