ସୋର ୦୯/୧୧: କାରରେ ଦ୍ରୁତ ଗତିରେ ଆସିଲା । ଭିଡ ବଜାରରେ ଲୋକଙ୍କ ଉପରେ ଚଢାଇ ଦେଲା । ୫ ଆହତ । ସୋର ବାହାନଗା ବ୍ଲକ ଗୋପାଳପୁର ବଜାରରେ ସାମ୍ନାକୁ ଆସିଛି ହିଟ୍ ଆଣ୍ଡ ରନ୍ ମାମଲା । ଶନିବାର ସକାଳୁ ଗୋପାଳପୁର ବଜାରରେ ପରିବା କିଣିବାକୁ ଲୋକଙ୍କ ହାଉଜାଉ ଭିଡ ଜମିଥିଲା । ଲୋକେ କିଣାକିଣିରେ ବ୍ୟସ୍ତ ଥିବାବେଳେ ବାଲେଶ୍ବର ଅଭିମୁଖେ ଯାଉଥିବା କାର ଦ୍ରୁତ ଗତିରେ ଆସି ଲୋକଙ୍କ ଉପରେ ମାଡି ଯାଇଥିଲା ।
କାର ଧକ୍କାରେ ଆଇସକ୍ରିମ ବିକ୍ରେତା ଶ୍ରୀଧର ରାଉତ, ପରିବା ବିକାଳୀ ଧରଣୀଧର ସାହୁଙ୍କ ସହ ପରିବା କିଣିବାକୁ ଆସିଥିବା ବିକର୍ତ୍ତନ ଜେନା,ସନାତନ ଜେନା ଓ ଗୁରୁପ୍ରସାଦ ଦାସ ଆହତ ହୋଇଛନ୍ତି । ଗୋପାଳପୁର ମେଡିକାଲରେ ପ୍ରାଥମିକ ଚିକିତ୍ସା ପରେ ସମସ୍ତଙ୍କୁ ବାଲେଶ୍ବର ସ୍ଥାନାନ୍ତର କରାଯାଇଛି । ଦୁର୍ଘଟଣା ପରେ ଡ୍ରାଇଭର ଘଟଣାସ୍ଥଳରୁ ଫେରାର ହୋଇଯାଇଛି । ଗୋପାଳପୁର ପୋଲିସ ଗାଡି ଜବତ କରି ତଦନ୍ତ ଚଳାଇଛି ।
