ପୁରୀ ୪।୪: ମହାପ୍ରଭୁଙ୍କ ଜନ୍ମସ୍ଥାନ ଶ୍ରୀଗୁଣ୍ଡିଚା ମନ୍ଦିରର ଉନ୍ନତିମୂଳକ କାର୍ଯ୍ୟ ଶ୍ରୀମନ୍ଦିର ପ୍ରଶାସନ ପକ୍ଷରୁ ଜୋରସୋରରେ ଆଗେଇ ଚାଲିଛି । ତେବେ ସମସ୍ତ ଉନ୍ନତିମୂଳକ କାର୍ଯ୍ୟର ସମୀକ୍ଷା କରିଛନ୍ତି ଶ୍ରୀମନ୍ଦିର ଉପମୁଖ୍ୟ ପ୍ରଶାସକ ତଥା ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ । ନିଜେ ଜିଲ୍ଲାପାଳ ଗୁଣ୍ଡିଚା ମନ୍ଦିର ଯାଇ ସମସ୍ତ କାର୍ଯ୍ୟର ସମୀକ୍ଷା କରିଛନ୍ତି । ଗୁଣ୍ଡିଚା ମନ୍ଦିର ସିଂହଦ୍ଵାର ନିକଟରେ ନିର୍ମାଣ ହେବ ଏକ ନୂତନ ସୂଚନା କେନ୍ଦ୍ର । ସେଠାରେ ଭକ୍ତଙ୍କୁ ବିଭିନ୍ନ ସୂଚନା ଦିଆଯିବା ସହ ମହାପ୍ରଭୁଙ୍କର ବିଭିନ୍ନ ପୁସ୍ତକ ଭକ୍ତଙ୍କୁ ସ୍ବଳ୍ପ ମୂଲ୍ୟରେ ଯୋଗାଇ ଦିଆଯିବ ।
ସେହିପରି ଗୁଣ୍ଡିଚା ମନ୍ଦିର ଭିତରେ ଥିବା ରୋଷଶାଳାର ଉନ୍ନତିକରଣ କାର୍ଯ୍ୟ ଆରମ୍ଭ ହୋଇଛି । ମହାପ୍ରଭୁ ଗୁଣ୍ଡିଚା ମନ୍ଦିରରେ ଥିବା ସମୟରେ ଆଡପ ଅବଢ଼ା ପ୍ରସ୍ତୁତିରେ ବିଭିନ୍ନ ସମସ୍ୟା ସୃଷ୍ଟି ହେଉଥିବାରୁ ରୋଷଘର ଡିଜାଇନ୍ ବଦଳା ଯାଇ ଏକ ବଡ଼ ରୋଶଶାଳା ନିର୍ମାଣ ହେବ । ଆଡପ ଅବଢ଼ା ସେବନ କରିବା ପାଇଁ ସ୍ଥାନ ଅଭାବ ଥିବାରୁ ଏହାର ମଧ୍ୟ ଉନ୍ନତିକରଣ କରାଯିବ । ସେହିପରି ପାନୀୟ ଜଳ ବ୍ୟବସ୍ଥା, ଗୁଣ୍ଡିଚା ମନ୍ଦିର ଭିତରେ ବିଭିନ୍ନ ସୌନ୍ଦର୍ଯ୍ୟମୂଳକ କାର୍ଯ୍ୟ ମଧ୍ୟ କରାଯିବ । ତେବେ ଭକ୍ତଙ୍କ ପାଇଁ ଦୀର୍ଘ ବର୍ଷ ହେବ ଗୁଣ୍ଡିଚା ମନ୍ଦିର ବନ୍ଦ ଥିବାବେଳେ ଶ୍ରୀମନ୍ଦିର ପ୍ରଶାସନ ଶୀଘ୍ର ସମସ୍ତ ଉନ୍ନତିମୂଳକ କାର୍ଯ୍ୟ ଶେଷ କରି ଭକ୍ତଙ୍କ ପାଇଁ ଗୁଣ୍ଡିଚା ମନ୍ଦିର ଖୋଲିବାକୁ ମତ ରଖିଛନ୍ତି ବରିଷ୍ଠ ସେବାୟତ ।
ଗତ ୨୦୨୦ କୋଭିଡ ଠାରୁ ଦୀର୍ଘ ଛଅ ବର୍ଷ ହେବ ଭକ୍ତଙ୍କ ପାଇଁ ଗୁଣ୍ଡିଚା ମନ୍ଦିର ପ୍ରବେଶ ବନ୍ଦ ରହିଛି । ଗୁଣ୍ଡିଚା ମନ୍ଦିରର ବିଭିନ୍ନ ଉନ୍ନତି ମୂଳକ କାର୍ଯ୍ୟ ଜାରି ରହିଥିବାରୁ ଭକ୍ତମାନଙ୍କ ପାଇଁ ଗୁଣ୍ଡିଚା ମନ୍ଦିର ପ୍ରବେଶ ବନ୍ଦ ରହିଥିବା ଶ୍ରୀମନ୍ଦିର ପ୍ରଶାସନ ପକ୍ଷରୁ କୁହାଯାଇଛି । ତେବେ ଦୀର୍ଘ ୬ ବର୍ଷ ହେବ ଗୁଣ୍ଡିଚା ମନ୍ଦିର ଭକ୍ତଙ୍କ ପାଇଁ ବନ୍ଦ ଥିବାରୁ ଭକ୍ତମାନେ ମହାପ୍ରଭୁଙ୍କର ଜନ୍ମସ୍ଥାନ ଦର୍ଶନ କରିନପାରି ନିରାଶ ହୋଇ ଫେରୁଛନ୍ତି । ଯାହାକୁ ନେଇ ଭକ୍ତ ଓ ସେବାୟତ ମଧ୍ୟରେ ତୀବ୍ର ଅସନ୍ତୋଷ ରହିଛି । ସେପଟେ ପୁରୀ ଜିଲ୍ଲାପାଳ କହିଛନ୍ତି ଆଗକୁ ମହାପ୍ରଭୁଙ୍କର ବିଶ୍ବ ପ୍ରସିଦ୍ଧ ରଥଯାତ୍ରା ଥିବାରୁ କିଭଳି ଗୁଣ୍ଡିଚା ମନ୍ଦିରର ସମସ୍ତ ଉନ୍ନତିମୂଳକ କାର୍ଯ୍ୟ ଶେଷ ହେବ ତାହା ଲକ୍ଷ୍ୟ ରଖାଯାଇଛି ।
You Can Read:
ରାମ ନବମୀ ପାଳନ ପୂର୍ବରୁ ସମ୍ବଲପୁରରେ ଫ୍ଲାଗ୍ ମାର୍ଚ୍ଚ, ବିଭିନ୍ନ ଛକ ବୁଲୁଛନ୍ତି ରାପିଡ ଆକ୍ସନ ଫୋର୍ସ
