ନୂଆଦିଲ୍ଲୀ: ବଲିଉଡ୍ ଅଭିନେତା ସୈଫ୍ ଅଲୀ ଖାନ୍ଙ୍କୁ ଆକ୍ରମଣ କରିଥିବା ଅଭିଯୁକ୍ତ ମହମ୍ମଦ ଶରୀଫୁଲ ଇସଲାମ ଶହଜାଦକୁ ଗିରଫ କରିବାରେ ସଫଳ ହୋଇଛି ପୋଲିସ।ଗିରଫ ପରେ ତାକୁ କୋର୍ଟ ଚାଲାଣ କରାଯାଇଥିଲା, ଆଉ ବାନ୍ଦ୍ରା କୋର୍ଟ ୫ ଦିନିଆ ପୋଲିସ ହେପାଜତରେ ପଠାଇଛି। ଅଭିଯୁକ୍ତକୁ ଜାନୁଆରୀ ୨୪ ପର୍ଯ୍ୟନ୍ତ ହେପାଜତରେ ରଖି ପଚରାଉଚରା କରାଯିବ।
ତେବେ ପୋଲିସର କହିବା ଅନୁଯାୟୀ, ଅଭିଯୁକ୍ତ ବାଂଲାଦେଶୀ ଅନୁପ୍ରବେଶକାରୀ। ଚୋରି ଉଦ୍ଦେଶ୍ୟରେ ସେ ସୈଫଙ୍କ ମୁମ୍ବାଇ ସ୍ଥିତ ବାନ୍ଦ୍ରା ଆପାର୍ଟମେଣ୍ଟରେ ପଶିଥିଲା। ସେହିଭଳି ଶୁଣାଣି ସମୟରେ କୋର୍ଟ କହିଛନ୍ତି, ଘଟଣାରେ ବିଦେଶୀ ଷଡ଼ଯନ୍ତ୍ର ଥିବା ନେଇ ପୋଲିସ ଯେଉଁ ଯୁକ୍ତି ରଖିଛି ତାହା ଖାରଜ କରାଯାଇପାରିବନି।
ପ୍ରକୃତଷର ପୋଲିସ ଅଦାଲତରେ ରଖିଥିବା ଯୁକ୍ତି ଅନୁଯାୟୀ, ଆକ୍ରମଣକାରୀ ବାଂଲାଦେଶୀ ନାଗରିକ ଥିଲା । ତାହାର ଏଭଳି କରିବା ପଛରେ ଉଦ୍ଦେଶ୍ୟ ଜାଣିବାକୁ ଚେଷ୍ଟା ଜାରି ରହିଛି। ପୋଲିସ କୋର୍ଟଙ୍କୁ ଏହା ମଧ୍ୟ କହିଛି ଯେ, ମାମଲାରେ ବିଦେଶୀ ଲିଙ୍କ୍ ରହିଛି କି’ ନାହିଁ ତାହା ଜାଣିବାକୁ ଚେଷ୍ଟା କରାଯାଉଛି। ଆଉ ପୋଲିସର ଆବେଦନ ଅନୁସାରେ କୋର୍ଟ କହିଛନ୍ତି ଆବେଦନ ପକ୍ଷ ଦ୍ବାରା ଲଗାଯାଇଥିବା ଅନ୍ତର୍ଜାତୀୟ ଷଡ଼ଯନ୍ତ୍ରର ଅଭିଯୋଗକୁ ଅସମ୍ଭବ କୁହାଯାଇପାରିବନି।
ଗତକାଲି ପୋଲିସ ଗଣମାଧ୍ୟମକୁ କହିଥିଲା ଯେ, କଥିତ ଆକ୍ରମଣକାରୀ ମହମ୍ମଦ ଶରୀଫୁଲ ଇସଲାମ ଶହଜାଦ ଜଣେ ବାଂଲାଦେଶୀ ନାଗରିକ ଥିଲା। ଯିଏ ଅବୈଧ ଭାବରେ ଭାରତରେ ପ୍ରବେଶ କରିବା ପରେ ନିଜ ନାଁ ବଦଳାଇ ବିଜୟ ଦାସ ରଖିଥିଲା। ତାକୁ ଥାଣେ ସହରର ସଂଲଗ୍ନ ଅଞ୍ଚଳରୁ ଗିରଫ କରାଯାଇଥିଲା।
