ଟିଟିଲାଗଡ ୨୦/୮: ହଠାତ ଚଳନ୍ତା ମାଲବାହୀ ଟ୍ରେନ ଆଗକୁ ଚାଲିଆସିଲେ ଯୁବକ ଯୁବତୀ । ଆଖି ପିଛୁଳାକେ ସବୁ ଶେଷ ହୋଇଗଲା । ଘଟଣାସ୍ଥଳରେ ନାବାଳିକାଙ୍କ ମୃତ୍ୟୁ । ମେଡିକାଲରେ ମରଣ ସହ ସଂଘର୍ଷ କରୁଛନ୍ତି ଯୁବକ । ଟିଟିଲାଗଡରୁ କେସିଙ୍ଗା ଯାଇଥିବା ଟ୍ରେନ ଲାଇନ ଲୁଥୁରବନ୍ଧ ନିକଟ ତେଲ ନଦୀ ରେଲୱେ ଓଭରବ୍ରିଜ ଉପରେ ଘଟିଥିବା ହୃଦୟ ବିଦାରକ ଘଟଣାକୁ ନେଇ ସବୁଠି ଚର୍ଚ୍ଚା ।
ଗୁରୁତର ଯୁବକ କଳାହାଣ୍ଡି କେସିଙ୍ଗା ଥାନା ବିନେକେଲା ଗାଁର ଘନଶ୍ୟାମ ବାଗ । ସେହି ଗାଁର ଜଣେ ନାବାଳିକାଙ୍କ ସହ ଘନଶ୍ୟାମଙ୍କର ପ୍ରେମ ସଂପର୍କ ଥିଲା । ଭଲପାଇବାକୁ ସ୍ବୀକୃତି ନମିଳିବାରୁ ଜୀବନ ହାରିବାର ଚରମ ନିଷ୍ପତ୍ତି ନେଇଥିଲେ ପ୍ରେମୀଯୁଗଳ । ଆଉ ମଙ୍ଗଳବାର ଟ୍ରେନ ଆଗକୁ ଡେଇଁପଡିଥିଲେ ଉଭୟ ।
ନାବାଳିକା ଟ୍ରେନ ସାମ୍ନାରେ ପଡିଯିବାରୁ ଟ୍ରେନ ତାଙ୍କ ଉପରେ ମାଡି ଯାଇଥିଲା। ଘଟଣାସ୍ଥଳରେ ତାଙ୍କର ମୃତ୍ୟୁ ହୋଇଯାଇଛି । ଘନଶ୍ୟାମ ଟ୍ରେନ ଧକ୍କାରେ ଛିଟିକି ପଡି ରେଲୱେ ଟ୍ରାକ ପାଖରେ ଗୁରୁତର ହୋଇ ପଡିଥିଲେ । ଟ୍ରେନର ଡ୍ରାଇଭର ଟ୍ରେନ ଅଟକାଇ ଘନଶ୍ୟାମଙ୍କୁ ଟିଟିଲାଗଡ ଷ୍ଟେସନ ଯାଏ ଆଣି ପୋଲିସକୁ ହସ୍ତାନ୍ତର କରିଥିଲେ । ସେଠାରୁ ତୁରନ୍ତ ତାଙ୍କୁ ଟିଟିଲାଗଡ ମେଡିକାଲରେ ଭର୍ତ୍ତି କରାଯାିଥିଲା । ଘରେ ବିବାହ ପାଇଁ ରାଜି ନହେବାରୁ ଉଭୟ ଆତ୍ମହତ୍ୟା କରିଥିବା ପ୍ରାଥମିକ ତଦନ୍ତରୁ ଜଣାପଡିଛି । ରେଲୱେ ପୋଲିସ ଅଧିକ ଛାନ୍ଭିନ୍ ଜାରି ରଖିଛି ।
