ଦିଶପୁର: ଉତ୍ତର-ପୂର୍ବ ରାଜ୍ୟରେ ବର୍ଷା ବିତ୍ପାତ । ମଣିପୁର, ଅରୁଣାଚଳ ପ୍ରଦେଶ ଓ ଆସାମରେ ବନ୍ୟା ସ୍ଥିତି ଉପୁଜିଛି । ଏମିତି କି ଏହି ରାଜ୍ୟଗୁଡ଼ିକରେ ସେନା ଉଦ୍ଧାର ଅଭିଯାନରେ ସାମିଲ ହୋଇଛି । ଆସାମର କାଜିରଙ୍ଗା ଜାତୀୟ ଉଦ୍ୟାନରେ ବନ୍ୟା ପାଣି ପଶିଛି । ଫଳରେ ନ୍ୟାସନାଲ୍ ପାର୍କରେ ଗଣ୍ଡାଛୁଆ ଓ ହରିଣ ସମେତ ୧୭ ବନ୍ୟପ୍ରାଣୀ ପ୍ରାଣ ହରାଇଛନ୍ତି । ୭୨ ବନ୍ୟପ୍ରାଣୀକୁ ଉଦ୍ଧାର କରାଯାଇଛି ।
ଆସାମର ୨୯ ଜିଲ୍ଲାରେ ୧୬.୨୫ ଲକ୍ଷରୁ ଅଧିକ ଲୋକ ବନ୍ୟା ଦ୍ୱାରା ପ୍ରଭାବିତ ହୋଇଛନ୍ତି । ବୁଧବାର ବନ୍ୟାଜଳରେ ବୁଡ଼ି ୮ ଜଣ ପ୍ରାଣ ହରାଇଥିଲେ । ସୋନିତପୁର, ଶିବସାଗର ଓ ଗୋଲାଘାଟରେ ଆଉ ୩ ଜଣ ବନ୍ୟାସ୍ରୋତରେ ଭାସିଯାଇଥିବା ଜଣାପଡ଼ିଛି । ରାଜ୍ୟରେ ବନ୍ୟା, ଭୂସ୍ଖଳନ ଓ ଝଡ଼ତୋଫାନରେ ପ୍ରାଣ ହରାଇଥିବା ଲୋକଙ୍କ ସଂଖ୍ୟା ୫୬ରେ ପହଞ୍ଚିଛି । ଅନ୍ୟପକ୍ଷରେ ବିହାରର ସିୱାନ ଓ ସାରଣ ଜିଲ୍ଲାରେ ବୁଧବାର ଦିନକରେ ୬ଟି ପୋଲ ଭୁଶୁଡ଼ି ପଡ଼ିଛି । ୪ଟି ଗଣ୍ଡକ ନଦୀ ଓ ୨ଟି ଧମହି ନଦୀ ଉପରେ ନିର୍ମିତ ହୋଇଥିଲା । ଗତ ୧୫ ଦିନ ମଧ୍ୟରେ ରାଜ୍ୟରେ ପୋଲ ଭୁଶୁଡ଼ିବାର ୧୧ଟି ଘଟଣା ସାମ୍ନାକୁ ଆସିଲାଣି ।
ଏହା ପୂର୍ବରୁ ଭାରତୀୟ ପାଣିପାଗ ବିଭାଗ ଉତ୍ତରାଖଣ୍ଡ, ଉତ୍ତର ପ୍ରଦେଶ, ବିହାର, ସିକ୍କିମ, ଉତ୍ତର ପଶ୍ଚିମବଙ୍ଗ, ଅରୁଣାଚଳ ପ୍ରଦେଶ, ମଣିପୁର, ମେଘାଳୟ, ଆସାମ, ନାଗାଲାଣ୍ଡ, ତ୍ରିପୁରା ଓ ମିଜୋରାମରେ ଅତି ପ୍ରବଳ ବୃଷ୍ଟିପାତ ନେଇ ପୂର୍ବାନୁମାନ କରିଥିଲା । ସେହିଭଳି ଓଡ଼ିଶା ସମେତ ଜମ୍ମୁ-କାଶ୍ମୀର, ପଞ୍ଜାବ, ହରିଆଣା, ଚଣ୍ଡିଗଡ଼, ଦିଲ୍ଲୀ, ହିମାଚଳ ପ୍ରଦେଶ, ମଧ୍ୟ ପ୍ରଦେଶ, ଛତିଶଗଡ଼, ଝାଡ଼ଖଣ୍ଡ, ରାଜସ୍ଥାନ, ମହାରାଷ୍ଟ୍ର, ଗୁଜରାଟ, ଗୋଆ, କର୍ଣ୍ଣାଟକ, କେରଳରେ ପ୍ରବଳ ବୃଷ୍ଟିପାତ ନେଇ ଆଲର୍ଟ ଜାରି ହୋଇଥିଲା ।
