ମୁମ୍ବାଇ,୧୬/୨: ମହାରାଷ୍ଟ୍ରର ସରକାର ଆଣିବାକୁ ଯାଉଛନ୍ତି ନୂଆ ଆଇନ । ରାଜ୍ୟରେ ଲଭ୍ ଜିହାଦ୍ ଓ ଜବରଦସ୍ତ ଧର୍ମାନ୍ତରଣ ଭଳି ମାମଲାକୁ ରୋକିବା ପାଇଁ ଆଇନ ଆଣିବେ ସରକାର । ଏଥିଲାଗି ୭ ସଦସ୍ୟବିଶିଷ୍ଟ କମିଟି ଗଠନ କରାଯାଇଛି । ମହାରାଷ୍ଟ୍ରର ପୋଲିସ ମହାନିର୍ଦ୍ଦେଶକ ସଞ୍ଜୟ ବର୍ମା ଏହି କମିଟିର ଅଧ୍ୟକ୍ଷ ରହିଛନ୍ତି । ଏଥିରେ ମହିଳା ଓ ଶିଶୁ ବିକାଶ, ସଂଖ୍ୟାଲଘୁ, ଆଇନ, ସାମାଜିକ ନ୍ୟାୟ, ଗୃହ ଭଳି ପ୍ରମୁଖ ବିଭାଗର ବରିଷ୍ଠ ପଦାଧିକାରୀମାନେ ସଦସ୍ୟ ରହିଛନ୍ତି । ଧର୍ମାନ୍ତରଣ ଓ ଲଭ୍ ଜିହାଦ୍ ମାମଲାରେ ହେଉଥିବା ଅଭିଯୋଗଗୁଡ଼ିକର କିଭଳି ମୁକାବିଲା କରାଯିବ, ତାହା ନେଇ ଏହା ପରାମର୍ଶ ଦେବ ।
ଏହାଛଡ଼ା କମିଟି ଅନ୍ୟ ରାଜ୍ୟଗୁଡ଼ିକରେ ଲାଗୁ ହୋଇଥିବା ଆଇନର ବି ଅଧ୍ୟୟନ କରିବ ଏବଂ ଏହି ଆଧାରରେ ନ୍ୟାୟିକ ପରାମର୍ଶ ପ୍ରଦାନ କରିବ । ଶ୍ରଦ୍ଧା ୱାକରଙ୍କୁ ତାଙ୍କ ପ୍ରେମିକ ଅଫତାବ ପୁନାୱାଲା ୨୦୨୨ରେ ଦିଲ୍ଲୀରେ ହତ୍ୟା କରି ଶବକୁ ଖଣ୍ଡ ଖଣ୍ଡ କରି ଏଣେ ତେଣେ ଫିଙ୍ଗିଥିଲା । ଏହାପରେ ବିଜେପି ଏହି ମାମଲାରେ ଲଭ୍ ଜିହାଦ୍ ପ୍ରସଙ୍ଗ ଉଠାଇଥିଲା । ମହାରାଷ୍ଟ୍ରର ବିରୋଧୀ ଦଳ ଏନ୍ସିପି ନେତ୍ରୀ ସୁପ୍ରିୟା ସୁଲେ କହିଛନ୍ତି, ବିବାହ କିମ୍ବା ପ୍ରେମ ହେଉଛି ବ୍ୟକ୍ତିଗତ ନିଷ୍ପତ୍ତି । ତେଣୁ ସରକାର ମୁଖ୍ୟ ପ୍ରସଙ୍ଗ ଉପରେ ଧ୍ୟାନ ଦେବା ଉଚିତ । ମୋଦିଜୀ ଏବେ ଆମେରିକାରୁ ଫେରିଛନ୍ତି । ଆମେରିକା ଆମ ଉପରେ ନୂଆ ଟାରିଫ୍ ଲଗାଇଛି । ଏହାର ପ୍ରଭାବ ଆମ ଦେଶ ଉପରେ ପଡ଼ିବ । ତେଣୁ ଏହି ମାମଲା ଉପରେ ଗୁରୁତ୍ୱ ଦିଆଯିବା ଆବଶ୍ୟକ ।
ମହାରାଷ୍ଟ୍ର ସପା ବିଧାୟକ ଅବୁ ଆଜ୍ମି କହିଛନ୍ତି, ମୁସ୍ଲିମ୍ ଯୁବକମାନେ ହିନ୍ଦୁ ଧର୍ମ ଆପଣାଉଛନ୍ତି ଏବଂ ମୁସ୍ଲିମ୍ ଯୁବତୀ ହିନ୍ଦୁ ଯୁବକଙ୍କୁ ବିବାହ କରୁଛନ୍ତି । ଯଦି ସମ୍ବିଧାନରେ ଦିଆଯାଇଥିବା ଅଧିକାର ଅନୁସାରେ ଏହା ହେଉଛି, ତେବେ ଏଥିରେ ଭୁଲ କେଉଁଠି ରହିଲା?
