ଭଦ୍ରକ: ଓଡ଼ିଶା ଯାତ୍ରା ଜଗତରେ ‘ଯାତ୍ରା ଚାଲିଛି’ । ହାସ୍ୟ ଅଭିନେତା ନରି ପଣ୍ଡା ଓ ତୁଳସୀ ମାଲିକଙ୍କ ମଧ୍ୟରେ ଥିବା ବିବାଦ ଆହୁରି ବଡ଼ ହେଉଥିବା ନଜର ଆସୁଛି । ଶୁକ୍ରବାର ବୈଠକ କରି ଯାତ୍ରା ମାଲିକ ସଂଘ ଅଭିନେତା ନରି ପଣ୍ଡାଙ୍କୁ ବଏକଟ୍ କରିଛି । ମାଲିକଙ୍କୁ ଦୁର୍ବ୍ୟବହାର କରିଥିବା କହି ଆସନ୍ତା ଯାତ୍ରା ବର୍ଷ ୨୦୨୫- ୨୬ ଅର୍ଥାତ୍ ଗୋଟିଏ ବର୍ଷ ନରି ପଣ୍ଡାଙ୍କୁ ବ୍ୟାନ୍ କରାଯାଇଛି । ବୈଠକ ପରେ ଯାତ୍ରା ମହାସଂଘ ସଦସ୍ୟ ଏହି ଘୋଷଣା କରିଥିଲେ । ତେବେ ଏହାରି ଭିତରେ ଯାତ୍ରା ମାଲିକଙ୍କ ମଧ୍ୟରେ ମତଭେଦ ସାମନାକୁ ଆସିଛି ।
ଯାତ୍ରା ରାଜ ନନ୍ଦିନୀର ମାଲିକ ସ୍ମୃତି ରଞ୍ଜନ ପଲେଇ ଯାତ୍ରୀ ମାଲିକଙ୍କ ଉପରେ ସଙ୍ଗୀନ ଅଭିଯୋଗ କରିଛନ୍ତି । ସେ କହିଛନ୍ତି, ‘କେବଳ ମାଲିକମାନଙ୍କ ପାଇଁ ଆଜି ଯାତ୍ରା ଜଗତରେ ଏମିତି ଅବସ୍ଥା ଘଟିଛି । ମାଳିକଙ୍କ ପାଇଁ କଳାକାର ମାଡ଼ ଖାଉଛନ୍ତି । ମାଲିକମାନେ କଳାକାରଙ୍କୁ ବିଗତ ଦିନରେ ଅତ୍ୟଧିକ ନିର୍ଯାତନା ଦେବାର ନଜିର ରହିଛି । ଯାହା ଆଗକୁ ମଧ୍ୟ ଆହୁରି ଭୟଙ୍କର ହେବ । ମାଲିକଙ୍କ ସମନ୍ୱୟ ଅଭାବ ପାଇଁ କଳାକାରମାନେ ବଳି ପଡ଼ୁଛନ୍ତି । ଆଗକୁ ଆହୁରି ଛୋଟ ଛୋଟ କଳାକାର ବଳି ପଡ଼ିବେ । ଶ୍ରମିକଙ୍କ କଥା ତ କେହା ପଚାରୁ ନାହାନ୍ତି ।‘ ନରି ପଣ୍ଡା ଭଦ୍ରକ ଜିଲ୍ଲାର ହୋଇ ଥିବାରୁ ଭଦ୍ରକ ଜିଲ୍ଲାର ଅନୁଷ୍ଠାନ ଯାତ୍ରା ରାଜ ନନ୍ଦିନୀକୁ ବୈଠକକୁ ଡକାଯାଇନଥିବା ସେ କହିଛନ୍ତି ।
କ'ଣ ରହିଛି ବିବାଦ
ସୂଚନାଥାଉକି, ଯାତ୍ରା କଳାକାର ତଥା ହାସ୍ୟ ଅଭିନେତା ନରି ପଣ୍ଡା ଆଗାମୀ ଯାତ୍ରା ଋତୁ ୨୦୨୫- ୨୬ ପାଇଁ ତୁଳସୀ ଗଣନାଟ୍ୟକୁ ଯିବା ପାଇଁ ୧୬ ଲକ୍ଷ ଟଙ୍କାରେ ଏଗ୍ରିମେଣ୍ଟ କରିଥିଲେ। ସେ ଦୁଇଟି ପର୍ଯ୍ୟାୟରେ ୧୦ ଲକ୍ଷ ଟଙ୍କା ନେଇଥିବା ବେଳେ ଆଉ ଅବଶିଷ୍ଟ ଟଙ୍କା ପାଇଁ ତୁଳସୀ ଗଣନାଟ୍ୟ ମାଲିକ ଅନନ୍ତ ନାରାୟଣ ଧଳଙ୍କୁ ଫୋନ କରିବାରୁ ସେ ଫୋନରେ ତାଙ୍କୁ ଆଉ ତାଙ୍କ ପତ୍ନୀଙ୍କୁ ଖରାପ ବ୍ୟବହାର କରିଥିବା ନରି ପଣ୍ଡା ଅଭିଯୋଗ କରିଥିଲେ । ଖାଲି ସେତିକି ନୁହେଁ ନରି ପଣ୍ଡାଙ୍କୁ ତୁଳସୀ ଗଣନାଟ୍ୟର ମାଲିକ ମାଡ଼ ମଧ୍ୟ ଅଭିଯୋଗ କରିଥିଲେ ନରି । ଅନ୍ୟପଟେ ତୁଳସୀ ମାଲିକ ଅଭିଯୋଗକୁ ଖଣ୍ଡନ କରିବା ସହ ତଦନ୍ତ କଥା ମଧ୍ୟ ଉଠାଇଛନ୍ତି ।
