ଭୁବନେଶ୍ୱର୧୭।୧: ବେଦାନ୍ତ କଳିଙ୍ଗ ଲାନସର୍ସ କ୍ରମାନ୍ୱୟରେ ୨ଟି ମ୍ୟାଚ୍ ଜିତିବା ପରେ ପୂର୍ବମ୍ୟାଚ୍ରେ ହାଇଦ୍ରାବାଦ ତୋଫାନ୍ସ ଠାରୁ ପରାସ୍ତ ହୋଇଥିଲା । ଗୁରୁବାର ଦଳ ଚମତ୍କାର ପ୍ରଦର୍ଶନ କରି ପୁଣି ବିଜୟ ଟ୍ରାକୁ ଫେରିଛି । ଦିଲ୍ଲୀ ଏସ୍ଜି ପିପର୍ସ ବିପକ୍ଷରେ ୫-୧ ଗୋଲରେ ବିଶାଳ ବିଜୟ ହାସଲ କରିଛି । ହକି ଇଣ୍ଡିଆ ଲିଗରେ ଏହା ଟିମର ତୃତୀୟ ବିଜୟ ।
କଳିଙ୍ଗ ଲାନସର୍ସ ଆରମ୍ଭରୁ ଚମତ୍କାର ପ୍ରଦର୍ଶନ କରି ଦିଲ୍ଲୀ ଉପରେ ଭାରି ପଡ଼ିଥିଲା । ୧୧ ମିନିଟରେ ଦଳ ପ୍ରଥମ ଗୋଲ୍ ଦେଇଥିଲା । ତୀବ୍ର ପ୍ରତିଦ୍ୱନ୍ଦ୍ୱିତା ମଧ୍ୟରେ ଦ୍ୱିତୀୟ କ୍ୱାର୍ଟର ଗୋଲଶୂନ୍ୟ ରହିଥିଲା । ତୃତୀୟ କ୍ୱାର୍ଟରରେ ଲାନସର୍ସ ଆକ୍ରମଣକୁ ତୀବ୍ର କରିଥିଲା । ଯାହାର ପ୍ରତିରୋଧ କରିପାରି ନଥିଲା ଦିଲ୍ଲୀ । ୩୬ ମିନିଟରେ ଆର୍ଥର ଭନ ଡୋରେନ, ୩୮ ଓ ୪୩ ମିନିଟରେ ଥିଏରି ବ୍ରିଙ୍କମ୍ୟାନ ଏବଂ ୪୫ ମିନିଟରେ ଗୁରସାହିବଜିତ ସିଂ ଗୋଲ୍ ଦେଇ ଲାନସର୍ସକୁ ୫-୦ରେ ଅଗ୍ରଣୀ କରାଇଥିଲେ । ସେପଟେ ଚତୁର୍ଥ କ୍ୱାର୍ଟର ଆରମ୍ଭରୁ ଦିଲ୍ଲୀ ଗୋଲ୍ ଖାତା ଖୋଲିଥିଲା । କୋରି ୱେୟର ଏହି ଗୋଲ୍ ଦେଇ ଦଳର ସମ୍ମାନ ରଖିଥିଲେ । ପରବର୍ତ୍ତୀ ସମୟ ଖେଳ ଗୋଲଶୂନ୍ୟ ରହିବାରୁ ଶେଷରେ ଲାନସର୍ସ ୫-୧ରେ ମ୍ୟାଚ୍ ଜିତି ନେଇଥିଲା । ଏହି ବିଜୟ ସହ ପଏଣ୍ଟ ଟେବୁଲରେ ଲାନସର୍ସ ଉନ୍ନତି ଘଟିଛି । ଦଳ ମୋଟ୍ ୧୦ ପଏଣ୍ଟ ସହ ତୃତୀୟ ସ୍ଥାନକୁ ଉନ୍ନୀତ ହୋଇଛି । ୧୫ ପଏଣ୍ଟ ସହ ତାମିଲନାଡୁ ଡ୍ରାଗନ୍ସ ପ୍ରଥମ ଏବଂ ୧୨ ପଏଣ୍ଟ ପାଇ ବେଙ୍ଗଲ ଟାଇଗର୍ସ ଦ୍ୱିତୀୟ ସ୍ଥାନରେ ରହିଛି ।
