ବିନିକା ୦୧।୦୮ : ସୋନପୁର ଜିଲ୍ଲା ଡୁଙ୍ଗୁରିପାଲି ବ୍ଲକ ଡାହୁକବୁଡ଼ ଗାଁରେ ଅଘଟଣ । ଲଗାଣ ବର୍ଷା ଲାଗି କାନ୍ଥ ପଡି ଗୋଟିଏ ପରିବାରର ୫ ଜଣ ଆହତ ହୋଇଛନ୍ତି । ସମସ୍ତ ଆହତଙ୍କୁ ଉଦ୍ଧାର କରି ଡୁଙ୍ଗୁରିପାଲି ଡାକ୍ତରଖାନାରେ ଭର୍ତ୍ତି କରାଯାଇଛି ।
ଖବର ଅନୁଯାୟୀ, ବୁଧବାର ବିଳମ୍ବିତ ରାତି ସମୟରେ ପରିବାର ଲୋକ ଘରେ ବସିଥିଲେ । ଏହି ସମୟରେ ଅଧିକ ମାତ୍ରା ବର୍ଷା ହେଉଥିଲା । ଯାହାଫଳରେ ମାଟି କାନ୍ଥଟି ଭୁଶୁଡି ପଡିଥିଲା ।ତେବେ ଏହି କାନ୍ଥ ପଡିବା ଦ୍ୱାରା ଗୋଟିଏ ପରିବାର ପାଞ୍ଚ ଜଣ ମାଟି ତଳେ ଚାପି ହୋଇ ରହିଯାଇଥିଲା । ସେପଟେ ଗ୍ରାମବାସୀ ତୁରନ୍ତ ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ସମସ୍ତଙ୍କୁ ଉଦ୍ଧାର କରିଥିଲେ । ଉଦ୍ଧାର ବ୍ୟକ୍ତିଙ୍କ ମଧ୍ୟରେ ସ୍ୱାମୀ ସୁଶୀଲ ପ୍ରଧାନ, ସ୍ତ୍ରୀ ବାସ୍ତୁରୀ ପ୍ରଧାନ ଏବଂ ତିନି ଛୁଆ ରୀତିକା ପ୍ରଧାନ, କ୍ରିସ୍ ପ୍ରଧାନ, ଅର୍ଣ୍ଣବ ପ୍ରଧାନ ରହିଛନ୍ତି । ସମସ୍ତ ଆହତଙ୍କୁ ଉଦ୍ଧାର କରି ଆମ୍ବୁଲାନ୍ସ ଯୋଗେ ଡୁଙ୍ଗୁରିପାଲି ହସ୍ପିଟାଲରେ ଭର୍ତ୍ତି କରାଯାଇଛି ।
