ନୂଆଦିଲ୍ଲୀ ୨୪।୦୧: ଚାଲିଛି ମହାକୁମ୍ଭ ମେଳା । ମହାସ୍ନାନ ପାଇଁ ଏକାଠି ହୋଇଛନ୍ତି ସାରା ଦେଶର ସାଧୁସନ୍ଥ । କିଛି ସାଧୁସନ୍ଥ ସୋସିଆଲ ମିଡିଆରେ ହେଉଛନ୍ତି ଭାଇରାଲ । ସେ IIT ବାବା ହୁଅନ୍ତୁ କି ବାହୁବଳୀ ବାବା ସମସ୍ତେ ହୋଇଛନ୍ତି ଭାଇରାଲ୍ । କିନ୍ତୁ ଏବେ ଆଉ ଜଣେ ବାବା ଆସିଛନ୍ତି ସାମ୍ନାକୁ ।
ସେ M-Tech ବାବା ନାଁରେ ବେଶ୍ ପରିଚିତ । ଦିନେ ସେ ଘରୋଇ କମ୍ପାନୀରେ କରୁଥିଲେ ଚାକିରୀ । ୪୦୦ କର୍ମଚାରୀଙ୍କ ଥିଲେ ବସ୍ । ଆଉ ମାସକୁ ପାଉଥିଲେ ୩ ଲକ୍ଷ ୨୫ ହଜାର ଟଙ୍କା । କିନ୍ତୁ ଏବେ ସେ ଇଶ୍ବରଙ୍କ ଭକ୍ତିରେ ନିମଗ୍ନ ।
ଏହି ଏମ୍ଟେକ୍ ବାବାଙ୍କ ନାଁ ହେଉଛି ଦିଗମ୍ବର କୃଷ୍ଣ ଗିରି । ବୟସ ୫୫ ବର୍ଷ । ସେ ବେଙ୍ଗାଲୁରର ବାସିନ୍ଧା । ତାଙ୍କର ଜନ୍ମ ତେଲୁଗୁ ବ୍ରାହ୍ମଣ ପରିବାରରେ ହୋଇଥିଲା । ସେ ୨୦୧୦ରେ ନେଇଥିଲେ ସନ୍ୟାସ । ଆଉ ୨୦୧୯ରେ ହୋଇଥିଲେ ନାଗା ସାଧୁ । ସେ ହରିଦ୍ବାରରେ ୧୦ ଦିନ ଭିକ ମାଗିଥିଲେ । ଦିନ ଥିଲା ସେ ୪୦ ଲକ୍ଷ ବାର୍ଷିକ ଦରମା ପାଉଥିଲେ ।
୪୦୦ କର୍ମଚାରୀ ତାଙ୍କ ଅଧିନରେ କାମ କରୁଥିଲେ । ସେ କର୍ଣ୍ଣାଟକ ବିଶ୍ୱବିଦ୍ୟାଳୟରୁ ଇଞ୍ଜିନିୟରିଂ ଶିକ୍ଷା ଗ୍ରହଣ କରିଥିଲେ ସେ । ଏମ୍ଟେକ୍ରେ ଟପ୍ପର ଥିଲେ । ଏହାପରେ ସେ ବିଶ୍ୱର ସର୍ବଶ୍ରେଷ୍ଠ ବହୁ ରାଷ୍ଟ୍ରୀୟ କଂପାନିଗୁଡି଼କରେ କାମ କରିଥିଲେ । ଶେଷ ଚାକିରୀ ସେ ଦିଲ୍ଲୀରେ କରିଥିଲେ । ସେଠାରେ ସେ ଜେନେରାଲ୍ ମ୍ୟାନେଜର ପଦରେ ରହିଥିଲେ ।
ଅନେକ ଲୋକ ତାଙ୍କୁ ସଫଳ କହୁଥିବା ବେଳେ ଗୋଟିଏ ସମୟରେ ତାଙ୍କ ପାଇଁ ସବୁକିଛି ଅର୍ଥହୀନ ହୋଇପଡି଼ଲା ।କର୍ପୋରେଟ୍ ଚାକିରି ତାଙ୍କୁ ଆଉ ସନ୍ତୋଷ ଦେଇପାରିଲାନି । ତେଣୁ ୨୦୧୦ରେ ଚାକିରି ଛାଡି଼ ନିଜର ଅସ୍ତିତ୍ୱ ସନ୍ଧାନର ଯାତ୍ରାରେ ବାହାରି ପଡ଼ିଲେ ସେ । ସାଧୁମାନଙ୍କର ବିଭିନ୍ନ ଆଖଡ଼ା ବୁଲିବା ଆରମ୍ଭ କଲେ । କିନ୍ତୁ କେହି ତାଙ୍କୁ ଗ୍ରହଣ କଲେନାହିଁ ।
ସାଧୁ ବେଶରେ ସେ ୧୦ ଦିନ ହରିଦ୍ବାରରେ ଭିକ ମାଗି ସନ୍ନ୍ୟାସୀ ଭାବେ ଜୀବନ ବିତାଇଲେ । ଶେଷରେ ନିରଞ୍ଜନୀ ଆଖଡ଼ା ପକ୍ଷରୁ ତାଙ୍କୁ ଗ୍ରହଣ କରାଗଲା । M-Tech ବାବାଙ୍କ ଅନୁଯାୟୀ ସେ ନିରଞ୍ଜନ ଆଖଡ଼ା ବିଷୟରେ ଗୁଗୁଲ୍ରେ ସର୍ଚ୍ଚ କରିଥିଲେ । ଏହାପରେ ସେ ମହନ୍ତ ଶ୍ରୀ ରାମ ରତନ ଗିରି ମହାରାଜଙ୍କ ଅଧୀନରେ ନାଗା ସାଧୁ ହୋଇଥିଲେ । ବର୍ତ୍ତମାନ ସେ ଉତ୍ତରକାଶୀର ଏକ ଛୋଟ ଗାଁରେ ରହୁଛନ୍ତି ।
