ମୁମ୍ବାଇ: ସାଉଥ ସୁପରଷ୍ଟାର ଜୁନିୟର ଏନଟିଆରଙ୍କ ଫିଲ୍ମ ‘ଦେବରା-ପାର୍ଟ ୧’ ପରଦାକୁ ଆସି ସାରିଛି। ଫିଲ୍ମକୁ ଦର୍ଶକଙ୍କ ବେଶ ଭଲ ପାଇବା ମିଳୁଛି। ଏହାର ପ୍ରଭାବ ବକ୍ସ ଅଫିସ୍ରେ ଦେଖିବାକୁ ମିଳିଛି। ‘ଦେବରା-ପାର୍ଟ ୧’ ରିଲିଜର ଦୁଇ ଦିନରେ ହିଁ ଘରୋଇ ବକ୍ସ ଅଫିସ୍ରେ ୧୦୦ କୋଟି କ୍ଲବରେ ସାମିଲ ହୋଇଥିଲା। ଏବେ ଫିଲ୍ମ ୫ ଦିନର କଲେକ୍ସନ ସହ ୨୦୦ କୋଟି କ୍ଲବରେ ପ୍ରବେଶ କରିବାକୁ ଯାଉଛି।
‘ଦେବରା-ପାର୍ଟ ୧’ ପ୍ରଥମ ଦିନ ଭାରତରେ ୮୨.୫ କୋଟି ଟଙ୍କା କାରବାର କରିଥିଲା। ଦ୍ଵିତୀୟ ଦିନ ଫିଲ୍ମ ୩୮.୨ କୋଟି, ତୃତୀୟ ଦିନ ୩୯.୯ କୋଟି ଓ ଚତୁର୍ଥ ଦିନ ୧୨.୭୫ କୋଟି ଟଙ୍କାର ବ୍ୟବସାୟ କରିଛି। ଏବେ ପଞ୍ଚମ ଦିନ ପ୍ରାରମ୍ଭିକ ସୂଚନା ଅନୁଯାୟୀ, ଦେବରା ୨.୮୧ କୋଟି ଟଙ୍କା ଆୟ କରି ସାରିଲାଣି। ଏହି ପରି ଘରୋଇ ବକ୍ସ ଅଫିସ୍ରେ ‘ଦେବରା-ପାର୍ଟ ୧’ର ମୋଟ୍ କାରବାର ୧୭୬.୧୬ କୋଟି ଟଙ୍କା ରହିଛି।
‘ଦେବରା-ପାର୍ଟ ୧’ ଭାଙ୍ଗିଲା ‘ଆରଆରଆର’ର ରେକର୍ଡ
ଜୁନିୟର ଏନଟିଆରଙ୍କ ଫିଲ୍ମ ‘ଦେବରା-ପାର୍ଟ ୧’ ୫ ଦିନରେ ୧୭୬.୧୬ କୋଟି ଟଙ୍କା ଆୟ କରି ନିଜର ଗତ ସୁପରହିଟ୍ ଫିଲ୍ମ ଆରଆରଆରକୁ ପଛରେ ପକାଇ ଦେଇଛି। ୨୦୨୨ରେ ପରଦାକୁ ଆସିଥିବା ଏହି ଫିଲ୍ମ ୫ ଦିନରେ ଘରୋଇ ବକ୍ସ ଅଫିସ୍ରେ ମୋଟ୍ ୧୭୦.୪୯ କୋଟି ଟଙ୍କା କାରବାର କରିଥିଲା।
କୋରତାଲା ଶିବାଙ୍କ ନିର୍ଦ୍ଦେଶନାରେ ନିର୍ମିତ ‘ଦେବରା-ପାର୍ଟ ୧’ ଏକ ତେଲୁଗୁ ଆକ୍ସନ-ଥ୍ରୀଲର ଫିଲ୍ମ। ଏହା ତେଲୁଗୁ ବ୍ୟତୀତ ହିନ୍ଦୀ, ତାମିଲ, ମାଲାୟାଲାମ ଓ କନ୍ନଡ଼ ଭାଷାରେ ରିଲିଜ୍ ହୋଇଛି। ଫିଲ୍ମରେ ଜୁନିୟର ଏନଟିଆରଙ୍କ ସହ ସୈଫ ଅଲ୍ଲୀ ଖାନ ପ୍ରମୁଖ ଭୂମିକାରେ ରହିଛନ୍ତି। ଫିଲ୍ମ ଖୁବ୍ ଶୀଘ୍ର ଘରୋଇ ବକ୍ସ ଅଫିସ୍ରେ ୨୦୦ କୋଟି କ୍ଲବରେ ସାମିଲ ହେବାକୁ ଯାଉଛି।
