ମାଲକାନଗିରି ୦୮।୦୧ : ମାଲକାନଗିରିରେ ବଡ଼ଧରଣର ଲୁଟ୍ । କାନ୍ଥ ଭାଙ୍ଗି ମୋବାଇଲ୍ ଦୋକାନରୁ ନେଇଗଲେ କୋଟିରୁ ଅଧିକ ଟଙ୍କାର ସାମଗ୍ରୀ ।ଚୋରି ହୋଇଥିବା ସାମଗ୍ରୀ ମଧ୍ୟରେ ଅନେକ ଦାମୀ ମୋବାଇଲ୍ ରହିଥିବା ସୂଚନା ମିଳିଛି ।
ଖବର ଅନୁଯାୟୀ, ମାଲକାନଗିରି ଜିଲ୍ଲାର ସବୁ ଠାରୁ ବଡ଼ ମୋବାଇଲ୍ ଦୋକାନ ଓମ୍ ମୋବାଇଲ୍ କେୟାର । ଏହି ଦୋକାନରୁ ପ୍ରାୟ ଦେଢ କୋଟି ଟଙ୍କାର ନାମୀଦାମୀ ମୋବାଇଲ୍ ଚୋରି ହୋଇଛି । ଦୁଇ ଜଣ ବ୍ୟକ୍ତି ମୁହଁରେ ମାସ୍କ ଲଗାଇ କାନ୍ଥ ଭାଙ୍ଗି ଏକ ଛୋଟିଆ ଛିଦ୍ର କରି ଦୋକାନରେ ପଶିଥିଲେ । ଏହାପରେ ଦୋକାନରେ ଥିବା ଆଇଫୋନ୍, ସାମସଙ୍ଗ, ଓପୋ, ଭିଭୋ ଆଦି କମ୍ପାନୀର ନାମୀ ଦାମୀ ମୋବାଇଲ୍ ଲୁଟ୍ କରିଛନ୍ତି । ଯାହାର ସମସ୍ତ ଦୃଶ୍ୟ ଦୋକାନରେ ଲାଗିଥିବା ସିସିଟିଭିରେ କଏଦ ହୋଇଛି ।
ସେପଟେ ଲୁଟ୍ ପରେ ପୋଲିସ ଘଟଣାସ୍ଥଳରେ ପହଞ୍ଚି ଛାନ୍ଭିନ୍ ଆରମ୍ଭ କରିଛି । ଲୁଟେରାମାନେ ଗୋଟିଏ ବସ୍ତା ମୋବାଇଲ ରାସ୍ତା କଡ଼ରେ ଫିଙ୍ଗିଥିବା ଦେଇଛନ୍ତି । ଏହାବାଦ୍ ଅନ୍ୟ ସବୁ ମୋବାଇଲ୍ର ଖୋଳ ଦୋକାନ ସାମ୍ନାରେ ଥିବା ଏକ ନିଛାଟିଆ ଜଙ୍ଗଲରେ ପକାଇ ସମସ୍ତ ମୋବାଇଲ ନେଇ ଫେରାର ମାରିଛନ୍ତି ଲୁଟେରା । ସମସ୍ତ ପ୍ୟାକେଟ୍କୁ ଜବତ କରି ପୋଲିସ ଏବଂ ସାଇଣ୍ଟିଫିକ୍ ଟିମ୍ ତଦନ୍ତ ଆରମ୍ଭ କରିଛି । ତେବେ କିଏ ଓ କାହିଁକି ଏହି ଲୁଟ୍ କରିଛି । ପୋଲିସ ତଦନ୍ତ ପରେ ହିଁ ପୁରା ସ୍ପଷ୍ଟ ହେବ ବୋଲି ଦୋକାନ ମାଲିକ ଆଶା କରୁଛନ୍ତି ।
