ଢେଙ୍କାନାଳ ୧୦/୦୯: ଢେଙ୍କାନାଳରେ ଅସହାୟ ଯୁବତୀଙ୍କୁ ଗଣ ଦୁଷ୍କର୍ମ ଘଟଣା । ଗିରଫ ୪ ଅଭିଯୁକ୍ତଙ୍କ ଡାକ୍ତରୀ ମାଇନା ସାଙ୍ଗକୁ ଡିଏନଏ ଟେଷ୍ଟ ପାଇଁ ସଂଗ୍ରହ କରାଗଲା ନମୁନା । ଅଭିଯୁକ୍ତ ମାନେ କୋର୍ଟ ଚାଲାଣ ପରେ ଜାମିନ ନାମଞ୍ଜୁର । 

ସୂଚନା ଥାଉକି, ଢେଙ୍କାନାଳ ସଦର ଥାନା ଅନ୍ତର୍ଗତ ଭାପୁର ଫାଣ୍ଡି ଅଂଚଳରେ ଅସହାୟ ଯୁବତୀଙ୍କୁ ଗଣଦୁଷ୍କର୍ମ ଘଟଣାରେ ଗିରଫ ୪ ଅଭିଯୁକ୍ତଙ୍କୁ ଢେଙ୍କାନାଳ ଜିଲ୍ଲା ମୁଖ୍ୟ ଡାକ୍ତରଖାନାକୁ ନେଇ ଡାକ୍ତରୀ ମାଇନା କରିଛି ପୋଲିସ । ଅପରପକ୍ଷରେ ପୀଡିତା ଯୁବତୀ ୭ ମାସ ଗର୍ଭବତୀ ଥିବାରୁ  ଅଭିଯୁକ୍ତମାନଙ୍କ DNA ଟେଷ୍ଟ ପାଇଁ ନମୁନା ସଂଗ୍ରହ କରାଯାଇଛି । ଯୁବତୀଙ୍କ ଅଭିଯୋଗକୁ ଆଧାର କରି ସଦର ଥାନାରେ ଏକ ମାମଲା ରୁଜୁ କରାଯାଇଛି । 

ଦଫା ୪୫୦, ୩୭୬-୨(n), ୩୭୬(d) ଆଧାରରେ ଅଭିଯୁକ୍ତ ମହୁଲ ପୁଞ୍ଜି ଗ୍ରାମର ବାବୁଲି ନାୟକ, ବିରଞ୍ଚି ମହାରଣା, ଅବିନାଶ ପରିଡା ଓ ଜୀବନ ପରିଡାଙ୍କୁ ସନ୍ଧ୍ୟାରେ ପୋଲିସ କୋର୍ଟ ଚାଲାଣ କରିଛି । ତେବେ ମାତ୍ର କୋର୍ଟରେ ଅଭିଯୁକ୍ତ ମାନଙ୍କ ଜାମିନ ନାମଞ୍ଜୁର ହୋଉଥିବାବେଳେ ସେମାନଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି । 

ପୀଡ଼ିତାଙ୍କ ବୟାନକୁ ଆଧାର କରି ଗଣଦୁଷ୍କର୍ମ ଘଟଣାରେ ୭ଜଣ ଅଭିଯୁକ୍ତଙ୍କ ଭିତରୁ ୪ ଗିରଫ ହୋଇଥିବା ବେଳେ ଜଣେ ଅଭିଯୁକ୍ତଙ୍କର ଗତ କିଛି ମାସ ପୂର୍ବରୁ ମୃତ୍ୟୁ ଘଟିସାରିଥିବା ଜଣାପଡିଛି । ଫଳରେ ଏହି ଘଟଣାରେ ପୋଲିସର ଏକ ସ୍ୱତନ୍ତ୍ର ଟିମ ଅନ୍ୟ ଦୁଇ ଅଭିଯୁକ୍ତଙ୍କୁ ଗିରଫ ପାଇଁ ବିଭିନ୍ନ ଜାଗାରେ ଛପା ମାରୁଥିବା ଜଣାପଡିଛି।