ଭୁବନେଶ୍ୱର ୦୩/୦୨: ଫେବୃୟାରୀ ପହିଲାରୁ ତାଉ ଦେଖାଇଲାଣି ଖରା । ମାଘ ସରିନି ହେଲେ ପାରଦ ଏବେଠୁ ଉପରମୁହାଁ ହେଲାଣି । ଓଡ଼ିଶାରୁ ଯେମିତି ଶୀତ କୁଆଡେ ଉଭାନ ହୋଇଯାଇଛି । ଏମିତିକି ରାତି ପାରଦ ବି ବେଶ୍ ଅଧିକ ରହୁଛି । ୩୬ ଡିଗ୍ରୀ ପାର କଲାଣି ଦିନର ତାପମାତ୍ରା ।
ଆଭ୍ୟନ୍ତରୀଣ ଓଡ଼ିଶା ସମେତ ଉପକୂଳ ଓଡ଼ିଶାରେ ତାତି । ଆଗକୁ ବି ତାତିର ପ୍ରକୋପ ରହିବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ବର୍ତ୍ତମାନ ରାଜ୍ୟରେ ମେଘମୁକ୍ତ ଆକାଶ ସହ ସୂର୍ଯ୍ୟଙ୍କ ଟାଣ କିରଣ ପାଇଁ ତାତି ବୃଦ୍ଧି ପାଉଛି ବୋଲି ପାଣିପାଗ କେନ୍ଦ୍ର ସ୍ପଷ୍ଟ କରିଛି । ଉପକୂଳରୁ ପଶ୍ଚିମ, ଉତ୍ତରରୁ ଦକ୍ଷିଣ, ସବୁଠି ଖରାରେ ଅସ୍ତବ୍ୟସ୍ତ ହେଲାଣି ଜନଜୀବନ । କେବଳ କୁହୁଡିକୁ ଛାଡିଦେଲେ ଶୀତର ପ୍ରଶ୍ନ ନାହିଁ । ଘରେ କି ବାହାରେ, ଦେହରୁ ବୋହୁଛି ଝାଳ ।
ଗତ ୨୪ ଘଣ୍ଟାରେ ବଲାଙ୍ଗିରରେ ଚଳିତ ବର୍ଷ ପ୍ରଥମ ଥର ସର୍ବୋଚ୍ଚ ତାପମାତ୍ରା ୩୬.୭ ଡିଗ୍ରୀ ରେକର୍ଡ ହୋଇଥିଲା । ସେହିପରି ଟିଟିଲାଗଡ଼ରେ ୩୬, ପାରଳାଖେମୁଣ୍ଡି ୩୫.୮, ଝାରସୁଗୁଡା ୩୫.୬, ସମ୍ବଲପୁର ୩୫.୧ ଓ ଭବାନୀପାଟଣାରେ ତାପମାତ୍ରା ରହିଥିଲା ୩୫ ଡିଗ୍ରୀ ସେଲସିୟସ୍। ରାଜଧାନୀ ଭୁବନେଶ୍ବରରେ ପାରଦ ୩୪.୯ ଡିଗ୍ରୀ ସେଲସିୟସ୍ ରହିଥିଲା ।
ସେପଟେ ପାଣିପାଗ ବିଭାଗ କହିଛି ଆଗକୁ ବି ଏମିତି ପାଗ ଜାରି ରହିବ । ରାଜ୍ୟରେ ଆସନ୍ତା ୪-୫ ଦିନ ପାଗରେ କୌଣସି ପରିବର୍ତ୍ତନ ସମ୍ଭାବନା ନାହିଁ । ତେଣୁ ତାପମାତ୍ରା ଆଗକୁ ଆହୁରି ବଢିବାର ସମ୍ଭାବନା ରହିଛି । ବର୍ତ୍ତମାନ ମେଘମୁକ୍ତ ଆକାଶ ସହ ଦକ୍ଷିଣ-ପଶ୍ଚିମ ବାୟୁ ପ୍ରଭାବରେ ତାପମାତ୍ରା ବଢିଛି। ଫେବ୍ରୁଆରୀରେ ଅଚାନକ ଶୀତ ଗାଏବ ହେବା ସହ ଖରା ବଢ଼ିବା ଜନଜୀବନକୁ ପ୍ରଭାବିତ କରିପାରେ ।
