ଚୌଦ୍ୱାର ୦୪/୧୦: ଯୁବକଙ୍କୁ ହତ୍ୟା କରି ଗୋଡ଼କୁ ରଶିରେ ବାନ୍ଧି ରେଳ ଧାରଣାରେ ପିଙ୍ଗିଦେଲେ ଦୁର୍ବୃତ୍ତ । ସକାଳେ ଯୁବକଙ୍କ ଖଣ୍ଡ ବିଖଣ୍ଡ ମୃତଦେହ ରେଳଧାରଣାରୁ ଉଦ୍ଧାର କରାଯାଇଛି ।
କଟକ ଜିଲ୍ଲା ଟାଙ୍ଗି ଥାନା ଅନ୍ତର୍ଗତ ନିର୍ଗୁଣ୍ଡି ରେଳ ଧାରଣା ନିକଟରୁ ଯୁବକଙ୍କ ମୃତଦେହ ମିଳିଛି । ମୃତ ଯୁବକ ଜଣଙ୍କ ହେଲେ ତେରୁଆଁ ବଙ୍ଗାଳୀସାହିରେ ରହୁଥିବା ତିରୁପତି ରେଡ୍ଡୀ। ସକାଳେ ନିର୍ଗୁଣ୍ଡ ରେଳ ଧାରଣା ଉପରେ ତିରୁପତିଙ୍କ ଖଣ୍ଡବିଖଣ୍ଡ ମୃତଦେହ ପଡ଼ିଥିବା ସ୍ଥାନୀୟ ଲୋକେ ଦେଖିଥିଲେ। ଏଥିସହ ତାଙ୍କୁ ଗୋଡ଼ ରଶିରେ ବନ୍ଧା ଯାଇଥିବା ଦେଖିବାକୁ ମିଳିଥିଲା । ଏନେଇ ଘଟଣା ସଂପର୍କରେ ପୁଲିସକୁ ଜଣାଇଥିଲେ ସ୍ଥାନୀୟ ଲୋକେ ।
ପୋଲିସ ପହଞ୍ଚି ମୃତଦେହକୁ ଉଦ୍ଧାର କରି ବ୍ୟବଚ୍ଛେଦ ପାଇଁ ପଠାଇଛି ଓ ଘଟଣାର ତଦନ୍ତ କରୁଛି। ତେବେ କିଏ ଓ କାହିଁକି ତିରୁପତିଙ୍କୁ ହତ୍ୟା କଲା, ଏହାପଛରେ ପୂର୍ବ ଶତ୍ରୁତା ନା ଅଲଗା କିଛି କାରଣ ରହିଛି ତାହା ଜଣାପଡ଼ି ନାହିଁ। ତଦନ୍ତ ପରେ ପ୍ରକୃତ ସତ୍ୟ ଜଣାପଡ଼ିବ ବୋଲି ପୁଲିସ ପକ୍ଷରୁ ସୂଚନା ଦିଆଯାଇଛି।
