ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କ ସ୍ମାରକ କେଉଁଠି ତିଆରି ହେବ ତାକୁ ନେଇ ଖୁବ୍ ଚର୍ଚ୍ଚା ହୋଇଥିଲା। ବହୁ କସରତ ପରେ ପୂର୍ବତନ ପ୍ରଧାନମନ୍ତ୍ରୀଙ୍କ ସ୍ମାରକ ନିର୍ମାଣ ପାଇଁ ଜାଗା ମିଳି ଯାଇଛି। ସରକାରଙ୍କ ପକ୍ଷରୁ ପରିବାରକୁ ଜମି ପ୍ରଦାନ କରାଯାଇଛି। ଏହି ଜାଗା ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ସ୍ମାରକ ନିର୍ମାଣ ପାଇଁ ସ୍ଥିରିକୃତ ଜାଗା ନିକଟରେ ରହିଛି। 

ସିଏନଏନ ନ୍ୟୁଜ ୧୮ର ରିପୋର୍ଟ ଅନୁଯାୟୀ, ନମୋହନ ସିଂଙ୍କ ପରିବାର ପକ୍ଷରୁ ଟ୍ରଷ୍ଟ ଗଠନ କରାଯିବ। ତେବେ ଏହି ଟ୍ରଷ୍ଟ ଗଠନକୁ ସରକାରଙ୍କ ପକ୍ଷରୁ ଅପେକ୍ଷା କରାଯାଇଛି। ଏହା ପରେ ଆନୁଷ୍ଠାନିକ ଜମି ଆବଣ୍ଟନ କରାଯିବ। ସରକାରଙ୍କ ପକ୍ଷରୁ ଟ୍ରଷ୍ଟକୁ ୨୫ ଲକ୍ଷ ଟଙ୍କା ଦିଆଯିବ। ଏହି ରାଶିକୁ ସ୍ମାରକ ନିର୍ମାଣରେ ଖର୍ଚ୍ଚ କରାଯିବ। ମନମୋହନ ସିଂହଙ୍କ ନିଧନ ପରଠୁ ସରକାର ସ୍ମାରକ ନିର୍ମାଣ ପାଇଁ ଜମି ସନ୍ଧାନରେ ଥିଲେ।  ଏଥିପାଇଁ ସର୍ଭେ ବି କରାଯାଇଥିଲା। 

Also read: ଓଡ଼ିଶା ଉପକୂଳରେ ବଢ଼ିଛି ହେନ୍ତାଳ ବନ; ଲୋକସଭାରେ ତଥ୍ୟ ରଖିଲେ କେନ୍ଦ୍ର ମନ୍ତ୍ରୀ

ଆବଣ୍ଟିତ ଜମି ରାଷ୍ଟ୍ରୀୟ ସ୍ମୃତି ସ୍ଥଳ ଅନ୍ତର୍ଗତରେ ଆସୁଛି, ଯାହାକୁ ନେଇ ୟୁପିଏ ସରକାର ୨୦୧୩ରେ ଏକ ପ୍ରସ୍ତାବ ଗୃହୀତ କରିଥିଲେ। ଏହି ପରିସରରେ ଅଟଳ ବିହାରୀ ବାଜପେୟୀଙ୍କ ମଧ୍ୟ ସ୍ମାରକ ରହିଛି। ଜାନୁଆରୀ ଆରମ୍ଭରେ ସିପିଡବ୍ଲ୍ୟୁର ଅଧିକାରୀ ରାଷ୍ଟ୍ରୀୟ ସ୍ମୃତି ସ୍ଥଳ ପରିଦର୍ଶନ କରିଥିଲେ ଏବଂ ସଞ୍ଜୟ ଗାନ୍ଧୀଙ୍କ ସମାଧି ନିକଟରେ ଜାଗା ଦେବା ନେଇ ଆଲୋଚନା ହୋଇଥିଲା। ଏପରିକି ଆଉ କିଛି ଜାଗାର ପ୍ରସ୍ତାବ ମନମୋହନ ସିଂହଙ୍କ ପରିବାର ପକ୍ଷରୁ ଦିଆଯାଇଥିଲା। ତେବେ ପ୍ରଣବ ମୁଖାର୍ଜୀଙ୍କ ସ୍ମାରକ ନିକଟରେ ମିଳୁଥିବା ଜମି ଉପରେ ପରିବାର ଓ ସରକାରଙ୍କ ମଧ୍ୟରେ ସହମତି ପ୍ରକାଶ ପାଇଛି।  

ସୂଚନାଯୋଗ୍ୟ, ମନମୋହନଙ୍କ ନିଧନ ପରେ ତାଙ୍କ ଅନ୍ତିମ ସଂସ୍କାରକୁ ନେଇ ରାଜନୀତି ଜୋର ଧରିଥିଲା। ସ୍ମାରକ ସ୍ଥଳ ପାଇଁ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡ଼ଗେ ଗୃହ ମନ୍ତ୍ରୀ ଅମିତ ଶାହଙ୍କୁ ଚିଠି ଲେଖିଥିଲେ। ଖଡ଼ଗେ ଦାବି କରିଥିଲେ ଯେ, ମନମୋହନଙ୍କ ଅନ୍ତିମ ସଂସ୍କାର ସେହି ସ୍ଥାନରେ କରାଯାଉ ଯେଉଁଠି ସ୍ମାରକ ନିର୍ମାଣ କରାଯାଇ ପାରିବ। ଏହା ଉପରେ ସରକାର କହିଥିଲେ ଯେ, ଆମେ ସ୍ମାରକ ପାଇଁ ଜମି ସନ୍ଧାନ ପ୍ରକ୍ରିୟା ଆରମ୍ଭ କରି ଦେଇଛୁ। ତେବେ ପୂର୍ବତନ ପ୍ରଧାନମନ୍ତ୍ରୀଙ୍କ ଅନ୍ତିମ ସଂସ୍କାର ନିଗମ ବୋଧ ଘାଟରେ କରାଯାଇଥିଲା। 

Also read: ଚୀନ କଥା କହି ଚିଡ଼ାଇ ଦେଲେ ରାହୁଲ; ବିଶେଷାଧିକାର ଉଲ୍ଲଂଘନ ପ୍ରସ୍ତାବ ଆଣିବାକୁ ବିଜେପିର ଅନୁରୋଧ

ଏହା ଉପରେ କଂଗ୍ରେସ ସମେତ ଅନେକ ଦଳ ଆପତ୍ତି ପ୍ରକାଶ କରିଥିଲେ। ସରକାରଙ୍କ କହିବା କଥା ପୂର୍ବତନ ପ୍ରଧାନମନ୍ତ୍ରୀଙ୍କ ଅନ୍ତିମ ସଂସ୍କାର ପାଇଁ ପୂରା ପ୍ରଟୋକଲ ପାଳନ କରାଯାଇଛି। ଯେଉଁଠି ସ୍ମାରକ ନିର୍ମାଣ ହେବ, ସେଠାରେ ଅନ୍ତିମ ସଂସ୍କାର କରାଇବା ସମ୍ଭବ ନୁହେଁ। କାରଣ ଏବେ ସ୍ଥାନର ସନ୍ଧାନ କରାଯାଉଛି।