ଭୁବନେଶ୍ୱର 04/04 :   'ପ୍ରେମ' ଏକ ସୁନ୍ଦର ଅନୁଭୂତି । ଏକ ସ୍ୱର୍ଗୀୟ ଅନୁଭବ । ସ୍ନେହର ବଳିଷ୍ଠ ଅଭିବ୍ୟକ୍ତି ହେଉଛି ପ୍ରେମ । ମନରେ ହଜାର ହଜାର ଆଶା ଜାଗ୍ରତ କରେ । ବଞ୍ଚିବାର ପ୍ରେରଣା ସାଜେ । ଏହାକୁ ହୁଏତ ଶବ୍ଦରେ ବର୍ଣ୍ଣନା କରିବା କଷ୍ଟକର ହୋଇପଡ଼େ। କାରଣ ଏହା କେବଳ ମନ ସହ ମନ ଓ ଆତ୍ମା ସହ ଆତ୍ମାର ମିଳନ। ଏତେ ସବୁ ଭିତରେ ଏକ ବଡ଼ ପ୍ରଶ୍ନ ଆପଣଙ୍କ ପାଇଁ,  ପ୍ରେମ କଣ ଜୀବନ ନେଇପାରେ । କିନ୍ତୁ ଏଠି ଘଟିଛି ସେମିତି କିଛି। ପ୍ରେମ ପାଇଁ ଚାଲିଯାଇଛି ଜୀବନ। ତା ପୁଣି ପ୍ରେମିକା ଆଗରେ।  ରାଜଧାନୀରେ ଘଟିଛି ଏଭଳି ଅଭାବନୀୟ ଘଟଣା।

 ପ୍ରେମିକାର ଭଡା ଘରେ ଝୁଲି ପଡିଲା ପ୍ରେମିକ। ମୃତକ ହେଲେ କେନ୍ଦ୍ରାପଡ଼ାର ପ୍ରଭୁ ମହିମା ବେହେରା। ଗୁରୁବାର  ରାତିରେ ଗୋଠପାଟଣା ଅଂଚଳରେ ଘଟିଛି ଏମିତି କିଛି ଘଟଣା।  ପ୍ରେମିକା ରହୁଥିବା ଭଡା ଘରେ ପ୍ରେମିକର ଓଢଣୀରେ ଝୁଲି ପଡିଲେ ପ୍ରଭୁ।  ମୃତଦେହକୁ ଉଦ୍ଧାର କରି କ୍ୟାପିଟାଲ ହସ୍ପିଟାଲରେ ଭର୍ତି କରିଛି ଚନ୍ଦକା ଥାନା ପୋଲିସ୍।  ଉଭୟଙ୍କ ମଧ୍ୟରେ ଦୀର୍ଘଦିନ ହେବ ପ୍ରେମ ସମ୍ପର୍କ ଥିଲା।  ଗତ କିଛି ଦିନ ଉଭୟଙ୍କ ମଧ୍ୟରେ ଝଗଡା ଲାଗି ରହୁଥିଲା।  ପରିବାର ଉପସ୍ଥିତରେ ଉଭୟଙ୍କ ଭିତରେ ଆପୋଷ ବୁଝୁବଣା ହୋଇଥିଲା।  ହେଲେ ଗୁରୁବାର  ସନ୍ଧ୍ୟାରେ ପ୍ରେମିକା ରହୁଥିବା ଭଡା ଘରକୁ ଯାଇଥିଲେ ପ୍ରଭୁ। ତାପରେ ଘଟିଛି ଏଭଳି ଘଟଣା। 

 ସେପଟେ ପ୍ରଭୁଙ୍କ  ପରିବାର ଆଣିଛନ୍ତି ହତ୍ୟା ଅଭିଯୋଗ।  ପ୍ରେମିକା ଓ ତାର ସାଙ୍ଗମାନେ ହତ୍ୟା କରିଥିବା ଅଭିଯୋଗ କରିଛନ୍ତି।  ପ୍ରଭୁଙ୍କ ବେକରେ କୌଣସି ଦାଗ ନଥିବାରୁ ଶ୍ୱାସରୁଦ୍ଧ କରି ହତ୍ୟା କରିଥିବା ଅନୁମାନ୍ କରାଯାଉଛି।  ପୋଲିସ୍ ଏବେ ପୂରା ଘଟଣାକୁ ନେଇ ତଦନ୍ତ କରୁଛି।