ନୂଆଦିଲ୍ଲୀ: ଅକାସା ଏୟାରର ଦୁଇ ଜଣ ନିର୍ଦ୍ଦେଶକଙ୍କ ବିରୋଧରେ କଠୋର ହୋଇଛି ଡିଜିସିଏ । ଅକାସାର ପରିଚାଳନା ନିର୍ଦ୍ଦେଶକ ଏବଂ ପ୍ରଶିକ୍ଷଣ ନିର୍ଦ୍ଦେଶକଙ୍କୁ ୬ ମାସ ଯାଏ ସସ୍ପେଣ୍ଡ କରିବା ପାଇଁ ବିମାନ ସୁରକ୍ଷା ନିୟାମକ ଡିଜିସିଏ ଶୁକ୍ରବାର ନିର୍ଦ୍ଦେଶ ଜାରି କରିଛି । ପାଇଲଟ୍ଙ୍କ ଟ୍ରେନିଂରେ ତ୍ରୁଟି ମାମଲାରେ ଏହି ଆକ୍ସନ ନିଆଯାଇଛି । ବେସାମରିକ ବିମାନ ଚଳାଚଳ ମହାନିର୍ଦ୍ଦେଶାଳୟ ନିଜ ଆଦେଶରେ କହିଛି, 'ରାକେଶ ଝୁନଝୁନୱାଲା ପରିବାରର ଅଂଶଧନ ଥିବା ଏୟାର ଲାଇନର ୨ ବରିଷ୍ଠ ଅଧିକାରୀ ବିମାନ ପରିଚାଳନା ଆଇନ ପାଳନ କରିବାରେ ବିଫଳ ହୋଇଛନ୍ତି ।'
ଅକାସା ଏୟାରର ପରିଚାଳନା ନିର୍ଦ୍ଦେଶକ ଏବଂ ପ୍ରଶିକ୍ଷଣ ନିର୍ଦ୍ଦେଶକଙ୍କୁ ଅକ୍ଟୋବର ୧୫ ଏବଂ ୩୦ରେ ଡିଜିସିଏ କାରଣ ଦର୍ଶାଅ ନୋଟିସ ପଠାଇଥିଲା । ଅଧିକାରୀଙ୍କ ଜବାବ ସନ୍ତୋଷଜନକ ନଥିବା ଦର୍ଶାଇ ୬ ମାସ ଯାଏ ଦୁହିଁଙ୍କୁ ସସ୍ପେଣ୍ଡ କରିବା ପାଇଁ ଆଦେଶ ଦିଆଯାଇଛି । ଡିଜିସିଏ ନିଜ ଆଦେଶରେ ଉପଯୁକ୍ତ ପାର୍ଥୀଙ୍କୁ ନୂଆ ନିଯୁକ୍ତି ଦେବା ପାଇଁ ପରାମର୍ଶ ଦେଇଛି ।
ଅକାସା ଏୟାର ଏହି ଘଟଣାକ୍ରମ ଉପରେ ବୟାନ ଦେଇଛି । ଡିଜିସିଏ ସହ ମିଶି କାମ କରିବା ଜାରି ରଖିବ ଏବଂ ନିୟମର ସଠିକ୍ ଅନୁପାଳନ କରିବ । ଏୟାର ଲାଇନ ନିଜ ବୟାନରେ କହିଛି, 'ସୁରକ୍ଷା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଏବଂ ଆମେ ସୁରକ୍ଷାର ସର୍ବୋଚ୍ଚ ମାନକୁ ବଜାୟ ରଖିବା ପାଇଁ ନିରନ୍ତର ପ୍ରୟାସ ଜାରି ରଖିବୁ ।'
