ରାଉରକେଲା, ୧୩।୧: ଚିତ୍ତାକର୍ଷକ ହେଉଛି ହକି ଇଣ୍ଡିଆ ଲିଗ୍ । ସଂଘର୍ଷପୂର୍ଣ୍ଣ ମ୍ୟାଚରେ ଦୁଲୁକୁଛି ରାଉରକେଲାର ବିର୍ସା ମୁଣ୍ଡା ଷ୍ଟାଡିୟମ । କ୍ରମାନ୍ୱୟରେ ୨ଟି ମ୍ୟାଚ୍ ଜିତିବା ପରେ ବେଦାନ୍ତ କଳିଙ୍ଗ ଲାନସର୍ସ ରବିବାର ମ୍ୟାଚରେ ପରାଜିତ ହୋଇଛି । ହାଇଦ୍ରାବାଦ ତୋଫାନ୍ସ ଠାରୁ ଦଳ ୫-୧ ଗୋଲରେ ପରାସ୍ତ ହୋଇ ଏଚ୍ଆଇଏଲ୍ ପଏଣ୍ଟ ଟେବୁଲରେ ଷଷ୍ଠ ସ୍ଥାନକୁ ଖସି ଯାଇଛି ।
ରବିବାର ହାଇଦ୍ରାବାଦ ତୋଫାନ୍ସ ପ୍ରଭାବୀ ପ୍ରଦର୍ଶନ କରିଥିଲେ । ତୋଫାନ୍ସର ଖେଳାଳିଙ୍କ ଆକ୍ରମଣରେ ଫିକା ପଡ଼ିଥିଲା ଲାନସର୍ସ । ଯଦିଓ ଲାନସର୍ସ ପ୍ରଥମେ ୫ ମିନିଟରେ ଖାତା ଖୋଲିଥିଲା । ମାତ୍ର ଏହାପରେ ହାଇଦ୍ରାବାଦ ଚମତ୍କାର ପ୍ରଦର୍ଶନ କରିଥିଲା । ତୋଫାନ୍ସ ଖେଳାଳିମାନେ ବିପକ୍ଷ ଦଳକୁ କୌଣସି ସୁଯୋଗ ଦେଇ ନଥିଲେ । ୬, ୨୧, ୩୦, ୪୭ ଓ ୫୪ ମିନିଟରେ ଗୋଲ୍ ଦେଇ ହାଇଦ୍ରାବାଦ ମ୍ୟାଚ୍କୁ ଜିତି ନେଇଥିଲା । ଗୋଞ୍ଜାଲୋ ପେଲାଟ୍ ଡବଲ ଗୋଲ ସ୍କୋର କରିଥିଲେ । ବହୁ ପ୍ରୟାସ କରି ଲାନସର୍ସ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିପାରି ନଥିଲା । ହାଇଦ୍ରାବାଦ ୬ଟି ମ୍ୟାଚ୍ରୁ ୧୦ ପଏଣ୍ଟ ପାଇ ଟେବୁଲର ଦ୍ୱିତୀୟ ସ୍ଥାନ ଏବଂ ତାମିଲନାଡୁ ଡ୍ରାଗନ୍ସ ୧୨ ପଏଣ୍ଟ ସହ ଶୀର୍ଷ ସ୍ଥାନରେ ରହିଛି ।
