ଭଦ୍ରକ: ଯାତ୍ରା ମାଲିକଙ୍କ ବୈଠକକୁ ନଡାକିବା ଘଟଣାରେ ପ୍ରତିକ୍ରିୟାଶୀଳ ହୋଇଛି ଯାତ୍ରା ରାଜ ନନ୍ଦିନୀ। ଶୁକ୍ରବାର ଏକ ସାମ୍ବାଦିକ ସମ୍ମିଳନୀରେ ଏହାକୁ ବିରୋଧ କରିଛନ୍ତି ଯାତ୍ରା ରାଜ ନନ୍ଦିନୀ ମାଲିକ ସ୍ମୃତି ରଞ୍ଜନ ପଲେଇ। ସାମ୍ବାଦିକ ସମ୍ମିଳନୀରେ ସ୍ମୃତି କହିଛନ୍ତି ‘‘ ତାଙ୍କୁ ଯାତ୍ରା ମାଲିକ ସଙ୍ଘର ବୈଠକକୁ ଡକାଯାଇନାହିଁ । ଯାତ୍ରାର ଏନ୍ତୁଡ଼ି ଶାଳ ଭଦ୍ରକ ଜିଲ୍ଲାକୁ ଅଣଦେଖା କରାଯାଉଛି।’’
‘‘ନରି ପଣ୍ଡା ଭଦ୍ରକ ଜିଲ୍ଲାର। ନରି ପଣ୍ଡା ଯଦି ମାଲିକଙ୍କୁ ଦୁର୍ବ୍ୟବହାର କରିଛନ୍ତି ତେବେ ତାହା ନିନ୍ଦନୀୟ। ତାଙ୍କୁ ନେଇ ଏତେ ବିବାଦ ହୋଇଛି। ହେଲେ ଯଦି ନରିଙ୍କ ଉପରେ ଆଲୋଚନା ହେଉଛି, ତେବେ ଭଦ୍ରକ ଜିଲ୍ଲାର ଯାତ୍ରା ପାର୍ଟିଙ୍କୁ ଡାକିବା କଥା। କିନ୍ତୁ ଯାତ୍ରା ସଂଘ ଏମିତି କଲେନାହିଁ। ମାଲିକ ସଂଘ ତରଫରୁ ନରି ପଣ୍ଡାଙ୍କୁ ବଏକଟ କରିବା ବିଷୟରେ ମୁଁ ଅବଗତ ହୋଇନାହିଁ। ତେଣୁ ଯଦି ନରି ପଣ୍ଡା ଯାତ୍ରା ରାଜ ନନ୍ଦିନୀକୁ ଆସନ୍ତି ତେବେ ଆମେ ତାଙ୍କୁ ସ୍ବାଗତ କରିବୁ।’’
ସେ ଆହୁରି କହିଛନ୍ତି କଳାକାରଙ୍କୁ ମୋଟା ଅଙ୍କର ଟଙ୍କା ଦେଉଛନ୍ତି। କିନ୍ତୁ ଅନ୍ୟ ଯାତ୍ରା କର୍ମଚାରୀମାନେ ଅବହେଳିତ ହେଉଛନ୍ତି। ଏମିତି ସ୍ଥିତି ରହିଲେ ଆଗାମୀ ସମୟରେ ଯାତ୍ରା ଅନୁଷ୍ଠାନଗୁଡ଼ିକ ଖୁବ୍ କମ୍ ଦିନରେ ବନ୍ଦ ହୋଇଯିବ।’’ ସେହଭଳି ସମ୍ବାଦିକ ସମ୍ମିଳନୀରେ ଯୋଗଦେଇ ରାଜନନ୍ଦିନୀ ଉପଦେଷ୍ଟା ଗଦାଧର ବଳ କହିଛନ୍ତି କଳାକାରମାନେ ପଣ୍ୟ ନୁହେଁ । ମାଲିକମାନେ କିଣାବିକା, ଉପହାରରୁ ଦୁରେଇ ରୁହନ୍ତୁ।
ସୂଚନାଥାଉକି, ଯାତ୍ରା କଳାକାର ତଥା ହାସ୍ୟ ଅଭିନେତା ନରି ପଣ୍ଡା ଆଗାମୀ ଯାତ୍ରା ଋତୁ ୨୦୨୫- ୨୬ ପାଇଁ ତୁଳସୀ ଗଣନାଟ୍ୟକୁ ଯିବା ପାଇଁ ୧୬ ଲକ୍ଷ ଟଙ୍କାରେ ଏଗ୍ରିମେଣ୍ଟ କରିଥିଲେ। ସେ ଦୁଇଟି ପର୍ଯ୍ୟାୟରେ ୧୦ ଲକ୍ଷ ଟଙ୍କା ନେଇଥିବା ବେଳେ ଆଉ ଅବଶିଷ୍ଟ ଟଙ୍କା ପାଇଁ ତୁଳସୀ ଗଣନାଟ୍ୟ ମାଲିକ ଅନନ୍ତ ନାରାୟଣ ଧଳଙ୍କୁ ଫୋନ କରିବାରୁ ସେ ଫୋନରେ ତାଙ୍କୁ ଆଉ ତାଙ୍କ ପତ୍ନୀଙ୍କୁ ଖରାପ ବ୍ୟବହାର କରିଥିବା ନରି ପଣ୍ଡା ଅଭିଯୋଗ କରିଥିଲେ । ଖାଲି ସେତିକି ନୁହେଁ ନରି ପଣ୍ଡାଙ୍କୁ ତୁଳସୀ ଗଣନାଟ୍ୟର ମାଲିକ ମାଡ଼ ମଧ୍ୟ ଅଭିଯୋଗ କରିଥିଲେ ନରି । ଅନ୍ୟପଟେ ତୁଳସୀ ମାଲିକ ଅଭିଯୋଗକୁ ଖଣ୍ଡନ କରିବା ସହ ତଦନ୍ତ କଥା ମଧ୍ୟ ଉଠାଇଛନ୍ତି ।
